1 Corintios 3 - Dios Iwene

Ötjöbi, Apolosbi sule Dios ömöayedösa jö̧ba̧lö Pablo yöawina wene

¹ Chömöledö, ökwödö Corintionö ju̧kwadö Jesúsnö ösödadönö yötawenama, ju'wedö Dios O̧'wo̧ Luwo̧nö juna̧ladönö yötawi̧danö yötawobö jö̧ta̧lijayonö, waekwijatö. Jejenö yötawoböma jwiijatö chömöledö. Jau chömöledö, ökwödönö yötawenama, böjȩ jojodönö yötawi̧danö, ja̧danö iya̧nö Cristonö ösödadönö yötawi̧danö yötawijatö.

² Ja̧danö, wanedö yötawa kwo̧'wo̧ luwo̧duwi jawama: Ina damö tjukwi̧ kwakwawa kwö̧kataduwokobetjö̧, damö tjukwi̧ kwakwawa iyökönö, sule o̧do̧'bi̧sobu ojwöda yötawijatö ökwödönöma. Jau chömöledö, damö tjukwi̧ kwakwawa kwö̧kataduwoböma jwiköbaduwijatö, ja̧danö babebi ja̧ damö tjukwi̧ kwakwawa kwö̧kataduwoböma jwibadöja,

³ böjȩ jojodö ja̧bö tjö̧ji̧danö ina ja̧bö kwö̧jaduwobetjö̧. Jau chömöledö, ju'wedö kwömöledö Jesúsnö ösödadönö ö'wiabinö edö kwö̧jaduwena, ja̧danö jobadökwö ölakwabikwawö kwö̧jaduwenama, kwi̧sebaduwobe, Dösödi̧ jawada ja̧bö ju̧kwadösa, jö̧ba̧lö, ¿jö̧tö? Ja̧danö, Ju'wedö böjȩ jojodö ja̧bö tjö̧ji̧danö ja̧bö ju̧kwadösa, jö̧ba̧lö kwi̧sebaduwobe, ¿jö̧tö?

⁴ Jau chömöledö, ökwödötjö ju'wedö, Aaa, Pabloda chuluwo̧ma jö̧ka̧laduwena, ja̧danö ju'wedö Aaa, Apolosda chuluwo̧ma jö̧ka̧laduwenama, jejenö ja̧bö kwi̧sebaduwobe, Böjȩ jojodö ja̧bö tjö̧ji̧danö ja̧bö ju̧kwadösa, jö̧ba̧lö.

⁵ Chömöledö, ¿tajawedö Apolosnö kwösödaduwobö? Ja̧danö ötjö Pablonö ¿tajawedö kwösödaduwobö? Apolosbi, ötjö Pablobi sule Dios ömöayedöda dö̧jobe chömöledö. Ja̧danö, bakwo̧nökwena Dios wainökwena pjadatobö weinadanö, Jesúsnö kwösödaduwobö pjadatijatö ötjöbi, Apolosbi.

⁶ Jau chömöledö, wanedö yötawa yöbawö dotidinama, batjo otikwa wanedö yötawa: Ötjöma önebiya lödo̧danö chotidinobe, ja̧danö Apolosma ojwiyo sa̧sa̧bo̧danö otidinobe. Jejenö dotidinajayonö pokwobö ja̧binama Diosdainobe chömöledö.

⁷ Ja̧danö, önebiya lödo̧bi, ojwiyo sa̧sa̧bo̧bi kwösödaduwoböma mikwawöködö chömöledö, sule pokwobö ja̧binada mikwawo̧ma, Diosda mikwawo̧ma kwösödaduwobö chömöledö.

⁸ Jau chömöledö, önebiya lödo̧bi, ojwiyo sa̧sa̧bo̧bi bakweminö Dios wei̧ otidadö. Ja̧danö, Dios wei̧ ja̧bö tjotidobetjö̧, bakwo̧nökwena tjotidaja̧ mikwa iyakobe Diosma.

⁹ Jau chömöledö, ötjöbi, Apolosbi bakobe Dios wei̧ otidö batjo otikwa jojodödanö ichejekwadösa. Ja̧danö, ökwödö Corintio jojodöma Dios öbatjodanö ichejekwadöja chömöledö. Ja̧danö ju'wi wanedö yötawa chömöledö: Ökwödöma Dios ejudanö ichejekwadöja.

¹⁰ Dios ötjönö ja̧bö chö̧jo jö̧ba̧lö ötjönö iyinadanö, o̧do la'aka lödo̧danö yötawijatö chömöledö. Wanedö yötawa: O̧do otikwa waiso̧ otidi̧danö otiwanö o̧do la'aka jawa chödijatö, Jesúsnö yöbawö. Ja̧danö, babema ju'wedö ja̧ la'aka jawa wamenö o̧do tjotidobe. Ja̧danö, okobe deinö ja̧ la'aka wamenö o̧do otidadöma omukwatönö tjotidobö jo̧be.

¹¹ Wanedö yötawa: Dios eju o̧do la'akadanö jo̧ma bakwo̧da, Jesucristoda. Ja̧danö, Dios eju otidadöma ja̧ la'aka wamenöda tjotidobö jo̧be, ju'wi la'aka tjödoböma jwia chömöledö.

^12-13 Jau chömöledö, ja̧ la'aka wamenöda tjotidobe otidadöma, ja̧danö o̧do tjotidi̧ma öwawakobe, otiwanö tjotidinojobö, sulabenö tjotidinojobö jö̧ba̧lö. Baikwö wanedö yötawa: O̧do otidadöma ju'wi jayetjö tjotidobe, ju'wedö orotjö, ja̧danö ju'wedö platatjö, ja̧danö ju'wedö nöinö mikwawi̧ inawiyatjö, ja̧danö ju'wedö towi ötebiyatjö, ja̧danö ju'wedö ö̧'iyatjö, ja̧danö ju'wedö meje'yetjö tjotidobe. Ja̧danö, Jesús ichakwa̧ möle badekwachenama, o̧do tjotidinejuma ökwölanö ujuwakobe Diosma, tjotidina otiwojobö jö̧ba̧lö i̧sebö.

¹⁴ Ja̧danö, bakwo̧ o̧do la'aka jawa wamenö otidina jawa ubökötjö̧ma, Diosma otidinanö otiwa jawa iyakobe otidina mikwa jö̧ba̧lö.

¹⁵ Ja̧danö, bakwo̧ otidina jawa ubitjö̧ma, otidina jawa jwiakobe. Jau chömöledö, otido̧ma Dios lȩebi̧tjö ö̧jibijayonö, otidina jawa jwiakobe. Ja̧danö, o̧do ubejutjö döbibajo̧ ichejekwo̧danö ö̧jibena jo̧ba otidina jawa ubiökwema.

¹⁶ Jau chömöledö, ökwödöma kwöwaisaduwa, ökwödöma Dios ejubedöja jö̧ba̧lö. Ja̧danö, Dios O̧'wo̧ Luwo̧ kwo̧'wo̧ luwo̧duwinö ö̧jobe jö̧ba̧lö waisadöja.

¹⁷ Chömöledö, ökwödöma Dios eju, Dios 'da̧batö ujuninejubedöja. Ja̧danö, ökwödönö suli̧ waedadönö söbebö loakwo̧ Diosma, jo̧ba ejubedönö suli̧ tjöwaedobetjö̧.

¹⁸ Chömöledö, isa̧ökö jawa omukwatökönaduwi. Ökwödötjö bakwo̧, Aaa, waiso̧sa, böjȩ waisakwawa jawa waiso̧sa jö̧ba̧lö omukwatitjö̧ma, wajwibo̧danö baibobö jo̧be. Jejenö wajwibo̧danö baibobö jo̧be, isabenö waisakwawa jawada waiso̧ baibo jö̧ba̧lö.

¹⁹ Jau chömöledö, böjȩ jojodö Aaa, biya̧ma waisakwawa ji̧ jö̧ba̧lö tjomukwati̧ma, Dios edemi waisakwawa jwii̧ jawaobe. Baikwö laebobe Dios iwene: Diosma böjȩtjö waisadönö ja̧bo̧, waisanö tjomukwati̧ma 'daliwa baibanö, jö̧ba̧lö laebobe.

²⁰ Ja̧danö jelobe baikwö laebobe Dios iwene: Diosma böjȩtjö waisadönö waiso̧, tjöwaisi̧ma mikwawökö ji̧, jö̧ba̧lö laebobe.

²¹ Ja̧danö, jejenöobetjö̧, yöba̧lökönaduwi, Aaa bite waiso̧ ömöledöso̧sa jö̧ba̧lö, jojodaobetjö̧. Jau chömöledö, okobe jwiinö ida̧ökö kwujuna̧laduwobe ökwödö Corintio jojodöma,

²² ja̧danö ötjö Pablonöbi, Apolosnöbi, Pedronöbi kwujuna̧laduwobe, ökwödönö pjabatadö jö̧ba̧lö. Ja̧danö okobe jwiinö, böjȩbi, ja̧kwawabi, woawabi, babe möle jawabi, tupakwö jawabi, okobe jwiinö ökwödö jawaobe chömöledö.

²³ Ja̧danö ökwödöma Cristo ömöledöbedöja chömöledö, ja̧danö, Cristoma Dios ömöledöso̧ chömöledö.