1 Corintios 2 - Dios Iwene

¹ Chömöledö, ötjöma Dios jawa ökwödönö damötjö yöbawö chichinenama, böjȩ jojodö waisadö yötjawi̧danöma yötawijökötö, ja̧danö nöinö chöwaisi̧ jawa chi̧sebotö jö̧ba̧löma yötawijökötö.

² Jau chömöledö, ökwödökwö chö̧jenama, okobe jwiinö ju'wi wene junibö, bakwöta weneda chöwaiso jö̧ba̧lö, Jesucristo jawa, towisa'onö woina wene jawada yötawijatö.

³ Ja̧danö, ökwödökwö chichibenama, chujulu jwibo̧, ja̧danö yebabinö tjö̧bawo̧ chichibijatö.

⁴ Ja̧danö, ökwödönö chöba̧ja̧dena, ja̧danö ökwödönö yötawenama, böjȩ jojodö waisanö yötjawi̧danöma böjȩ jawa waisakwawa ji̧ jawa yötawijökötö. Wainö yötawijatö, öwaetjöda Dios O̧'wo̧ Luwo̧ ujulu i̧sebö yötawijatö.

⁵ Jau chömöledö jejenö yötawijatö, böjȩ jojodö waisanö yötjawi̧da kwo̧'wo̧ kwöwana̧laduwapji jö̧ba̧lö, Dios ujuluda kwo̧'wo̧ kwöwana̧laduwo jö̧ba̧lö.

Dios O̧'wo̧ Luwo̧da Dios jawa ökwödönö öba̧ja̧dobe jö̧ba̧lö Pablo yöawina wene

⁶ Jau chömöledö, tjo̧'wo̧ luwo̧nö da̧peachadönö yötawenama, waisakwawa ji̧ wene yötawobe jobadönö, waisanö tjomukwatakobetjö̧. Jo̧kwaijayonö, yötawi̧ wene waisakwawa ji̧ma böjȩ waisakwawa jawamaökö, ja̧danö böjȩ luwedö waisanö tjomukwati̧ jawamaökö. Böjȩ luwedönö baikwö yötawa chömöledö, tupakwö tjujulu jwitjakwedö jobadöma. Ja̧danö jobadö waisanö tjomukwati̧ jawama yödawökö.

⁷ Jau chömöledö, yödawi̧ wene waisakwawa ji̧ma, Dios jawa waisakwawa ji̧da böjȩ jawamaökö, ja̧danö la'akatjöda jojodö wajwitjina wene. Jau chömöledö, jojodö la'akatjöda wajwitjinajayonö, böjȩ otidakwa̧ abönö Diosma ida̧ökö omukwatö ujuninobe, ökwödönö otiwanö pjaatobö.

⁸ Chömöledö, okobe deinö böjȩ luwedöma ja̧ Dios omukwati̧ma la'akatjöda wajwitjinobe. Isabenö yötawa, tjöwaisinatjö̧ma towisa'onö bȩtjoko jö̧tja̧linobe salöinö juluwo̧ Duluwo̧nö.

⁹ Jo̧kwaijayonö, wajwitjinajayonö, Diosma isabenö otiwa jawa ökwödönö iyobö omukwatobe Dios iwene laebi̧danö. Baikwö laebobe Dios iwene: Diosma inesö otiwa jawa otidinobe jo̧banö ösödadönö iyobö. Jojodöma jejenöjaye otiwa jawama la'akatjöda edöködö, ja̧danö la'akatjöda a̧ja̧kwöködö, ja̧danö la'akatjöda tjomajadenö omukwatöködö, tjomukwati̧tjö bajalekwönönö otiwobetjö̧. jö̧ba̧lö laebobe.

¹⁰ Jo̧kwaijayonö ökwödö Jesúsnö ösödadöma ja̧ jawa döwaisobe chömöledö, Diosma iteda O̧'wo̧ Luwo̧nötjö ja̧ jojodö wajwitjina jawa ökwödönö öba̧ja̧dinobetjö̧. Jau chömöledö, wanedö yötawa: Dios O̧'wo̧ Luwo̧ma okobe jwiinö isakwö edo̧ ichejekwa, ja̧danö Dios omukwati̧ jawabi isakwö edo̧ ichejekwa, ja̧bi öwaiso jö̧ba̧lö.

¹¹ Jau chömöledö, wanedö yötawa: Ökwö kwomukwati̧ma ju'wedö jojodö edöködö, ¿jö̧tö? Jo̧kwaijayonö, ju'wedö tjedököjayonö, ökwöda kwo̧'wo̧ luwo̧ma öwaisobe, ökwö kwo̧'wo̧ luwo̧obetjö, ¿jö̧tö? Dios O̧'wo̧ Luwo̧bi ja̧danö, sule Dios O̧'wo̧ Luwo̧da okobe jwiinö Dios jawa waiso̧ma, iteda O̧'wo̧ Luwo̧obetjö̧.

¹² Ja̧danö, do̧'wo̧ luwo̧nö jo̧ Dios ökwödönö iyinökwema böjȩ jojo o̧'wo̧ luwo̧maökö, Diosma iteda O̧'wo̧ Luwo̧nöda ökwödönö iyinobe. Ja̧danö, Diosma iteda O̧'wo̧ Luwo̧nö ökwödönö iyinobetjö̧, Dios ökwödönö iyi̧ jawa döwaisobö jo̧be.

¹³ Ja̧danö, biya̧ yödawi̧ wenema, böjȩ jojodö waisadö tjöba̧ja̧di̧ jawa yödawokobe, Dios O̧'wo̧ Luwo̧ öba̧ja̧di̧ jawada yödawobe. Ja̧danö, tjo̧'wo̧ luwo̧ jawa labebö lobö yödawobe Dios O̧'wo̧ Luwo̧nö juna̧ladönö.

¹⁴ Jau chömöledö, Dios O̧'wo̧ Luwo̧nö juna̧löködöma Dios O̧'wo̧ Luwo̧ iyi̧ma emöködö, tjedemi mikwa jwii̧ jawa jö̧ba̧lö. Jau chömöledö, jobadöma Dios O̧'wo̧ Luwo̧ iyi̧ tjedenama, inesö mikwawi̧ma wajwibadö, ja̧ jawa mikwawi̧ma Dios O̧'wo̧ Luwo̧ öba̧ja̧dawö̧tjokobetjö̧.

¹⁵ Ja̧danö, okobe deinö Dios O̧'wo̧ Luwo̧nö juna̧ladöma, okobe jwiinö edö tjöwaisobö juna̧ladö, Aaa, biya̧ma mikwa ji̧, mikwawökö ji̧ jö̧ba̧lö. Ja̧danö, jejenö edö tjöwaisijayonö, Dios O̧'wo̧ Luwo̧nö juna̧löködöma jobadö juna̧ladönö edö tjöwaisoböma jwibadö, Aaa, bitema mikwawo̧, mikwawö̧kö̧ jö̧ba̧lö.

¹⁶ Jau chömöledö, Dios iwene baikwö laebobe: Böjȩ jojodötjö bakwo̧bi deobe, Duluwo̧ omukwati̧ waiso̧ma, ja̧danö bakwo̧bi Duluwo̧nö ba̧ja̧do̧ma deobe jö̧ba̧lö laebobe. Ja̧danö böjȩ jojodö Dios omukwati̧ tjöwaisoböma jwibadö. Jo̧kwaijayonö ökwödö Cristonö ösödadöma Dios omukwati̧ döwaisobö jo̧be chömöledö, ökwödöma Cristo omukwati̧ dujuna̧lobetjö̧.