1 Corintios 16 - Dios Iwene

Jerusalénnö ju̧kwadötjö Jesúsnö ösödadönö pjaatakwawa jawa Pablo yöawina wene

¹ Ja̧danö, Jerusalénnö ju̧kwadö Dios ömöledönö pjaatakwawa balada jawa yötawa. Galacia nijitjö ko̧ko̧kwö tjö̧baji̧tenia ju̧kwadö Jesúsnö ösödadönö yötawinadanö yötawaduwakwö chömöledö, ökwödöbi jobadö ja̧tji̧danö ja̧köbaduwobö.

² Semanatenia abönö möle baibenama, kwujuna̧laduwi̧tjö 'da̧batö kwujunaduwo baladama. Jau chömöledö, bakwo̧nökwena wainökwena kwiyaduwobö kwujuna̧laduwitjö̧ma, wainökwena 'da̧batö kwujunaduwo baladama. Ja̧danö, tjo̧'omanö ko̧ko̧dö 'da̧batö kwujunaduwo baladama chömöledö, ökwödökwö chichibena ida̧ökö kwujuna̧laduwakobetjö̧ jö̧ba̧lö, ja̧danö chichibi̧ mölȩda balada 'da̧batö kwujunaduwapji jö̧ba̧lö.

³ Jau chömöledö, ja̧ balada Jerusalénbe e'ewö tjiyakwedönö omudawö kwujunaduwo, ja̧danö ötjö chichibenama, kwujunaduwajawö̧nö kwialusöja wȩyudö chiyocha, ju'wedö jobadönö tjöwaiso jö̧ba̧lö. Ja̧danö, jobadönö wetocha kwiyaduwaja̧ e'ewö tji̧'yo Jerusalénbe.

⁴ Ja̧danö, ötjöbi Jerusalénbe chi̧'yobö otiwitjö̧ma, ötjökwö kwetjachena.

Pablo Corintio nijibe i̧'yakwa̧ wene

⁵ Chömöledö, baikwö yötawa kwiteboduwibe chi̧'yakwa̧ma: Ajayinö Macedoniabe chi̧'yobö jo̧be chömöledö, ja̧danö jemi ikenama, ökwödö kwö̧jaduwobe chichibena.

⁶ Chedemi ja'yubenö lekwe ökwödökwö chö̧jena chömöledö, ja̧danö okobe jwiinö o̧ba ökwödökwö chöbaledena. Jemi ikenama, kwö̧jaduwelö Corintiotjö latebenama, chi̧'yakwa̧ jawa pjakataduwena chömöledö, jelobe otiwanö chi̧'yobö.

⁷ Jau chömöledö, sule baledöma ökwödönö chedobö chöpöjöda, ja'yubenö lekwe ökwödökwö chö̧jobö chösöda, ja̧danö Duluwo̧ jejenö weitjö̧ma, jejenö ja̧tocha.

⁸ Pentecostes ötjabi̧ pjiesta baibenanö kabatö, ina benada Éfesonö chö̧jocha chömöledö.

⁹ Jau chömöledö, ba̧jekwadö döpöjojodö tjö̧jijayonö, Dios pjaatobetjö̧ ina Éfesonö ja̧nö otiwanö yötawobö jo̧be, jojodö tjö̧jibinö.

¹⁰ Chömöledö, Timoteoma kwiteboduwibe ichibena, ja̧danö jobe ichibitjö̧ma, dösölö̧jinö kwösödaduwonö, yebabökönö ökwödökwö ö̧jo jö̧ba̧lö. Jau chömöledö, ötjö otidö chö̧ji̧danö, jo̧babi Duluwo̧ wei̧ otidö ö̧jobetjö̧, dösölö̧jinö kwösödaduwonö.

¹¹ Ja̧danö, ökwödötjö bakwo̧bi jo̧banö öpöjödobö webökönaduwi, Aaa, Timoteoma sulabo̧ jö̧ba̧lö. Ja̧danö, otiwanö pjakataduwonö, juluwanö jobetjö wene jwiinö laebo jö̧ba̧lö, ja̧danö juluwanö ötjökwö yemidanö ichibo jö̧ba̧lö. Jau chömöledö, ju'wedö dömöledö Jesúsnö ösödadökwö Timoteobi baikwö ȩwa̧jobö chite'ada̧lobe.

¹² Ja̧danö döjawo̧ Apolosnö yötawa. Ju'wedö dömöledö Jesúsnö ösödadöma ökwödö Corintio jojodönö edö tji̧'yobetjö̧, jobadökwö Apolosbi i̧'yobö atebijatö chömöledö, jo̧kwaijayonö Apolos edemi, babe i̧'yoböma jwia, tupakwöda chi̧'yocha jö̧ba̧lö. Ja̧danö ökwödönö edö i̧'yobö jȩnama, ökwödönö edö i̧'yakwo̧ chömöledö.

Pablo bajaleapo Corintio jojodönö weina wene

¹³ Chömöledö, te'ada̧lönö kwö̧jaduwo, ja̧danö 'diinö kwö̧jaduwo Jesúsnö ösödö dö̧ji̧ma, ja̧danö yebabökönö kwö̧jaduwo, ja̧danö kwujuluwachibaduwo chömöledö.

¹⁴ Okobe jwiinö ja̧bö kwö̧jaduwi̧ma, ju'wedönö ösödabikwawö ja̧bö kwö̧jaduwo chömöledö.

¹⁵ Chömöledö, Estéfanas mikwo̧nö, jo̧ba ömöledönöbi kwöwaisaduwa, Acaya niji ju̧kwadötjö ajayinö Jesúsnö ösödinadö jobadöma jö̧ba̧lö. Ja̧danö, jobadönö kwöwaisaduwa, jwaikwöda Dios ömöledönö pjatjatotö jö̧ba̧lö otidadö jö̧ba̧lö.

¹⁶ Ja̧danö, baikwö atebaduwakwö chömöledö: Jobadönö kwösödaduwo kwuluwedöduwi jö̧ba̧lö, ja̧danö ju'wedö jobadöjayedö Dios ömöledönö pjatjatotö jö̧ba̧lö otidadönöbi jejenö kwösödaduwobö atebaduwakwö chömöledö.

¹⁷ Chömöledö, ökwödö bai deköbaduwobetjö̧, cho̧'wo̧ tjo̧achijatö, jo̧kwaijayonö ökwödötjö Estéfanasbi, Fortunatobi, Acaicobi bai tjichibinobe. Ja̧danö, jobadö tjichibinobetjö̧, deköbaduwijayonö, babema cho̧'wo̧ ösöwanö chö̧ja chömöledö.

¹⁸ Jau chömöledö, cho̧'wo̧ ösöwachibanö pjatjatinobe, ökwödö kwo̧'wo̧duwi ösöwachibanö pjatjatinadanö. Jobadöjayedönö otiwanö kwomukwataduwobö jo̧be chömöledö.

Pablo bajaleapo yöawina

¹⁹ Asia niji ju̧kwadötjö Jesúsnö ösödadö ko̧ko̧kwö tjö̧baji̧tenia ju̧kwadöma ökwödönö dokwa jö̧ba̧lö detjawobedanö yötja̧la chömöledö. Ja̧danö, Aquilabi, ilekwo Priscabi, Aquila ejunö ko̧ko̧kwadö Jesúsnö ösödadöbi ökwödönö ösödö dokwa jö̧ba̧lö detjawobedanö yötja̧la, bakobe Jesúsnö ösödadösa jö̧ba̧lö.

²⁰ Ja̧danö, okobe deinö dömöledö Jesúsnö ösödadöma dokwa jö̧ba̧lö detjawobedanö yötja̧la. Kwömöledö Jesúsnö ösödadönö du̧batö kwösökwaduwo chömöledö, dömöledö Jesúsnö ösödadönö du̧batö dösödi̧danö.

²¹ Biya̧ bajaleapo jawa ötjöda chömamunö chiwȩyuda: Ötjö Pabloma dokwa yöta̧la jö̧ba̧lö.

²² Duluwo̧nö ösödö̧kö̧ma, Dios lȩebakwo̧ jo̧bama. Duluwo̧ Jesúsnö ateba, Chuluwo̧ juluwanö ökwödönö emö kwicho jö̧ba̧lö.

²³ Duluwo̧ Jesús ökwödönö otiwa jawa mikwa jwiinö iyobö chösöda chömöledö.

²⁴ Bakobe Cristo Jesústjö dötewadö dö̧jobetjö̧, ba̧kwȩlö̧jatebö chösödaduwakwö chömöledö. Biya̧data.