1 Corintios 15 - Dios Iwene

Cristo woawatjö tjeachajina jawa Pablo yöawina wene

¹ Chömöledö, kwomukwatibaduwobö baikwö yötawaduwakwö otiwa jawa wene, ökwödönö yötawina wenema. Ja̧ wene kwösödinaduwobe chömöledö, ja̧danö ja̧ wene jwaikwöda ösödö kwö̧jaduwobe.

² Ja̧danö, ja̧ wene 'diinö do̧ba̧lö kwösödaduwobetjö̧, ji̧badöja chömöledö. Jau chömöledö, otiwa jawa yödawi̧ wene jweinö laebitjö̧ma, isabenö ji̧badöja.

³ Jau chömöledö, inesö mikwawi̧ wene ötjö cha̧ja̧kwina wenema ökwödönö yötawijatö. Ja̧ yötawina wenema biya̧ chömöledö: Damötjö Dios iwene wȩyudinadö imidawakwo̧nö tjiwȩyudinadanö, Cristoma midawö woinobe, ökwödö dusuli̧ imidawo jö̧ba̧lö.

⁴ Ja̧danö jo̧banö tjo̧tjinobe, ja̧danö jemi ikenama wa̧pötakwa möle baledibajenama, woawatjö tjeachajinobe Dios iwene laebi̧danö.

⁵ Jemi ikenama Pedronö öwawachinobe, ikenama ju'wedö Jesús ömöayedö a̧li̧nösamutjö du̧ju̧tajabedönö öwawachinobe.

⁶ Ikenama bakobe quinientosnö jo̧banö ösödadönö öwawachinobe. Jau chömöledö, jobadö quinientosnö Jesúsnö edinadötjö, ja'yubeda ida̧ökö wotjinajayonö, ba̧jekwadö ina 'yaba̧ladö tjuju̧kwobe babebi.

⁷ Ja̧danö, ikenama Jacobonö öwawachinobe, ikenama okobe deinö Jesús webawedönö öwawachinobe.

⁸ Ikenama, bajaleapo, ötjönöbi öwawachinobe. Chömöledö, ju'wedö Jesúsnö tjedenama, ötjöma chedijökötö. Ja̧danö wanedö yötawa: Jemoko jö̧ja̧lena jeminökwedanö ichejekwo̧sa, bajaleapoda ötjönö öwawachinobetjö̧.

⁹ Jau chömöledö, Jesús webawedötjö, baikwönönöbo̧sa ötjöma, ja̧danö Jesús webawo̧ jö̧ba̧lö ötjabobö mikwawö̧kö̧sa ötjöma, Dios ömöledönö usula tjemawinö ja̧tinobetjö̧.

¹⁰ Jo̧kwaijayonö, Diosma mikwa jwiinö otiwa jawa iyinobetjö̧, Jesús webawo̧ chö̧jobe chömöledö. Ja̧danö, Dios ötjönö iyinama waekwinokobe chömöledö, ja̧danö ju'wedönötjö o̧penönö 'diinö chotidijatö chömöledö. Jo̧kwaijayonö, ötjöda chotidijökötö chömöledö, Diosda otiwa jawa iyö ötjönötjö 'diinö otidinobe ichejekwa.

¹¹ Jau chömöledö, ja̧ otiwa jawa wene yödawobe, ötjöbi, ju'wedö Jesús webawedöbi. Ja̧danö, ötjönötjö kwa̧ja̧kwinaduwatjö̧bi, jobadönötjö kwa̧ja̧kwinaduwatjö̧bi, bakwayiobe chömöledö ja̧ bakwöta jawa weneda yödawobetjö̧, ja̧danö ja̧ bakwöta jawa weneda kwösödaduwobetjö̧.

Jesúsnö ösödadö woawatjö tjetjachajakwa̧ jawa Pablo yöawina wene

¹² Jau chömöledö, Cristo woawatjö tjeachajina wene yödawobe, ¿jö̧tö? Jo̧kwajabetjö̧, ¿dakwö yöka̧laduwobö chömöledö, woawatjö tjeachakwawama jwia jö̧ba̧lö? Jau chömöledö, ökwödötjö ju'wedöma jejenö yöka̧laduwobe, jojodöma woawatjö tjebachajöködö jö̧ba̧lö.

¹³ Chömöledö, isabenö woawatjö tjeachakwawa jwiitjö̧ma, Cristobi tjeachajoko jö̧a̧linobe.

¹⁴ Ja̧danö, Cristo tjeachajinökötjö̧ma, mikwa jwii̧ weneda yödawobe, ja̧danö mikwa jwii̧ weneda kwösödaduwobe chömöledö.

¹⁵ Ja̧danö, Cristo tjeachajinökötjö̧ma, Diosnö omöna yöba̧ladösa jö̧ba̧lö di̧sebo jö̧da̧lena chömöledö, jo̧banö omöna yöda̧lobetjö̧, Cristonö tjeachajinö ja̧bina jö̧ba̧lö. Jau chömöledö, wobajadö woawatjö tjetjachajökötjö̧ma, Diosma Cristonö tjeachajinö ja̧inökena.

¹⁶ Ja̧danö, wobajadöma woawatjö tjetjachajökötjö̧ma, Cristobi tjeachajinökena.

¹⁷ Ja̧danö, Cristo tjeachajinökötjö̧ma, jo̧banö kwösödaduwi̧ma mikwawökena, ja̧danö ina kwusuladuwi̧ kwujuna̧laduwobetjö̧, ina kwo̧'wo̧ luwo̧duwinö wobadö kwö̧jaduwena.

¹⁸ Ja̧danö, ju'wibi chömöledö, Cristo tjeachajinökötjö̧ma, jo̧banö ösödadö wobinadöma tjö̧jibinökena, ja̧danö Dios lȩebi̧tjö tjemena.

¹⁹ Jau chömöledö, Cristonö do̧'wo̧ döwana̧li̧ma sule böjȩnöda mikwawitjö̧ma, ökwödöwe, ju'wedönötjö o̧penönö ökwödönö tjomukwato jö̧tja̧lobe jojodöma, jobadöwe jö̧ba̧lö.

²⁰ Jo̧kwaijayonö, jobadöwe jö̧ba̧lö ökwödönö tjomukwatoböma jwia chömöledö, Cristoma isabenö woawatjö tjeachajinobetjö̧. Jau chömöledö, Diosma Cristonö tjeachajinö ja̧inobe, ja̧danö jejenö Cristonö tjeachajinö ja̧bö, wobinadö woawatjö tjetjachajakwa̧ wene yöbawö ujuninobe Diosma chömöledö.

²¹ Jau chömöledö, woawama jojonötjö jamatinobe, ja̧danö jelo̧ jojonötjö woawatjö tjeachajakwawabi jamatinobe.

²² Okobe deinö Adántjö dötewadö ja̧nö, wobadösa, ¿jö̧tö? Ja̧danö, Cristotjö dötewadö ja̧nö, okobe deinö 'yabayedö badibanö tjedachajakwedösa chömöledö.

²³ Jo̧kwaijayonö, okobe deinö bakwo̧nökwena tjetjachajo jö̧tja̧lenada tjetjachajakwedö chömöledö. Cristoma abönö tjeachajinobe, ja̧danö jo̧ba yemidanö ichenama, jo̧ba ömöledöbi 'yabibajö tjetjachajakwedö chömöledö.

²⁴ Ikenama, böjȩ 'dö̧ibakobe chömöledö. Abönö Cristoma okobe deinö ujuluwakobe, juluwadönöbi, ja̧danö okobe deinö luwedönö mölejȩnö ju̧kwadönöbi, böjȩnö jukwadönöbi. Jejenö juluwajo̧, jo̧bada la'aka luwo̧ ö̧jakobe. Jemi ikenama, la'aka luwo̧ ö̧ji̧ma iteda Abe'do Diosnö iyakobe, Ökwöda la'aka luwo̧ kwö̧jo, jö̧ba̧lö.

²⁵ Jau chömöledö, Cristoda la'aka luwo̧ ö̧jobö jo̧be, okobe deinö jo̧ba öpöjojodö jo̧ba ömasapiya teebenö tjö̧jenanö kabatö, Jo̧bada la'aka luwo̧ jö̧ba̧lö.

²⁶ Ja̧danö, wanedö yötawa: Woawama Cristo öpöjojodanö ji̧ ichejekwa, ja̧danö bajaleapo Cristoma woawatjöbi ujuluwakobe.

²⁷ Baikwö laebobe Dios iwene: Diosma okobe jwiinöbi, okobe deinöbi jo̧ba ömasapiya teebe ödakobe, jö̧ba̧lö laebobe. Chömöledö, ja̧ okobe jwiinöbi okobe deinöbi Cristo ömasapiya teebe ödakobe jö̧ba̧lö laebi̧ma, Diosbi Cristo ömasapiya teebe baibakwo̧ jö̧ba̧löma laebokobe. Diosda ju'wedönö Cristo ömasapiya teebe ödakwo̧ma chömöledö.

²⁸ Ja̧danö, okobe jwiinöbi, okobe deinöbi juluwajo̧, itji̧ Cristoma itedada ichibakobe Dios ömöayo̧ baibanö. Jau chömöledö, Diosda Cristonö juno̧ma, okobe jwiinöbi, okobe deinöbi tjuluwo̧ baibanö. Ja̧danö, jejenö ichibajo̧, Cristoma itedada ichibakwo̧ Dios ömöayo̧ baibanö, ökwöda okobe jwiinöbi, okobe deinöbi la'aka tjuluwo̧bi, chuluwo̧bi kwö̧jo jö̧ba̧lö.

²⁹ Ju'wibi yötawa chömöledö, woawatjö tjeachajakwawa jawa. Ökwödötjö ju'wedö ja̧köbaduwi̧ wanedö yötawa: Ju'wedöma ida̧ökö wobinadönö pjatjatotö jö̧ba̧lö, ojwenö bu̧datakwawa ja̧tjobe jobadö tjiminö, ¿jö̧tö? Woawatjö tjeachakwawa jwiobe jö̧ba̧lö kwomukwataduwitjö̧ma, ¿tajawedö jejenö ja̧köbaduwobö chömöledö?

³⁰ Ja̧danö, jojodö woawatjö tjetjachajökötjö̧ma, ¿tajawedö kabatökönö labi jawa chöbaledobö chömöledö?

³¹ Chömöledö, jwiinö chösödaduwakwö, ja̧danö bakobe Duluwo̧ Cristo Jesúskwö dötewinö duju̧kwobetjö̧, ökwödönö ösödö yötawobe, chömöledö Corintio jojodöma otiwadö jö̧ba̧lö. Kwöwaisaduwa chömöledö isabenö ökwödönö ösödö yötawobe chömöledö, ja̧danö ja̧ yötawaja̧ isabenö ji̧danö, ju'wi isabenö wene yötawaduwakwö chömöledö, Cristo jawa wene yöbawö chö̧jobetjö̧, kabatökönö woto jö̧ta̧lobe ichejekwa chömöledö.

³² Ja̧danö, isabenö woawatjö tjeachakwawa jwiitjö̧ma, ¿taji mikwawobeda ja̧ woto jö̧ta̧li̧ma chömöledö? Ja̧danö, bena Éfesonö ja̧nö jojodö labidö tebonö ju̧kwadödanö ichejekwadökwö ölakwabikwawö chö̧jijatö chömöledö. Ja̧ma ¿böjȩnö chö̧ji̧ pjaato jö̧a̧lenaji̧, otiwanö chö̧jo jö̧ba̧löma? Isabenö woawatjö tjeachakwawa jwiitjö̧ma, ölakwabikwawöma chö̧joko jö̧ta̧lajena chömöledö. Jau chömöledö, ju'wedöma baikwö yötja̧lobe, itekwayi möle wodena, jo̧kwajabetjö̧ babe mölȩma dösödi̧ jawada ja̧do owöbi, kwanöbi jö̧ba̧lö. Ja̧danö, isabenö woawatjö tjeachakwawa jwiinatjö̧ma, jobadö tjomukwati̧danö domukwato jö̧da̧lena.

³³ Ja̧ wene, omöna jawa wene ösödökönaduwi chömöledö. Baikwö yötawaduwakwö: Sulabenö ja̧badökwö kwuju̧kwaduwitjö̧ma, ökwödöbi sulabenö ja̧badö bakibaduwena.

³⁴ Sulabenö ja̧köbaduwi̧ kabatibö, tjekachajaduwo chömöledö, yemidanö jweinö kwomukwataduwo jö̧ba̧lö. Isabenö yötawaduwakwö chömöledö, ökwödötjö ju'wedöma Diosnö wajwibadöja chömöledö, ja̧danö jo̧banö wajwiköbaduwobetjö̧, kwötabakwaduwobö jo̧be.

Mölejȩbesa'o diteba'o jawa Pablo yöawina wene

³⁵ Ökwödötjö bakwo̧ abebö a̧ja̧kwena, wobinadöma ¿dakwö woawatjö tjetjachajobö, tjiteba'o taji jawasa'o juna̧ladö tjetjachajoböda? jö̧ba̧lö abebö a̧ja̧kwena.

³⁶ Jejenö abebo̧nö baikwö yötawa: ¡Wajwibo̧ja̧ chömöledöso̧! Wanedö yötawa: Batjo jawa pokwo jö̧ba̧lö ödebiya kwöditjö̧ma, pokwakwa̧ abönö ödebiyama woobedanö ichejekwa, ¿jö̧tö?

³⁷ Ja̧danö, ödebiya kwödi̧ma, trigosadeö̧kö̧, ju'wi jawasadeö̧kö̧ kwödena, ¿jö̧tö? Jau chömöledö, tupakwö pokwakwa'yema kwödokobe, isadeda kwödobe, pokwakwa'yedanö ichejekwököde, ¿jö̧tö?

³⁸ Jo̧kwaijayonö, wainö ichejekwijayonö, Diosma iteda omukwati̧danö ja̧de iteba'odanö iyobe, ¿jö̧tö? Jau chömöledö, bakwadekwena wainö iteba'okwena iyobe.

³⁹ Ja̧danö, böjȩnö ju̧kwadö diteba'oma, okobe deinö wainökwena juna̧ladösa chömöledö. Jojodöma wainö ichejekwa'o juna̧ladö, ja̧danö tebonö ju̧kwadöma wainö ichejekwa'o juna̧ladö, ja̧danö mö köba̧ladöma wainö ichejekwa'o juna̧ladö, ja̧danö ba̧i̧ma wainö ichejekwa'o juna̧ladö.

⁴⁰ Ja̧danö, mölejȩnö la̧jadö tjiteba'oma, böjȩnö ju̧kwadö tjiteba'odanö ichejekwokobe. Ja̧danö, mölejȩnö ju̧kwadöma tjotikwi̧ juna̧ladö, ja̧danö böjȩnö ju̧kwadöma wainö tjotikwi̧ juna̧ladö chömöledö.

⁴¹ Jau chömöledö, jawo̧ma, iteda otikwi̧ juna̧lo̧, ja̧danö yö̧te jawo̧ma, iteda otikwi̧ juna̧lo̧, ja̧danö si̧li̧'i̧döbi, idöda tjotikwi̧ juna̧ladö. Ja̧danö, si̧li̧'i̧dötjö, wainökwena tjotikwi̧ juna̧ladö.

⁴² Woawatjö tjeachakwawabi ja̧danö chömöledö. Diteba'o tjo̧tjenama, woawasa'o tjödobe, jo̧kwaijayonö Dios tjeachajinö ja̧enama, woawa jwia'o tjeachajakobe chömöledö.

⁴³ Ja̧danö, tjo̧tjenama, sulabesa'o ichejekwa'o, ja̧danö julu jwia'o tjödobe, jo̧kwaijayonö Dios tjeachajinö ja̧enama, otiwa'o, juluwa'o tjeachajakobe.

⁴⁴ Ja̧danö tjo̧tjenama, böjȩ jawasa'o tjödobe, jo̧kwaijayonö Dios tjeachajinö ja̧enama, tjo̧'wo̧ luwo̧ jawasa'o tjeachajakobe. Jau chömöledö, böjȩ jawasa'o ji̧tjö̧ma, do̧'wo̧ luwo̧ jawasa'obi jȩna.

⁴⁵ Jau chömöledö, baikwö laebobe Dios iwene: Ajayinö jojo Adánnö otidinobe, 'yabalo̧ baibanö, jö̧ba̧lö laebobe. Jo̧kwaijayonö, ikena luwo̧ Cristoma, ja̧kwawa iyo̧ O̧'wo̧ Luwo̧ baibinobe.

⁴⁶ Chömöledö, tjo̧'wo̧ luwo̧sa'oma abönö ji̧na'oinokobe, ¿jö̧tö? Ajayinö böjȩsa'o ji̧nobe, jemi ikenama tjo̧'wo̧ luwo̧sa'o jo̧be chömöledö.

⁴⁷ Ajayi jojoma, böjȩ luwo̧inobe, ja̧danö letiatjö otidinökweinobe. Jo̧kwaijayonö ikena luwo̧ma, mölejȩtjö ichina chömöledö.

⁴⁸ Ja̧danö, böjȩ jojodöma, letiatjö otidinökwedanö ichejekwadö, jo̧kwaijayonö mölejȩbe jojodöma, mölejȩbetjö ichinadanö ichejekwadö chömöledö.

⁴⁹ Jau chömöledö, babema letiatjö otidinökwedanö dichejekwobe, ¿jö̧tö? Ja̧danö, babe jo̧banö dichejekwi̧danö, tupakwöma mölejȩbetjö ichinadanö dichejekwakwedösa chömöledö.

⁵⁰ Baikwö yötawaduwakwö chömöledö: Diteba'o dökwösobutjö ja̧danö ditebiatjö otikwa'oma, Dios ö̧jena mölejȩbema teachökakwa'o chömöledö. Ja̧danö, diteba'o woawasa'oma, la'akatjöda ba̧kwȩlö̧jatebö ja̧kwawa jwia'o chömöledö.

⁵¹ Ja̧danö, baikwö yötawaduwakwö ajayinö jojodö wajwitjina jawa chömöledö. Ökwödö Jesúsnö ösödadötjö ju'wedöma böjȩtjö wodökena chömöledö, jo̧kwaijayonö okobe deinö döbalewachinö ja̧akwo̧ Diosma.

⁵² Jau chömöledö, bajaleapo trompeta ökwöenama, okobe deinö juluwanö döbalewachakwedösa, tjöbajale juluwanö yi̧tjatabidanö döbalewachakwedösa chömöledö. Ja̧ trompeta ökwöenama, wobinadö woawatjö tjetjachajakwedö, yemidanö woböködö batjibanö, ja̧danö okobe deinö döbalewachakwedösa.

⁵³ Jau chömöledö, diteba'o woawasa'oma balewachobö jo̧be, woawa jwia'o baibanö. Ja̧danö, wobadöma woböködö baibanö döbalewachobö jo̧be.

⁵⁴ Ja̧danö, jejenö wobajadö woböködö baibanö döbalewachena, ja̧danö woawasa'o woawa jwia'o baibanö balewachenama, Dios iwene laebi̧danö baibakobe chömöledö. Baikwö laebobe Dios iwene: Duluwo̧ma söbebö loajabe woawama, ja̧danö okobe jwiinö ujuluwajabe.

⁵⁵ Jo̧kwajabetjö̧, woawa ökwödönö juluwoböma jwia, ja̧danö woawa julu jwia, ökwödönö suli̧ waedo jö̧ba̧lö, laebobe.

⁵⁶ Jau chömöledö, baikwö labebö lobö yötawa woawa juluwi̧ma. Dios weina Moisés iwȩyudinama ökwödö sulabenö ja̧di̧ i̧sebobe, ¿jö̧tö? Ja̧danö, sulabenö ja̧dobetjö̧, woawama ökwödönö juluwobe, ¿jö̧tö?

⁵⁷ Jo̧kwaijayonö Duluwo̧ Jesucristonötjö Diosma dujuluwobö pjaatinobe chömöledö. Ja̧danö, jejenö pjaatinobetjö̧, jo̧banö chösöda, otiwanö pjabato̧ja̧ jö̧ba̧lö.

⁵⁸ Jejenö jo̧be chösödawö̧ chömöledö, ja̧danö jejenöobetjö̧, 'diinö kwö̧jaduwo, pjolachibökönö. Ja̧danö jwaikwöda Duluwo̧ wei̧ ja̧bö kwö̧jaduwo kwöwaisaduwobetjö̧, Duluwo̧ wei̧ ja̧bö dö̧ji̧ma isabenö mikwa ji̧ jö̧ba̧lö.