1 Corintios 14 - Dios Iwene

¹ Jau chömöledö, jwaikwöda kwisakwaduwo, ju'wedönö ösödabikwawö kwö̧jaduwo jö̧ba̧lö. Baikwö yötawa, Dios iteda i̧tji̧mu ja̧bö tjö̧jo jö̧ba̧lö Dios iyi̧ma chömöledö. Okobe jwiinö Dios iteda i̧tji̧mu ja̧bö tjö̧jo jö̧ba̧lö iyi̧ma kwösödaduwo chömöledö, jo̧kwaijayonö ja̧ jawatjö bajalekwönönö kwösödaduwo jö̧ka̧laduwi̧ma, Dios yöawi̧ yöawakwawa chömöledö.

Wajwitji̧ tjiwenenö yöa̧lakwawa jawa Pablo yöawina wene

^2-3 Baikwö labebö lobö yötawa: Dios yöawi̧ yöbawo̧ma, jojodönö da̧pedö yöbawo̧, ja̧danö tjujuluwachibanö yöbawo̧, ja̧danö tjo̧'wo̧ tjo̧achapji jö̧ba̧lö yöbawo̧. Jo̧kwaijayonö, ju'wedö wajwitji̧ tjiwenenö yöba̧lo̧ma, jojodönö yöba̧lö̧kö̧, Diosnöda yöba̧lo̧ chömöledö. Dios O̧'wo̧ Luwo̧ ujulunö, jojodö wajwitji̧ jawa yöawobe, jo̧kwaijayonö jojodö tja̧ja̧kwokobe, wajwitji̧ tjiwenenö yöa̧lobetjö̧.

⁴ Ju'wedö tjiwenenö yöba̧lo̧ma, iteda o̧'wo̧ luwo̧nö da̧pedö yöba̧lo̧ ichejekwa, jo̧kwaijayonö tjöwaisi̧ tjiwenenö Dios yöawi̧ yöbawo̧ma okobe deinö Jesúsnö ösödadönö pjabato̧ chömöledö.

⁵ Jau chömöledö, okobe deinö ju'wedö tjiwenenö yöka̧laduwobö chösöda, jo̧kwaijayonö ja̧tjö o̧penönö chösödi̧ma biya̧, jojodö tjiwenenö Dios yöawi̧ yökawaduwobö chömöledö. Jau chömöledö, ju'wedö tjiwenenö yöbawo̧ma, laebi̧ jawa labebö loawa jwiinö yöawitjö̧ma, yöawi̧ma jojodönö mikwawokobe, tja̧ja̧kwokobetjö̧. Jo̧kwajabetjö̧ ju'wedö tjiwenenö yöbawo̧nötjö bajalekwönönö mikwawobe jojodö tjiwenenö Dios yöawi̧ yöbawo̧ma, okobe deinö Jesúsnö ösödadönö pjaatobetjö̧.

⁶ Yötawaja̧ labebö lobö yötawa chömöledö. Ökwödökwö ichibö, ju'wedö tjiwenenö yötawitjö̧ma, ökwödönö pjatatökena ichejekwa, kwa̧ja̧kwaduwokobetjö̧, ¿jö̧tö? Jo̧kwaijayonö, Dios ötjönö i̧sebina wene ökwödönö kwiweneduwinö yötawitjö̧bi, ja̧danö waisakwawa ji̧ wene yötawitjö̧bi, ja̧danö Dios yöawi̧ yötawitjö̧bi, ja̧danö ökwödönö chöba̧ja̧ditjö̧bi, jejenö ja̧bö ökwödönö pjatatena chömöledö.

⁷ Lo̧awa jawa asabikwawa jawa flauta ötjabi̧ jawabi, ja̧danö arpa ötjabi̧ jawabi ja̧danö chömöledö. Ja̧ jawama ja̧kwawa jwiijayonö, ökwöo jö̧a̧li̧danö ökwöobö jo̧be. Baikwö yötawa chömöledö: Asabikwawa jawa flauta ötjabi̧ jawabi, ja̧danö arpa ötjabi̧ jawabi ökwöo jö̧a̧li̧danö ökwöökötjö̧ma, ¿dakwö a̧ja̧kwö tjöwaisobö laebi̧ma chömöledö? Wajwitjena, ¿jö̧tö?

⁸ Ja̧danö, guardia jojodöma, ja̧tjakwa̧ yöbawö trompeta ötjabi̧ jawa asabidö. Ja̧danö, asabo̧ma, wajuwanö asabo jö̧a̧li̧ ökwöi̧danö asabökötjö̧ma, ¿dakwö a̧ja̧kwö tjöwaisobö, Aaa, babema kwakwabakwawö di̧'yakwa̧ abönö jawa dotido jö̧ba̧lö? Wajwitjena, ¿jö̧tö?

⁹ Ökwödöbi ja̧danö chömöledö, ju'wedö tjiwenenö yöka̧litjö̧ma, a̧ja̧kwadö tja̧ja̧kwokonö yöka̧litjö̧ma, yöka̧li̧ ¿dakwö tjöwaisobö chömöledö? Wajwitjena chömöledö, ja̧danö yöka̧li̧ma jwa̧lȩ'epjonö e'ewobedanö ichejekwena chömöledö.

¹⁰ Jau chömöledö, isabenö nöinö tjiwenetenia jo̧be, ja̧danö tjiwenetenia waisadökwenama laebi̧ma otiwanö tjöwaisobe, ¿jö̧tö?

¹¹ Jo̧kwaijayonö bakwo̧ yöa̧li̧ cha̧ja̧kwökötjö̧ma, yöba̧lo̧ma jelobetjö ichajo̧danö ichejekwena ötjönöma. Ja̧danö jo̧ba yöa̧li̧ cha̧ja̧kwokobetjö̧, ötjöma jelobetjö ichajo̧danö chichejekwena yöba̧lo̧nöma.

¹² Jau chömöledö, ökwödöma Dios ökwödönö ja̧bö dö̧jo jö̧ba̧lö iyi̧ma ja̧köbaduwobö otiwanö ösödadöja. Ja̧danö baikwö wetaduwakwö: Ju'wedö Jesúsnö ösödadönö da̧pedakwawa jawa kwisakwaduwo chömöledö, ja̧ ja̧bö kwö̧jaduwo jö̧ba̧lö.

¹³ Jo̧kwajabetjö̧, baikwö yötawa: Ju'wedö tjiwenenö yöba̧lo̧ma, Diosnö aebobö jo̧be, ju'wedö tjiwenenö yöa̧li̧ma a̧ja̧kwöködönö labebö loobö pjaato jö̧ba̧lö.

¹⁴ Jau chömöledö, ötjöma ju'wedö tjiwenenö Diosnö atebitjö̧ma, cho̧'wo̧ luwo̧ma otiwanö Diosnö aebobe, jo̧kwaijayonö chomukwati̧ chomukwatökö yöta̧li̧ma.

¹⁵ Ja̧danö, otiwanö ja̧ti̧ma ¿diya̧da? Baikwö otiwa chömöledö: Chiwenenö atebobö otiwa, cho̧'wo̧ luwo̧nöbi, chomukwati̧nöbi Diosnö atebakobetjö̧ chömöledö. Ja̧danö lo̧tenama, chiwenenö lo̧tena, cho̧'wo̧ luwo̧nöbi, chomukwati̧nöbi lo̧takobetjö̧.

¹⁶ Jau chömöledö, kwo̧'wo̧ luwo̧nöda Diosnö otiwanö kwiyajabe jö̧ba̧lö Diosnö akebitjö̧ma, yöka̧li̧ wene wajwibo̧ma a̧ja̧kwökena. Ja̧danö, Diosnö otiwanö kwiyajabe jö̧ba̧lö Diosnö akebijayonö, jo̧bama a̧ja̧kwökena, ja̧danö jau, ötjöbi jobekwö chösöda jö̧a̧loböma jwiena chömöledö.

¹⁷ Jau chömöledö, ökwöma otiwanö Diosnö akebena, otiwanö kwiyajabe jö̧ba̧lö akebena, jo̧kwaijayonö jelo̧ a̧ja̧kwokonö akebobetjö̧, jo̧banö kwöda̧pedokobe ichejekwa chömöledö.

¹⁸ Chömöledö, ökwödönötjö o̧penönö nöinö ju'wedö tjiwenenö yöba̧lo̧sa ötjöma, ja̧danö jejenö yöta̧lobö Dios iyinobetjö̧, jo̧banö otiwanö kwiyinobe jö̧ba̧lö atebanö.

¹⁹ Jo̧kwaijayonö, Jesúsnö ösödadökwö ko̧ko̧kwö ba̧nöma, ju'wedö tjiwenenö yöta̧lökö chömöledö. Jau chömöledö, diez mil jenanö jawa wajwitji̧ tjiwenenö yöta̧lijayonö, a̧ja̧kwadönö pjatatökena, tja̧ja̧kwokobetjö̧, ¿jö̧tö? Jo̧kwaijayonö bakwamu jawada tja̧ja̧kwi̧ tjiwenenö pjaati̧ jawa yötawitjö̧ma, jobadönö da̧pedö pjatatena, ¿jö̧tö? Jo̧kwajabetjö̧, ja̧tjö o̧penönö chösödi̧ma ja̧da chömöledö, tja̧ja̧kwi̧ tjiweneda yötawobö.

²⁰ Chömöledö, biya̧ yötawaja̧ jawa wajwibö kwomukwataduwa, tjemu wajwitji̧danö. Suli̧ jawa wajwiköbaduwobö chösöda chömöledö, bakwainö otiwi̧da kwomukwataduwo jö̧ba̧lö, jo̧kwaijayonö biya̧ yötawaja̧ jawa tjo̧'wo̧ luwo̧nö da̧peachadö tjomukwati̧danö jweinö kwomukwataduwobö chösöda.

²¹ Ju'wedö tjiwenenö yöa̧lakwawama baikwö laebobe Dios Iwene damötjö Israel jojodönö tji̧wȩyudinama: Duluwo̧ma baikwö yöawobe: Ju'wedö tjiwenenö yöba̧ladönötjö bidönö yötawocha. Ja̧danö jelobetjö ju̧kwadönötjö jobadönö yötawijayonö, ina yötawi̧ tjöpöjödakwedö, jö̧ba̧lö laebobe.

²² Ja̧danö, jejenöobetjö̧, ju'wedö tjiwenenö yöa̧lakwawama, Jesúsnö öpöjödadönö i̧sekwa baibanö jo̧be, Jesúsnö ösödadönö i̧sekwa baibanömaökö. Jo̧kwaijayonö Dios yöawi̧ yöawakwawama, Jesúsnö ösödadönö i̧sekwa baibanö jo̧be, Jesúsnö öpöjödadönömaökö.

²³ Ja̧danö, ökwödö Jesúsnö ösödadö okobe deinö ko̧ko̧kwö, ju'wedö tjiwenenö yöka̧laduwonö, ju'wedö tetjachitjö̧ma ¿taji baledenada chömöledö? Ju'wedö tjiwene wajwibadöbi, Jesúsnö öpöjödadöbi tetjachitjö̧ma, jejenö tja̧ja̧kwökönö yöka̧laduwobe a̧ja̧kwö, Aaa, bidöma tjo̧'wo̧ jwibadö yöba̧ladöena jö̧ba̧lö tjomukwatena, ¿jö̧tö?

²⁴ Jo̧kwaijayonö ju'wedö tjiwene wajwibadöbi, Jesúsnö öpöjödadöbi tetjachenama okobe deinö Dios yöawi̧ yökawaduwitjö̧ma, yökawaduwi̧ a̧ja̧kwö, tjusuli̧ tjöwaisachibena, Aaa, isabenö dusuli̧ juna̧ladösa jö̧ba̧lö chömöledö. Jau chömöledö, okobe jwiinö yökawaduwi̧ tja̧ja̧kwi̧ma tjusuli̧ wene yöawena ichejekwa,

²⁵ ja̧danö tjomajadenö tjomukwati̧ma öwawachibena ichejekwa. Ja̧danö, jejenö balediawö̧, bȩba̧chibö Diosnö tjösödena, isabenö Diosma bidö tjö'da̧de jo̧ jö̧ba̧lö.

Ko̧ko̧kwö kwö̧bajaduwenama, aliyadakwawöma ja̧köbaduwoko jö̧ba̧lö Pablo yöawina wene

²⁶ Jau chömöledö, yötawaja̧danö jo̧be, jo̧kwajabetjö̧ baikwö wetaduwakwö ja̧bö kwö̧jaduwo jö̧ba̧lö: Ko̧ko̧kwö Diosnö kwösödaduwenama, bakwo̧ lo̧awa lo̧o jö̧ba̧lö ujuna̧lena. Ja̧danö, jelo̧ ba̧ja̧dakwawa öba̧ja̧do jö̧ba̧lö ujuna̧lena. Ja̧danö, jelo̧ Dios jo̧banö i̧sebina jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yöawakwawa jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yötja̧li̧ labebö lobö yöawo jö̧ba̧lö ujuna̧lena. Jau chömöledö, okobe jwiinö ko̧ko̧kwö ja̧köbaduwi̧ma, Jesúsnö ösödadö tjöda̧peacho jö̧a̧li̧ jawada ja̧köbaduwo.

²⁷ Ja̧danö, ju'wedö tjiwenenö yöba̧lo̧ma yöa̧lobö jö̧a̧litjö̧ma, ju'wedö tjiwenenö yöba̧ladö sule du̧ju̧tajaö̧kö̧, wa̧medukwaö̧kö̧ bakwo̧nökwena yötja̧lo chömöledö, ja̧danö yötja̧laja̧ma ju'wedö tjiwenenö yötja̧li̧ labebö lobo̧ma labebö lobö yöawena.

²⁸ Jo̧kwaijayonö labebö lobö yöbawo̧ deitjö̧ma, yötja̧loko ju'wedö tjiwenenö yöba̧ladöma, 'wi̧inö tjö̧bo chömöledö. Ja̧danö, yötja̧lo jö̧tja̧li̧ jawa, idökwöda Dioskwöda yötja̧lena.

²⁹ Ja̧danö, Dios yöawi̧ yöbawadöma bakwo̧nökwena yötjawo, du̧ju̧tajaena, wa̧medukwaena bakwo̧nökwena yötjawena. Ja̧danö yöbawo̧ yöawonö, ju'wedöma tja̧ja̧kwo, jweinö yöawojobö jö̧ba̧lö.

³⁰ Ja̧danö bakwo̧ yöawonö, Dios jelo̧ jobe bo̧nö ju'wi jaye yöawo jö̧ba̧lö i̧sebitjö̧ma, abönö yöbawo̧ma 'wi̧inö baibobö jo̧be, Dios i̧sebajökwe yöawo jö̧ba̧lö.

³¹ Jau chömöledö, okobe deinö bakwo̧nökwena yökawaduwena Dios yöawi̧ma, okobe deinö kwöwaisachibaduwo jö̧ba̧lö, okobe deinö kwo̧'wo̧ luwo̧duwinö kwujuluwachibaduwo jö̧ba̧lö.

³² Dios O̧'wo̧ Luwo̧ma aliyadakwawö ja̧doböma webö̧kö̧ chömöledö, isabenö ökwödö do̧'wo̧ luwo̧nö yöawobe jo̧kwaijayonö teada̧lökönö aliyadakwawinö yökawaduwoböma webö̧kö̧. Isabenö, aliyadakwawö ja̧köbaduwapji jö̧ba̧lö kwite'ada̧lobö juluwadöja chömöledö, jo̧kwajabetjö̧, yötawaja̧danö bakwo̧nökwena yökawaduwoböma otiwa, aliyadakwawö yökawaduwapji jö̧ba̧lö.

³³ Jau chömöledö, aliyadakwawö ja̧doböma ösödö̧kö̧ Diosma, dösölö̧jinö wene jwiinö ja̧bö dö̧jobö ösödo̧. Ja̧danö, okobe deinö ko̧ko̧kwö tjö̧baji̧tenia Jesúsnö ösödadö ja̧tji̧danö,

³⁴ ko̧ko̧kwö kwö̧bajaduwenama, ya̧döma 'wi̧inö tjö̧bo chömöledö. Jau chömöledö, ya̧döma yötjawoko tjoko̧ko̧kwibajelöma, ja̧danö Dios Iwene laebi̧danö, Jesúsnö ösödadö tjuluwedö batjiboko ya̧döma.

³⁵ Ja̧danö, ju'wi jaye tjöwaisobö jö̧tja̧litjö̧ma, tjoko̧ko̧kwibajelöma abebökönö, tjejutjöda tji̧lȩkwa̧munö abebö tja̧ja̧kwobö jo̧be, ya̧dö tjoko̧ko̧kwibajelö yötjawobö taba lö̧ji̧ jawaobetjö̧.

³⁶ Chömöledö, ökwödönö yötawaja̧ öpöjödadönöma, baikwö abebö cha̧ja̧kwa, ¿ökwödödaji̧ la'aka Dios iwene yöbawinadöma? ¿Ökwödödaji̧ Dios iwene a̧ja̧kwinadöma? Ökwödödamaökö chömöledö.

³⁷ Ja̧danö, baikwö yötawaduwakwö chömöledö, ökwödötjö bakwo̧ Aaa, Dios yöawi̧ yöbawo̧sa̧ jö̧ba̧lö omukwatitjö̧ma, ja̧danö Aaa, ju'wi ja̧bö chö̧jo jö̧ba̧lö Dios iyinökwesa jö̧ba̧lö omukwatitjö̧ma, chiwȩyudaja̧ a̧ja̧kwö ösödo jö̧a̧lobe chömöledö, isabenö Duluwo̧ wei̧ jö̧ba̧lö.

³⁸ Jo̧kwaijayonö, yötawaja̧ öpöjöditjö̧ma, jo̧banö a̧ja̧kwökönaduwi chömöledö.

³⁹ Jau chömöledö, Dios yöawi̧ yökawaduwoböma jwiinö kwösödaduwo, ja̧danö ju'wedö tjiwenenö yöa̧lakwawa öpöjödökönaduwi, yöba̧lökönaduwi jö̧ba̧lö.

⁴⁰ Ja̧danö, okobe jwiinö ja̧bö kwö̧jaduwi̧ma, aliyadakwawönöma ja̧köbaduwa, jweinö ja̧köbaduwo jö̧ka̧laduwi̧danö ja̧baduwi chömöledö.