1 Corintios 13 - Dios Iwene

¹ Ötjöma okobe deinö jojodö tjiwenebi, ángelesdö tjiwenebi okobe jwiinö tjiwenetenia otiwanö yöta̧lena. Jo̧kwaijayonö jejenö tjiwenetenia yöta̧lijayonö, ju'wedönö ösödakwabikwawökönö ja̧nö chö̧jitjö̧ma, chö̧ji̧ma mikwawökena chömöledö. Ja̧danö wanedö yötawa, yötawi̧ okwa jawa jwiobetjö̧, sule campanadanö, 'dii̧ jawatjö kwatji̧ ökwöi̧danö chichejekwena chömöledö.

² Ja̧danö, otiwanö Dios yöawi̧ yötawobö chöwaisena, ja̧danö okobe jwiinö chöwaisena, jojodö wajwitji̧ jawabi chöwaisena. Ja̧danö, jwaikwöda Diosnö chösödena, okobe jwiinö juluwo̧ jö̧ba̧lö. Jau chömöledö, mö'ösa'iju pjolachibinö weto jö̧ba̧lö Diosnö chösödena, Diosma mö'ösa'iju pjolachibinö ja̧obö juluwo̧ jö̧ba̧lö. Jo̧kwaijayonö, ju'wedönö ösödakwabikwawökönö chö̧jitjö̧ma, mikwawö̧kö̧sa chömöledö.

³ Ja̧danö, okobe jwiinö chujuna̧li̧ma a̧'dȩlökönö iyö lotena jwibadönö pjabatö, ja̧danö chiteba'o Diosnö juwö iyawa'o baibanö chiyawena, jo̧kwaijayonö ju'wedönö ösödakwabikwawökönö jejenö ja̧titjö̧ma, ja̧ti̧ma mikwawokobe ötjönöma chömöledö.

⁴ Jojodönö ösödabikwawö ja̧kwawama baikwö yötawa chömöledö: Jojodönö ösödabikwawö ja̧kwawama, o̧'wo̧ 'dibachibö lȩlö̧jinö ja̧bö ji̧. Ja̧danö, ö'wiabinöma edökönö ji̧, ja̧danö otiwo̧sa jö̧ba̧löma omukwatökönö ji̧.

⁵ Ja̧danö, ju'wedönö sulabenöma ja̧bökönö ji̧, ja̧danö a̧'dȩlökönö ji̧, ja̧danö dameakwökönö ji̧. Ja̧danö, ju'wedö sulabenö ja̧tji̧ ba̧ja̧dökönö ji̧ jojodönö ösödabikwawö ja̧kwawama chömöledö.

⁶ Ja̧danö, jojodönö ösödabikwawö ja̧kwawama, sulabenö jawa baledobö ösödökönö, otiwa jawa isabenö wene jawada ösödö ji̧.

⁷ Ja̧danö, usula emawenama, o̧'wo̧ 'dibachibö ji̧. Ja̧danö, jwaikwöda Dios yöawi̧ ösödö ji̧, jweinö yöbawo̧ jö̧ba̧lö. Ja̧danö, jwaikwöda Diosnö o̧'wo̧ wana̧lö ji̧, isabenö jö̧a̧li̧danö baledakobe jö̧ba̧lö. Ja̧danö, okobe jwiinö baledonö, me'dawachibökönö ji̧, jojodönö ösödabikwawö ja̧kwawama.

⁸ Jau chömöledö, jojodönö ösödabikwawö ja̧kwawama 'dö̧ibökakobe, böjȩnö ja̧nöbi, mölejȩnö ja̧nöbi dömöledönö ösödabikwawö dö̧jakobetjö̧. Jo̧kwaijayonö jejenömaökö ju'wi jaye ja̧bö dö̧jo jö̧ba̧lö Dios ökwödönö iyi̧ jawama chömöledö. Dios yöawi̧ yöawakwawama 'dö̧ibakobe, ja̧danö ju'wedö tjiwenenö yöawakwawabi 'dö̧ibakobe, ja̧danö waisakwawabi 'dö̧ibakobe chömöledö, böjȩnö dö̧jayida ja̧bö dö̧jobö Dios ja̧ iyobetjö̧.

⁹ Jau chömöledö, waisakwawa döwaisi̧ma, okobe jwiinöma döwaisokobe babema, ja̧danö Dios yö̧awi̧ yödawi̧ma, okobe jwiinöma yödawokobe babema.

¹⁰ Jo̧kwaijayonö mölejȩbetjö okobe jwiinö bakwainö otiwanö baibenama, ja'ödama döwaisökena, ja̧danö ja'ödama yödawökena. Jau chömöledö, ja̧ mölema okobe jwiinö döwaisakwedösa, ja̧danö okobe jwiinö yödawakwedösa.

¹¹ Baikwö wanedö yötawa chömöledö: Ötjöma ina tjemu chö̧jayi, tjemu yöa̧li̧danö yöta̧lijatö, ja̧danö tjemu omukwati̧danö chomukwatijatö, ja̧danö tjemu öwaisachibi̧danö chöwaisachibijatö, jo̧kwaijayonö pöe batibenama, tjemu jawa katatibijatö chömöledö.

¹² Ja̧danö, babema wajuwanöma dedokobe Diosnöma chömöledö, tjöbadekwawöte sulabötetjö dediakwawobedanö ichejekwa, jo̧kwaijayonö mölejȩbetjö, döbabiyakwena öwawinö dedakobe. Ja̧danö, babe Diosnö chöwaisi̧ma, ja'öda chöwaisobe, jo̧kwaijayonö mölejȩbetjö, jo̧ba ötjönö öwaisi̧danö balekwa mikwa jo̧banö chöwaisakobe chömöledö.

¹³ Ja̧danö, wa̧pötakwa jawa 'dö̧ibökö jawa jo̧be chömöledö, biya̧: Dios yöawi̧ ösödakwawabi, Dios jö̧a̧li̧danö otiwanö baibakobe jö̧ba̧lö te'ada̧lakwawa, ju'wedönö ösödabikwawö ja̧kwawabi. Ja̧danö, baikwö yötawaduwakwö chömöledö: Ja̧ wa̧pötakwa jawatjö, bajalekwönönö mikwawi̧ma, ju'wedönö ösödabikwawö ja̧kwawada chömöledö.