1 Corintios 12 - Dios Iwene

Dios O̧'wo̧ Luwo̧ ökwödönö iyi̧ jawa Pablo yöawina wene

¹ Ja̧danö, ju'wibi yötawaduwakwö chömöledö. Dios iteda ömöledönö ja̧bö tjö̧jo jö̧ba̧lö Dios iyi̧ jawa yötawa, ja̧ jawa kwöwaisaduwobö chösödobetjö̧.

² Chömöledö, damötjö kwö̧jinaduwa kwöwaisaduwa, ¿jö̧tö? Jesúsnö kwösödaduwakwa̧ abönöma, Awetjama ökwödönö öibinobe ichejekwa, ja̧kwawa jwibo̧ o̧'wo̧ jawa kwösödaduwo jö̧ba̧lö, ¿jö̧tö? Ja̧danö, kwomukwatinaduwadanö ju'wedönöbi, ju'wedönöbi kwösödinaduwobe.

³ Ja̧danö, yöbawadö yötjawi̧ a̧ja̧kwö, Dios O̧'wo̧ Luwo̧ ujulunö yötjawojobö yötjawokojobö jö̧ba̧lö kwöwaisaduwobö baikwö yötawa chömöledö: Dios O̧'wo̧ Luwo̧ ujulunö yöbawadöma, la'akatjöda yöbawöködö, Jesúsma sulabo̧, Dios lȩebakwo̧ Jesúsnöma jö̧ba̧lö. Ja̧danö, Jesúsma la'aka luwo̧ jö̧ba̧lö yöbawadöma, Dios O̧'wo̧ Luwo̧ pjaatawö̧da jejenö yöbawadö chömöledö.

⁴ Ja̧danö, baikwö yötawa: Dios iteda i̧tji̧mu ja̧bö tjö̧jo iyi̧ma nöinö jo̧be, jo̧kwaijayonö iyo̧ma bakwo̧da, Dios O̧'wo̧ Luwo̧da.

⁵ Ja̧danö, bakwo̧nökwena böjȩnö ja̧nö wainökwena dotidobe, jo̧kwaijayonö Duluwo̧ma bakwo̧da.

⁶ Ja̧danö, bakwo̧nökwena wainökwena dujulu juna̧ladösa Dios wei̧ ja̧bö dö̧jo jö̧ba̧lö. Jo̧kwaijayonö Diosda ökwödönö dujulu iyo̧ma, wainökwena dotido jö̧ba̧lö.

⁷ Jau chömöledö, Dios O̧'wo̧ Luwo̧ma bakwo̧nökwena do̧'wo̧ luwo̧nö jo̧, ¿jö̧tö? Ja̧danö, do̧'wo̧ luwo̧nö ja̧nö, ökwödönötjö iteda ujulu wainökwena i̧sekwobe chömöledö, okobe deinö bakobe pjadatakwawo jö̧ba̧lö.

⁸ Ja̧danö, Dios O̧'wo̧ Luwo̧ma bakwo̧nö iyena, jojodönö waisanö lȩekwa yöawo jö̧ba̧lö. Ja̧danö, jelo̧nö waisakwawa ji̧ wene yöawo jö̧ba̧lö iyo̧ma jo̧bada, Dios O̧'wo̧ Luwo̧da.

⁹ Ja̧danö, Dios O̧'wo̧ Luwo̧ma bakwo̧dajayonö, bakwo̧nö iyena jwaikwöda Dios yöawi̧ ösödo jö̧ba̧lö. Ja̧danö jelo̧nö ujulu iyena, ö'wöchadönö otidö loo jö̧ba̧lö.

¹⁰ Dios O̧'wo̧ Luwo̧ma bakwo̧nö ujulu iyena, jojodö edajitjökö jawa i̧sebo jö̧ba̧lö. Ja̧danö, jelo̧nö iyena Dios yöawi̧ yöawo jö̧ba̧lö. Ja̧danö, jelo̧nö iyena ju'wedö yötjawi̧ a̧ja̧kwö Dios yöawi̧da yötjawojobö, jelo̧ yöawi̧da yötjawojobö öwaiso jö̧ba̧lö. Ja̧danö, jelo̧nö iyena, ju'wedö tjiwene wajwii̧ iwenenö waisachökönö yöawo jö̧ba̧lö. Ja̧danö, jelo̧nö iyena, wajwii̧ tjiwene yötja̧li̧ a̧ja̧kwö, jweinö labebö lobö yöawo jö̧ba̧lö.

¹¹ Jejenö wainökwena iyijayonö, iyo̧ma bakwo̧da, Dios O̧'wo̧ Luwo̧da. Ja̧danö, jo̧bada ösödi̧danö okobe deinö bakwo̧nökwena wainökwena iyo̧, jo̧ba ujulunö ja̧bö tjö̧jo jö̧ba̧lö.

Ökwödö Jesúsnö ösödadöma, ba̧jekwadö dö̧jijayonö, bakwo̧da iteba'obedösa jö̧ba̧lö Pablo yöawina wene

¹² Chömöledö, baikwö wanedö yötawa: Jojodö tjiteba'oma, bakwa'oda tjujuna̧ljayonö, nöinö tjujuna̧lobe tjiteba'o jawa, tjömamijubi, tjömasapiyabi, ju'wibi nöinö tjujuna̧lobe, ¿jö̧tö? Ja̧danö, okobe jwiinö tjiteba'o jawama, nöinö tjujuna̧lijayonö, bakwa'oda tjujuna̧lobe, ¿jö̧tö? Ökwödö Cristo iteba'obedöbi ja̧danö chömöledö.

¹³ Bakwo̧da, Dios O̧'wo̧ Luwo̧da okobe deinö bakwa'o Cristo iteba'o badibanö ujuninobe ökwödönöma chömöledö, judío jojodönöbi, judío jojodöböködönöbi, tjömöayedö batjibanö midö tjeminawö̧nöbi, tjömöayedöböködönöbi. Ja̧danö bakwo̧da, Dios O̧'wo̧ Luwo̧da okobe deinö do̧'wo̧ luwo̧nö tebachibö jamatinama chömöledö.

¹⁴ Chömöledö, bakwo̧ iteba'oma, bakwöta jawadaokobe, ¿jö̧tö? Nöinö jo̧be bakwo̧ iteba'o jawama, ¿jö̧tö?

¹⁵ Ja̧danö, baikwö wanedö yötawa: Bakwo̧ ömasapama, Aaa, ömamuchokobetjö̧, bite iteba'o jawachokobe jö̧ba̧lö jö̧a̧litjö̧ma, isabenö ¿iteba'o jawaökenaji̧ ömasapama? Ömamuokobetjö̧, ¿iteba'o jawaökenaji̧? Ömamuököjayonö, yayonö iteba'o jawa, ¿jö̧tö?

¹⁶ Ja̧danö, ölakiyuma, Aaa, bite öbajalechokobetjö̧, iteba'o jawachokobe jö̧ba̧lö jö̧a̧lijayonö, yayonö iteba'o jawaena, ¿jö̧tö?

¹⁷ Chömöledö, bakwo̧ iteba'oma okobe jwiinö bakwai̧da öbajaleda ji̧tjö̧ma, ¿dakwö a̧ja̧kwobö? A̧ja̧kwökena, ¿jö̧tö? Ja̧danö, iteba'oma okobe jwiinö bakwai̧da ölakiyuda ji̧tjö̧ma, ¿dakwö 'dö̧atobö?

¹⁸ Jo̧kwaijayonö, okobe jwiinö bakwöta jawa baibanöma otidinokobe Diosma chömöledö, okobe jwiinö tjiteba'o jawa wainökwena iteda ösödi̧danö otidö ujuninobe.

¹⁹ Jau chömöledö, tjiteba'oma okobe jwiinö bakwöta jawada ji̧tjö̧ma, tjiteba'oma jwiena ichejekwa, bakwöta jawadaobetjö̧, ¿jö̧tö?

²⁰ Jo̧kwaijayonö, tjiteba'oma bakwöta jawadaokobe chömöledö, nöinö jo̧be tjiteba'o jawa chömöledö. Ja̧danö nöinö tjiteba'o jawa ji̧jayonö, bakwa'oda baibanö jo̧be.

²¹ Ja̧danö, okobe jwiinö bakwa'oda baibanö jo̧betjö̧, wanedö yötawa: Öbajalema yöa̧lobö jwia, ömamuma pjaatökötjö, mikwawi̧ jwia jö̧ba̧lö. Ja̧danö, uuma yöa̧lobö jwia, ömasapama pjaatökötjö, mikwawi̧ jwia jö̧ba̧lö.

²² Jau chömöledö, diteba'o jawatjö mikwawökö ji̧ jö̧ba̧lö döpöjödi̧ jawama, dösödi̧ jawatjö o̧penönö mikwawobe ichejekwa. Ja̧danö, julu jwii̧ jö̧ba̧lö döpöjödi̧ jawama, ja̧ jawa jwiitjö̧ma dö̧jobö jwiena, inesö mikwawobetjö̧.

^23-24 Ja̧danö, diteba'o jawatjö, Aaa, biya̧ma sula, mikwawökö jö̧ba̧lö döpöjödi̧ jawama, ju'wi jayetjö o̧penönö ja̧ma dite'ada̧lobe ichejekwa. Jau chömöledö, diteba'o jawatjö, di̧sebobö otiwa jö̧ba̧lö dösödi̧ jawama, dumuchebökö, ¿jö̧tö? Jo̧kwaijayonö, diteba'o jawatjö ju'wedö tjedobö döpöjödi̧ jawama, ja̧tjö o̧penönö dite'ada̧lobe ichejekwa, ja̧danö te'ada̧lönö muchekwibö dö̧jobe. Jau chömöledö, Diosma jejenö diteba'o otidö ujuninobe, mikwawökö jö̧ba̧lö döpöjödi̧ jawama, ju'wi jayetjö o̧penönö omukwatö dite'ada̧lo jö̧ba̧lö.

²⁵ Ja̧danö, wanedö yötawa: Jejenö otidö ujuninobetjö̧, diteba'o jawama ju'wi diteba'o jawakwö ölakwabikwawokobe chömöledö. Ja̧danö, okobe jwiinö diteba'o jawama bakwainö omukwatö, ju'wi diteba'o jawa te'ada̧lö jo̧be ichejekwa.

²⁶ Ja̧danö, diteba'o jawatjö bakwöta jawa usula emawitjö̧ma, okobe jwiinö diteba'oma usula emawobe chömöledö. Ja̧danö wanedö yötawa: Bakwöta jawa Aaa, ja̧ma otiwa jö̧ba̧lö tjomukwatenama, okobe jwiinö diteba'oma o̧'wo̧ ösöwanö ösödö jo̧be ichejekwa.

²⁷ Jau chömöledö, yötawaja̧ma baikwö labebö lobö yötawa: Ökwödöma Cristo iteba'obedöja, ja̧danö okobe deinö bakwo̧nökwena Cristo iteba'o jawa kwö̧jaduwobe.

²⁸ Ja̧danö, okobe deinö iteda ömöledö, Cristo iteba'obedönö otidö ujuninobe Diosma, baikwö yötawa: Abönö Jesús webawedönö ujuninobe, ikenama Dios yöawi̧ yöbawadönö ujuninobe, ikenama Jesúsnö ösödadönö ba̧ja̧dadönö ujuninobe, ikenama jojodö edajitjökö jawa ja̧badönö ujuninobe. Ikenama jojodö tjö'wöchi̧ otidö lobadönöbi, ja̧danö jojodönö pjabatadönöbi, ja̧danö luwedö baibanö otidadönöbi, ja̧danö ju'wedö tjiwenenö yöba̧ladönöbi ujuninobe.

²⁹ Chömöledö, ¿okobe deinö Jesús webawedö batjibanö ujuninaji̧? ¿Okobe deinö Dios yöawi̧ yöbawadö batjibanö ujuninaji̧? ¿Okobe deinö ba̧ja̧dadö batjibanö ujuninaji̧? ¿Okobe deinö jojodö edajitjökö jawa ja̧badö batjibanö ujuninaji̧?

³⁰ ¿Okobe deinö jojodö tjö'wöchi̧ otidö lobadö batjibanö ujuninaji̧? ¿Okobe deinö ju'wedö tjiwenenö yöba̧ladö batjibanö ujuninaji̧? ¿Okobe deinö ju'wedö tjiwenenö yöta̧li̧ jawa labebö lobadö batjibanö ujuninaji̧? Ja̧maökö chömöledö, wainökwena otidö ujuninobe Diosma.

³¹ Ja̧danö, baikwö yötawaduwakwö chömöledö, isabenö kwisakwaduwo Dios O̧'wo̧ Luwo̧ iyi̧, inesö mikwawi̧ jawama, ja̧ ja̧bö kwö̧jaduwo jö̧ba̧lö. Jo̧kwaijayonö ja̧tjö o̧penönö inesö mikwawi̧ jawama, baikwö yötawaduwakwö chömöledö: