1 Corintios 11 - Dios Iwene

¹ Jau chömöledö, ötjöma Cristo ja̧bö i̧sebinadanö ja̧bö chö̧jobe, ja̧danö ökwödö Corintio jojodöma ötjö ja̧bö chi̧sebi̧danö ja̧bö kwö̧jaduwo chömöledö.

Jesúsnö ösödadö ko̧ko̧kwö tjö̧baji̧ jawa Pablo yöawina wene

² Chömöledö, ökwödöma otiwanö kwomukwataduwobe ötjö ja̧bö chö̧jinama, ja̧danö ökwödönö wetina jawama otiwanö ja̧bö kwö̧jaduwobe, baikwö ja̧bö kwö̧jaduwo jö̧ba̧lö ökwödönö wetina jawama. Ja̧danö, jejenöobetjö̧, otiwa jö̧ba̧lö yötawaduwakwö chömöledö.

³ Ja̧danö, tupakwö yötawaduwakwö chömöledö, kwöwaisaduwobö. Baikwö yötawa: Ömadö bakwo̧nökwena tjuluwo̧ma Cristo jö̧ba̧lö. Ja̧danö, ya̧dö bakwujukwena tjuluwo̧ma tjilekwe jö̧ba̧lö. Ja̧danö, Cristo uluwo̧ma Dios jö̧ba̧lö.

⁴ Ja̧danö, jejenöobetjö̧, baikwö yötawa: Ju'wedö Cristonö ösödadökwö ko̧ko̧kwö tjö̧bajenama, bakwo̧ iteda uu muchekwö Diosnö aebitjö̧bi, ja̧danö iteda uu muchekwö Dios iwene yöawitjö̧bi, iteda uluwo̧ Cristonö sulabenö tjomukwatobö ja̧bo̧ ichejekwa.

⁵ Ja̧danö, ju'wedö Cristonö ösödadökwö ko̧ko̧kwö tjö̧bajenama, bakwuju juu muchekwökönö Diosnö ajebitjö̧bi, ja̧danö juu muchekwökönö Dios iwene yöjawitjö̧bi, juluwo̧ jilekwenö sulabenö tjomukwatobö ja̧buju ichejekwa. Jau chömöledö, juu muchekwökönö Diosnö abebuju ja̧danö Dios iwene yöbawujuma, okobe jwiinö jöwö'ye 'wibö lotjinokodanö ichejekwuju.

⁶ Ja̧danö, bakwujuma jejenö juu muchekwa jöpöjöditjö̧ma, jöwö'ye okobe jwiinö 'wibö lotjinokodanö ida̧ökö jichejekwobetjö̧, jöwö'ye 'wibö lojawo jobujuma. Jo̧kwaijayonö, jejenö 'wibö lojoböma jwiinö taba lö̧ji̧ jawa chömöledö, jo̧kwajabetjö̧ öpöjödabökönö juu jumuchekwobö jo̧be.

⁷ Baikwö labebö lobö yötawa chömöledö: Diosma jojoso̧nö otidinobe, Diosdanö ichejekwo̧nö, ¿jö̧tö? Ja̧danö, jojoso̧ma uu umuchekwobö jwia, Diosdanö ichejekwi̧ i̧sekwobetjö̧, ja̧danö Dios inesö ujulu i̧sekwobetjö̧. Ja̧danö, ömadö jejenö Dios ujulu tji̧sekwijayonö, ya̧döma ömadö tjujulu i̧sekwadö chömöledö,

⁸ jojoso̧tjö otikwawö̧tjobetjö̧. Jau chömöledö, jojosujutjöma jojoso̧nö otidinokobe Diosma, jojoso̧tjö jojosujunö otidinobe.

⁹ Ja̧danö jojosujunö pjabato̧ baibanö jojoso̧nöma otidinokobe Diosma, jojoso̧nö pjabatuju bajibanö jojosujunö otidinobe.

¹⁰ Jau chömöledö, Dios ömöayedö ángelesdöma ökwödönö edadö. Ja̧danö, jejenö tjedobetjö̧, ya̧dö tjuu tjumucheibobö jo̧be, chilekwe ömöayujusa jö̧ba̧lö.

¹¹ Jejenö jo̧be chömöledö, jo̧kwaijayonö Duluwo̧nö ösödö dö̧ji̧ma, ömadöma ya̧dö deinö jö̧ködö, ja̧danö ya̧döma ömadö deinö jö̧ködö.

¹² Baikwö labebö lobö yötawa: Ajayinö Diosma iso̧tjö isujunö otidinobe, ¿jö̧tö? Ja̧danö, babema ya̧dötjö ömadönö otidobe ichejekwa, tjojo'dotjö tjöbötjachobetjö̧. Ja̧danö, isujuma iso̧tjö otikwuju, ja̧danö iso̧ma isujutjö otikwo̧. Ja̧danö, okobe deinö, ömadönöbi, ya̧dönöbi otido̧ma Diosda.

¹³ Jau chömöledö, baikwö yötawa ökwödöda kwomukwataduwobö, ya̧dö jojodö tjöba a'otjö tjuu mucheibökönö Diosnö atjebobö otiwojobö, sulojobö jö̧ba̧lö:

¹⁴ Kwöwaisaduwa chömöledö. Ömadö tjöwö'ye ödöa'ye tjujunalitjö̧ma, taba lö̧ji̧ jawa jo̧be jobadönöma, ¿jö̧tö?

¹⁵ Jo̧kwaijayonö, ya̧dönö tjotikwobö ji̧, tjöwö'ye ödöa'yema, ¿jö̧tö? Jau chömöledö, Diosma ya̧dönö tjöwö'ye ödöa'ye iyinobe tjuu muchekwado̧danö baibanö.

¹⁶ Jau chömöledö, biya̧da yötawa ja̧ tjuu jawama. Ja̧danö, biya̧ a̧ja̧kwibö ju'wedö ina jejenömaökö jö̧ba̧lö tjomukwatitjö̧ma, jobadökwö ölakwabikwawöma tupakwö yöta̧lakwawökö chömöledö. Baikwö yötawa jejenö omukwatadönöma, okobe deinö ko̧ko̧kwö tjö̧baji̧tenia Jesúsnö ösödadöbi, ökwödöbi, okobe deinö yötawaja̧danö ja̧dobe ko̧ko̧kwö dö̧benama.

Jesús midawö woina omukwatö owawa ja̧danö kwakwawa jawa Pablo yöawina wene

¹⁷ Chömöledö, tupakwö yötawaduwakwö, ja̧bö kwö̧jaduwo jö̧ba̧lö. Ja̧danö, biya̧ ökwödönö yötawakwa̧ jawama, otiwanö ja̧badöja jö̧ba̧löma yöta̧lökö chömöledö, sulabenö ja̧bö kwö̧jaduwobetjö̧. Jau chömöledö, ökwödö Corintionö ju̧kwadö Jesúsnö ösödadö ko̧ko̧kwö kwöba̧jaduwenama, suli̧ waedakwawö kwö̧jaduwobe ichejekwa.

¹⁸ Ajayi jawa yötawi̧ma baikwö yötawa chömöledö: Ökwödönö cha̧ja̧kwinobe, Corintionö ju̧kwadö ko̧ko̧kwö tjö̧bajenama, ölakwabikwawö wainökwena 'da̧bachibö ju̧kwadö jö̧ba̧lö. Ja̧danö, chedemi jweinö yötjawinena ichejekwa chömöledö.

¹⁹ Jau chömöledö, ökwödötjö sulabenö omukwatadö tjuju̧kwobetjö̧, isabenö ökwödötjö wene baibobö jo̧be, jweinö omukwatadö tjöwawachibakobetjö̧.

²⁰ Baikwö yötawa: Ökwödöma ko̧ko̧kwö Duluwo̧ midawö woina omukwatö kwukwaduwenama, Duluwo̧ midawö woina omukwatöma kwöködöja chömöledö.

²¹ Yötawaja̧ baikwö labebö lobö yötawa chömöledö: Kwukwaduwenama, okobe deinö bakwo̧nökwena juluwanö kwukwaduwakwa̧ do̧batadöja, ju'wedönö te'ada̧lökönö. Ja̧danö, ökwödötjö ju'wedö a̧wi̧chi̧ tjötjobe, ja̧danö ju'wedö 'dukwachawö̧ batjibobe.

²² ¿Tajawedö jejenö ja̧badöja chömöledö? ¿Ökwödöma kwejuduwi jwiköbaduwiji̧? kwejuduwitjö kwukwaduwo jö̧ba̧lö. Juna̧ladöja chömöledö, ja̧danö a̧wi̧chi̧ tjöitjö̧ma kwejuduwitjöda kwukwaduwobö jȩna. Jo̧kwaijayonö, ko̧ko̧kwö kwukwaduwenama, sulabenö ja̧badöja. Jau chömöledö, jejenö ja̧bö jwibadö tjötabakwobö ja̧köbaduwobe, ja̧danö Dios ömöledö ko̧ko̧kwadönö kwöpöjödaduwobe chömöledö. Jejenö kwö̧jaduwitjö̧, ¿dakwö yötawobö ökwödönö chömöledö? ¿Otiwanö ja̧badöja jö̧ba̧lö yötawenaji̧? Ja̧maökö, otiwanö ja̧badöja jö̧ba̧löma yötawökö chömöledö.

²³ Chömöledö, Duluwo̧ ötjönö yöawina jawa belö ökwödönö yötawijatö, baikwö yötawa: Jesús ömöayo̧ jo̧banö iyö loina yö̧tema, Duluwo̧ Jesúsma panpja̧ emibö,

²⁴ Diosnö aebinobe, otiwanö kwiyajabe jö̧ba̧lö. Jemi ikenama, ja̧ panpja̧ 'delawö iyinobe ömöayedönö. Ja̧danö jobadönö wanedö yöawinobe: Bipja̧ma ötjö chiteba'o, ja̧danö ökwödö kwö̧jibaduwobö chiyobe chiteba'oma. Ökwödönö biya̧ chi̧sebaja̧danö ja̧köbaduwo ötjönö omukwatö jö̧ba̧lö yöawinobe.

²⁵ Ja̧danö, tjukwaja̧ ikena, dȩja̧'do̧ emibö, jobadönö wanedö yöawinobe: Bi'do̧sobutjö Diosma 'yayi̧ wene isabenö ja̧akwa̧ wene yöawobe, chökwösobu ebawakobetjö̧ Dios ja̧akwa̧ wenema. Ba̧kwȩlö̧jatebö biya̧ ökwödönö chi̧sebaja̧danö kwowaduwenama, ötjönö omukwatö kwowaduwo jö̧ba̧lö yöawinobe.

²⁶ Ja̧danö, jejenö yöawinobetjö̧, ja̧ pan kwukwaduwena, ja̧danö ja̧ owawa kwowaduwenama, Duluwo̧ midawö woina wene kwi̧sebaduwobe. Jau chömöledö, Duluwo̧ yemidanö ichibenanö kabatö, jejenö ja̧bö kwi̧sebaduwobe midawö woina wenema.

²⁷ Ja̧danö, jejenö ja̧bö Duluwo̧ midawö woina wene kwi̧sebaduwobetjö̧, baikwö yötawa: Duluwo̧ midawö woina omukwatökönö bakwo̧ sulabenö ukwitjö̧bi, ja̧danö owitjö̧bi, Duluwo̧ iteba'obi, ja̧danö ökwösobubi öpöjödobedanö ichejekwa, mikwawökö ji̧ jö̧ba̧lö.

²⁸ Jo̧kwajabetjö̧, ökwödöma bakwo̧nökwena ökwödöda kwomukwataduwo, jweinö omukwatö kwukwojobö, kwowojobö jö̧ba̧lö. Jemi ikenama, ja̧ pan kwukwaduwo, ja̧danö kwowaduwo, Duluwo̧nö omukwatö.

²⁹ Jau chömöledö, Duluwo̧ iteba'o jawa jweinö omukwatökönö kwukwaduwitjö̧ma, ja̧danö kwowaduwitjö̧ma, Dios ökwödönö lȩebo jö̧ba̧lö ja̧köbaduwobe chömöledö.

³⁰ Jejenöobetjö̧, ökwödötjö ba̧jekwadö kwö'wöchaduwobe, ja̧danö kwime'dawaduwobe, ja̧danö ju'wedö debö tji̧'yinobe chömöledö.

³¹ Chömöledö, ökwödöda jweinö omukwatö dukwojobö, dowojobö jö̧ba̧lö domukwatitjö̧ma, Diosma ökwödönö lȩeboko jö̧a̧lena.

³² Ja̧danö, Duluwo̧ma ökwödönö lȩbebö jweebobe chömöledö, ju'wedö böjȩ jojodönö Dios lȩebenama, ökwödönöbi lȩebapji jö̧ba̧lö chömöledö.

³³ Chömöledö, yötawaja̧danö jo̧betjö̧, Duluwo̧ midawö woina wene omukwatö ko̧ko̧kwö kwukwaduwenama, ju'wedö kwömöledö Jesúsnö ösödadönö kwite'ada̧laduwo.

³⁴ Ja̧danö, a̧wi̧chi̧lö̧jitjö̧ma, kwejuduwitjöda abönö kwukwaduwo, ko̧ko̧kwö kwukwaduwenama sulabenö ja̧köbiökwe Dios lȩebapji jö̧ba̧lö. Ja̧danö ju'wijaye abebö kwa̧ja̧kwinaduwa jawama, jobe Corintiobe chichibenada ökwödönö atadö yötawocha, ja̧bö kwö̧jaduwo jö̧ba̧lö.