1 Corintios 10 - Dios Iwene

Israel jojodö ja̧tjinadanö ja̧bökönaduwi jö̧ba̧lö Pablo yöawina wene

¹ Chömöledö, kwomukwataduwobö wanedö yötawaduwakwö, ökwödö judío jojodö da'dödömine jawama: Judío jojodö da'dödöminema, okobe deinö Moiséskwö kwetjachinobe, ¿jö̧tö? Ja̧danö, Dios önina'wo ojwiyo'woma, jobadönö okobe deinö tjöeba̧la'wo ji̧nobe, ¿jö̧tö? Ja̧danö, jobadö okobe deinö ojwe duwödö tjöbaledinobe, ¿jö̧tö?

² Jau chömöledö, okobe deinö bakobe Moiséskwö batjibanö ojwiyo'wobi, ojwe duwödöbi tjöbaledinobe, ¿jö̧tö?

³ Ja̧danö, okobe deinö bakobe Dios iyina pan tjukwinobe, ¿jö̧tö?

⁴ Ja̧danö, okobe deinö bakobe Dios iyina ojwiyo tjowinobe, ¿jö̧tö? Jau chömöledö, okobe deinö inawatjö tjowinobe, ja̧danö jawa jobadökwö kweachinawama, Cristodainobe chömöledö.

⁵ Jo̧kwaijayonö, okobe deinö jejenö bakobe tjöbaledinajayonö, jobadötjö ba̧jekwadönö ödameakwinobe Diosma chömöledö. Ja̧danö, jojodö deobetjö Diosma jobadönö kwabö loinobe.

⁶ Chömöledö, jobadönö baledinama, ökwödönö wanedö i̧sekwa baibanö baledinobe, ökwödö jobadö sulabe jawa tjösödinadanö ökwödöbi dösödapji jö̧ba̧lö,

⁷ ja̧danö, o̧'wo̧ jawa dösödapji jö̧ba̧lö, jobadö tjösödinadanö. Jau chömöledö, judío jojodö tja'dödönö baikwö laebobe Dios iwenema: Jojodö bamatö tjukwinobe, ja̧danö tjowinobe. Ikenama sulabenö ja̧bö baile dötjinobe, jö̧ba̧lö laebobe.

⁸ Chömöledö, jobadö sulabenö ja̧tjinadanö di̧lȩkwa̧muböködökwö sulabenö ja̧doko. Jejenö sulabenö ja̧tjiökwe, jobadö judío jojodö tja'dödönö veintitrés mil jenanö wotjinobe bakwöta möle chömöledö.

⁹ Ja̧danö Duluwo̧ ökwödönö lȩebojobö dedo jö̧ba̧lö sulabenöma ja̧doko chömöledö. Jobadö ajayinö ji̧nadö Duluwo̧ jobadönö lȩebojobö tjedo jö̧ba̧lö sulabenö ja̧tjinobetjö̧, a̧ko̧'dö̧tjö debö tji̧'yinobe.

¹⁰ Ja̧danö, Diosnö öpöjödö yöda̧lakwawoko chömöledö, Diosma sulabenö iyo̧ jö̧ba̧lö. Jobadö ajayinö ji̧nadö jejenö sulabenö öpöjödö yötja̧liökwe, Diosma ángelso̧ kwabawo̧nö weinobe, jobadönö kwabö loo jö̧ba̧lö.

¹¹ Jau chömöledö, ja̧ jobadönö baledinama, ju'wedönö wanedö i̧sekwa baibanö baledinobe, ja̧danö ökwödö 'dö̧ibaji̧ möle ju̧kwadönö ba̧ja̧dakwawa baibanö tjiwȩyudinobe chömöledö.

¹² Ja̧danö, ajayinö ju̧kwadönö baledina omukwatö, baikwö wanedö yötawaduwakwö chömöledö: Aaa, juluwadösa, 'diinö waekwökönö ja̧dösa jö̧ba̧lö kwomukwataduwitjö̧ma, ö'wiakwawönö kwö̧jaduwo chömöledö, waekwö meköbaduwapji jö̧ba̧lö.

¹³ Ja̧danö chömöledö, nöinö baledobe otiwanö ja̧köbaduwojobö sulabenö ja̧köbaduwojobö jö̧ba̧lö. Ja̧danö, jejenö ökwödönö baledi̧ma, ju'wedö jojodönö baledi̧danö baledobe ökwödönöma. Ja̧danö, ökwödönö baledenama, Dios jö̧a̧linadanö ökwödönö pjaatakobe ja̧ baledi̧ma ökwödönö juluwapji jö̧ba̧lö chömöledö. Jau chömöledö, ja̧ jawa baledenama, ju'wibi Diosma ujulu iyobe ökwödönöma, kwo̧'wo̧ 'dibachibö waekwökönö kwöbaledaduwo jö̧ba̧lö.

O̧'wo̧ jawa ösödakwawatjö 'da̧bachibö kwö̧jaduwo jö̧ba̧lö Pablo yöawina wene

¹⁴ Chösödawö̧ chömöledö, yötawaja̧danö jo̧betjö̧, o̧'wo̧ jawa ösödakwawatjö 'da̧bachibö kwö̧jaduwo.

¹⁵ Waisadöja chömöledö, waisanö kwomukwataduwo jö̧ba̧lö. Jo̧kwajabetjö̧, baikwö labebö lobö yötawa, ja̧danö ökwödöma a̧ja̧kwö kwomukwataduwo, jweinö yötawojobö, ö'öbönö yötawojobö jö̧ba̧lö chömöledö.

¹⁶ Baikwö wanedö yötawa: Ökwödö Cristonö ösödadöma jo̧ba midawö woina omukwatö, dowobe, ¿jö̧tö? Jau chömöledö, otiwanö iyinobe Diosma jö̧ba̧lö, Cristo midawö woina omukwatö dowobe. Jejenö owö, okobe deinö owadöma bakobe Cristo ökwösobu dowobedanö ichejekwa, ¿jö̧tö? Ja̧danö, Cristo midawö woina omukwatö, pan 'delawö dukwenama, bakobe Cristo iteba'o dukwobedanö ichejekwa, ¿jö̧tö?

¹⁷ Jejenö bakwapja̧tjö bakobe dukwobetjö̧, ba̧jekwadö dö̧jijayonö bakwa'o badibobedanö ichejekwa, okobe deinö bakobe bakwapja̧tjöda dukwobetjö̧.

¹⁸ Ja̧danö, baikwö wanedö yötawa Israel jojodönö: Jobadöma Diosnö iyawo̧nö kwabö juwö Diosnö tjiyenama, bakobe iyawo̧nö juwöbi Diosnö tjiyobe, ja̧danö kwanöbi, iteba'otjö tjukwobe. Jejenö iyawo̧nö kwanö, Diosnö ösödö bakobe jo̧bakwö tjukwobedanö ichejekwa, Diosnö iyawo̧nö jobadöbi tjukwobetjö̧, ¿jö̧tö? O̧'wo̧ jawa iyawo̧nö kwadöbi ja̧danö chömöledö, o̧'wo̧ jawa iyawo̧nö tjukwobetjö̧, jobadöbi o̧'wo̧ jawa tjösödobedanö ichejekwa chömöledö.

¹⁹ Chömöledö, jejenö yöba̧lö, Aaa, o̧'wo̧ jawa iyawa kwakwawama suli̧ waekwobe jö̧ba̧lö yöta̧lökö, ja̧danö o̧'wo̧ jawama isabenö Diosbo̧ jö̧ba̧lö yöta̧lökö.

²⁰ Baikwö yötawa: Diosnö öpöjödadö o̧'wo̧ jawa tjiyenama, Awetja ömöayedö sulabedö ángelesbedönöda iyadö, Diosnöma iyöködö chömöledö. Ja̧danö, o̧'wo̧ jawa iyawa kwakwawa kwukwaduwenama, jobadö sulabedö ángelesdönö ösödö bakobe kwukwaduwobe ichejekwa. Jobadökwö bakobe bakibaduwa jö̧ba̧lö, o̧'wo̧ jawa iyawa kwukwaduwa jö̧ba̧lö yötawobe chömöledö.

²¹ Jau chömöledö, baikwö wanedö yötawa: Ökwödö Duluwo̧ midawö woina omukwatö owadöma, sulabedö ángelesdönöbi ösödö kwowaduwoböma jwiobe chömöledö. Ja̧danö, ökwödö Duluwo̧ midawö woina omukwatö kwadöma, sulabedö ángelesdönöbi ösödö kwukwaduwoböma jwiobe chömöledö.

²² Chömöledö, jejenö ja̧bö Duluwo̧ ökwödönö ödameakwo jö̧ba̧lö ja̧dena ichejekwa, ökwödönö ö'wiabinö edo jö̧ba̧lö. ¿Dakwö kwomukwataduwa chömöledö? ¿Ökwödöma Duluwo̧nötjö o̧penönö juluwadödobeji̧, jejenö wene jwiinö ja̧do jö̧ba̧lö? Juluwöködösa chömöledö.

Kwakwawa jawa Pablo yöawina wene

²³ Chömöledö, ju'wedö Jesúsnö ösödadöma, Aaa, okobe jwiinö ja̧awama wene jwiinö ja̧dena jö̧ba̧lö yötja̧lobe. Baikwö yötawa: Jejenö ji̧jayonö, okobe jwiinö ja̧awa ja̧doböma otiwökö chömöledö. Ja̧danö, okobe jwiinö ja̧dobö ji̧jayonö, ökwödönö pjaatökena ja̧di̧ma.

²⁴ Ja̧danö, ökwödöda kwösödaduwi̧dama kwisakwaduwoko chömöledö, ju'wedönöbi omukwatö kwö̧jaduwo, jobadönö pjakataduwo jö̧ba̧lö.

²⁵ Ja̧danö, baikwö yötawaduwakwö chömöledö: Kwakwawa emö kwi̧'yaduwenama, okobe jwiinö itebiya tjiyi̧ma wene jwiinö emö kwukwaduwena. Jau chömöledö, kwemaduwenama, kwomajadenö Aaa, ¿biya̧ma o̧'wo̧ jawa tjiyinaji̧? jö̧ba̧lö omukwatökönö, wene jwiinö emö kwukwaduwena.

²⁶ Dios iwenema baikwö laebobe chömöledö: Böjȩbi, okobe jwiinö böjȩnö ji̧bi Duluwo̧ jawadaobe, jö̧ba̧lö laebobe. Ja̧danö, okobe jwiinö Duluwo̧ jawaobetjö̧, domajadenö sulabenö omukwatökönö dukwena.

²⁷ Ja̧danö, bakwo̧ ina Jesúsnö ösödö̧kö̧ ökwönö jo̧bakwö kwukwobö a̧debenama, kwösöditjö̧ma jo̧bakwö kwanö kwi̧'yo. Ja̧danö, okobe jwiinö ökwönö iyi̧ma, Aaa, biya̧ma detjö ichinajö, o̧'wo̧ jawa iyawaji̧ jö̧ba̧lö abebö a̧ja̧kwökönö, wene jwiinö kwukwo. Jau chömöledö, kwomajadenö biya̧ma o̧'wo̧ jawa iyawaji̧ jö̧ba̧lö omukwatökönö okobe jwiinö iyi̧ma kwukwaduwo.

²⁸ Jo̧kwaijayonö, bakwo̧ ökwönö Aaa, biya̧ma o̧'wo̧ jawa tjiyina jö̧ba̧lö yöawitjö̧ma, jejenö yöawobetjö̧ kwukwaduwoko, jo̧ba yöbawajo̧nö omukwatö, ja̧danö jo̧ba omajadenö omukwati̧ omukwatö kwukwaduwoko.

²⁹ Jau chömöledö, ökwöda kwomajadenö sulabenö kwomukwatapji jö̧ba̧löma kwukwoko jö̧ba̧lö yöta̧lökö, ökwönö yöbawajo̧da omajadenö sulabenö omukwatapji jö̧ba̧lö, kwukwoko. Jau chömöledö, ötjöma wene jwiinö chukwobö jo̧be, jo̧kwaijayonö ötjönö sulabenö tjomukwatapji jö̧ba̧lö chukwökena.

³⁰ Ja̧danö otiwanö kwiyinobe jö̧ba̧lö Diosnö ösödö chukwobetjö̧, wene jwiinö chukwobö jo̧be chömöledö, jo̧kwaijayonö ju'wedö ötjönö sulabenö tjomukwatapji jö̧ba̧lö chukwökena chömöledö.

³¹ Jau chömöledö, baikwö yötawa kwomukwataduwo jö̧ka̧laduwi̧ma: Kwukwaduwi̧bi, kwowaduwi̧bi okobe jwiinö ju'wi jaye ja̧köbaduwi̧bi, okobe deinö otiwanö Diosnö tjomukwato jö̧ba̧lö kwisakwaduwo chömöledö.

³² Ja̧danö, ja̧bö kwö̧ji̧ma, okobe deinö judío jojodöbi, judío jojodöböködöbi, Dios ömöledöbi ökwödönö sulabenö ja̧badö jö̧ba̧lö öpöjödö tjomukwatapji jö̧ba̧lö, ja̧bö kwö̧jaduwo.

³³ Jau chömöledö, ötjö ja̧bö chö̧ji̧danö ja̧bö kwö̧jaduwo. Ötjöma okobe jwiinö ja̧bö chö̧ji̧ma, okobe deinö jojodö tjösödo jö̧ba̧lö, ja̧bö chö̧jobe chömöledö. Ja̧danö, ötjöda otiwanö chö̧jakwa̧ chomukwatökö chömöledö, ju'wedö otiwanö tjö̧jakwa̧ chomukwatobe, jobadöbi tjö̧jibo jö̧ba̧lö.