1 Corintios 1 - Dios Iwene

Pablo Corintio jojodönö iwȩyudina'ye ajayisa'yetjö ajayi jawa

¹ Ötjöma Pablo mikwo̧sa, ja̧danö Diosda iteda ösödi̧danö ötjönö jwöinobe, Cristo Jesús webawo̧ batibobö. Ja̧danö, döjawo̧ Sósteneskwö ja̧nö böja kwialusöja chiwȩyudobe

² ökwödö Dios ömöledö Corintionö ko̧ko̧kwö ba̧jadönö. Ökwödönö Diosma jwöinobe, ja̧danö omudawö ujuninobe, iteda ömöledö bakibaduwobö. Jau chömöledö, ökwödöbi, okobe deinö ju'wedö Duluwo̧ Jesucristonö ösödadöbi, Duluwo̧ma bakwo̧da, Jesucristoda. Ja̧danö, Cristo Jesúskwö bakobe dötewinö ja̧nö, Dios ömöledöbedösa chömöledö.

³ Chömöledö, ökwödönöma Dabe'do Diosbi, Duluwo̧ Jesucristobi lȩlö̧jinö tjedobö chösöda ötjöma chömöledö, ja̧danö kwo̧'wo̧ luwo̧duwi ösöwachibanö kwö̧jaduwobö pjatjatobö chösöda.

Diosnö ösödö atebobe ökwödönö Pablo yöawina wene

⁴ Chömöledö, Diosma ökwödö Corintio jojodötjö Cristo Jesúskwö dötewadönö kwo̧'wo̧ luwo̧duwi jawa otiwa jawa iyinobe, ja̧danö ökwödö Corintio jojodönö jejenö iyinobetjö̧, jo̧banö ba̧kwȩlö̧jatebö yötawobe, otiwanö iyo̧ja jö̧ba̧lö.

^5-6 Diosma isabenö öwaetjöda ökwödö kwö'da̧deduwitjö i̧sebinobe, Cristo jawa wenema, isabenö wene jö̧ba̧lö chömöledö. Cristokwö dötewinö kwuju̧kwaduwobetjö̧, Diosma isabenö okobe jwiinö otiwa jawa iyinobe ökwödönöma, okobe jwiinö yöawakwawabi yökawaduwobö, ja̧danö okobe jwiinö waisakwawabi kwöwaisaduwobö.

⁷ Jau chömöledö, okobe jwiinö ja̧bö tjö̧jo jö̧ba̧lö Dios iteda i̧tji̧munö iyi̧ma, Diosma ökwödönö iyinobe, ja'yubebi junibökönö. Jo̧kwajabetjö̧, Duluwo̧ Jesucristo yemidanö ichakwa̧ möle badekwachobö te'ada̧lö kwö̧jaduwonö, okobe jwiinö ja̧ jawa juna̧ladöja.

⁸ Ja̧danö, jo̧ba Duluwo̧ Jesucristoda kwujuluwaduwachibanö pjaatakwo̧, 'diinö jweinö ja̧nö kwö̧jaduwobö 'dö̧ibaji̧ möle baibenanö kabatö. Ja̧danö jejenö pjaatobetjö̧, Jesucristo ichakwa̧ möle badekwachenama, Jesucristo öba a'otjö wene jwiinö kwuju̧kwaduwakwedöja.

⁹ Jau chömöledö, Diosma ba̧kwȩlö̧jatebö jö̧a̧li̧danö ja̧bo̧. Ja̧danö, Diosda ökwödönö jwöinobe jo̧ba itji̧kwö Duluwo̧ Jesucristokwö bakibaduwobö.

Bakwo̧nöda kwösödaduwobetjö̧, ölakwabikwawö 'da̧bachibö kwö̧jaduwoböma jwia jö̧ba̧lö Pablo yöawina wene

¹⁰ Chömöledö, Duluwo̧ Jesucristo iminö wetaduwakwö bakwainö omukwatö kwö̧jaduwobö, ja̧danö kwömöledö Jesúsnö ösödadökwö ölakwabikwawa jwiinö kwö̧jaduwobö. Jau chömöledö, ju'wedö kwömöledö Jesúsnö ösödadökwö bakobe ja̧nö, isabenö bakwainö omukwatö, ja̧danö bakwainö ösödö kwö̧jaduwo.

¹¹ Jau chömöledö, jejenö yöta̧lobe ökwödönöma, Cloé jömöledötjö ökwödönö cha̧ja̧kwinobetjö̧, Corintio jojodö Jesúsnö ösödadöma ölakwabikwawö wainökwena 'da̧bachibadö jö̧ba̧lö.

¹² Baikwö yöta̧la ölakwabikwawö yöka̧laduwi̧ma, okobe deinö wainökwena yöba̧ladöja chömöledö. Ökwödötjö ju'wedöma yötja̧lobe: Aaa, ötjöma Pablo ömöayo̧sa jö̧ba̧lö. Ja̧danö ju'wedöma: Aaa, ötjöma Apolos ömöayo̧sa jö̧ba̧lö. Ja̧danö ju'wedöma: Aaa, ötjöma Pedro ömöayo̧sa jö̧ba̧lö. Ja̧danö ju'wedöma: Aaa, ötjöma Cristo ömöayo̧sa jö̧ba̧lö.

¹³ Chömöledö, Cristoma bakwo̧daobetjö̧, itedatjö 'da̧bachibö ö̧jobö jwia, ja̧danö iteda ömöledöbi 'da̧bachibö tjö̧jobö jwia chömöledö. Ja̧danö, baikwö abebö cha̧ja̧kwaduwakwö: ¿Ötjö Pabloda kwö̧jibaduwobö towisa'onö ja̧nö midawö wotinaji̧? Ja̧danö ökwödönö ojwenö tjubu̧datenama, ¿ötjö Pablo chiminö ojwenö tjubu̧datinaji̧? Ja̧maökö chömöledö.

¹⁴ Jau chömöledö, biya̧ wene jwöjwököbakwawaduwi̧ wene omukwatö, Diosnö ösödö yöta̧lobe, otiwanö pjakatinobe ötjöda Corintio jojodönö ojwenö chubu̧datapji jö̧ba̧lö. Jau chömöledö, ökwödötjö sule Crisponöda, ja̧danö Gayonöda ojwenö chubu̧datijatö.

¹⁵ Ja̧danö, jejenöobetjö̧, Aaa, Pabloma iteda iminö ubu̧datinobe jö̧ba̧lö kwomukwataduwoböma jwiobe, ötjöma ökwödönö chubu̧datinokobetjö̧.

¹⁶ Aaa chomukwatiba chömöledö, ökwödötjö Estéfanasnöbi, Estéfanas ömöledönöbi ojwenö chubu̧datijatö, jo̧kwaijayonö chedemi jobadönöda.

¹⁷ Jau chömöledö, ojwenö chubu̧dato jö̧ba̧löma weinokobe Cristoma, otiwa jawa wene yötawo jö̧ba̧lö weinobe ötjönöma. Ja̧danö, ja̧ otiwa jawa wene yötawenama, böjȩ jojodö waisanö yötjawi̧danö yötawoböma weinokobe, waisanö yötawi̧da tjo̧'wo̧ tjöwana̧lapji jö̧ba̧lö. Jau chömöledö, waisanö yötawi̧da tjo̧'wo̧ tjöwana̧litjö̧ma, yötawi̧ wene okwa jawa Cristo towisa'onö midawö woina wenema tjomukwatökena, ja̧danö ja̧ juluwi̧ wenema, juluwökö wenedanö ichejekwena.

Cristo towisa'onö midawö woina wenema isabenö juluwi̧ wene jö̧ba̧lö Pablo yöawina wene

¹⁸ Jau chömöledö, Dios lȩebi̧tjö tjemakwedöma, Cristo towisa'onö woina wenema tjöpöjödobe, waisakwawa jwii̧ wene jö̧ba̧lö. Jo̧kwaijayonö ökwödö Dios lȩebi̧tjö ji̧badöma Cristo towisa'onö midawö woina wene dösöda, Dios ujulu ji̧ wene jö̧ba̧lö.

¹⁹ Baikwö laebobe Dios iwenesa'da chömöledö, Dios böjȩ jojodönö yöawinama: Böjȩ jojodö waisadö tjöwaisi̧ma söbebö lotocha. Ja̧danö waisanö omukwatadö tjomukwati̧ma waekwobö ja̧tocha, jö̧ba̧lö laebobe Dios iwene.

²⁰ Ja̧danö, jejenöobetjö̧, böjȩ jojodötjö waisadöma, ¿isabenö waisadötjobeji̧? Ja̧danö, nöinö waisachadöma ¿isabenö waisadötjobeji̧? Ja̧danö, nöinö ba̧nö yöa̧lakwawa luwedöma, ¿isabenö waisadötjobeji̧? Jobadöma isabenö waisadömaökö chömöledö. Diosma baikwö i̧sebinobe chömöledö, böjȩ jojodö: Aaa, biya̧ma waisakwawa ji̧ jö̧ba̧lö tjomukwati̧ma, isabenö waisakwawa jwii̧ jö̧ba̧lö.

²¹ Jau chömöledö, Diosma iteda waisanö omukwati̧ma i̧sebobe, baikwö yötawa. Böjȩ jojodö idöda waisanö tjomukwati̧ omukwatö Diosnö tjöwaisachibinokobe, ¿jö̧tö? Ja̧danö, böjȩ jojodö tjedemi, yödawi̧ wene Jesús midawö woina wenema waisakwawa jwii̧ wene jo̧be, ¿jö̧tö? Jo̧kwaijayonö Diosma waisanö omukwatö, ja̧ Jesús midawö woina wene ösödadönöda dö̧jibinö ja̧bo̧ chömöledö.

²² Jau chömöledö, judío jojodöma jojodö edajitjökö ujulu jawa i̧sekwada abebadö, ja̧danö judío jojodöböködöma waisakwawada isakwadö.

²³ Jo̧kwaijayonö ökwödö yödawi̧ wenema biya̧da, Cristo midawö woina weneda. Ja̧ wenema judío jojodö tjöpöjödobe, suli̧ wene jö̧ba̧lö, ja̧danö judío jojodöböködö tjöpöjödobe waisakwawa jwii̧ jö̧ba̧lö.

²⁴ Jo̧kwaijayonö, Dios jwöinawö̧ma, judío jojodötjöbi, judío jojodöböködötjöbi Dios jwöinawö̧ma, döpöjödokobe ja̧ wenema. Ökwödönö ja̧ Cristo jawa wenema Dios ujulu i̧sebobe, ja̧danö Dios waisanö omukwati̧ i̧sebobe.

²⁵ Jau chömöledö, baikwö yötawa: Dios omukwati̧ waisakwawa jwii̧danö ichejekwi̧ma, jojodö tjöwaisi̧tjö o̧penönö waisakwawa ji̧. Ja̧danö Dios ujulu jwii̧danö ichejekwi̧ma, jojodö tjujuluwi̧tjö o̧penönö juluwi̧ ji̧.

²⁶ Jau chömöledö, ökwödö kwö̧jaduwi̧ jawa baikwö wanedö yötawa: Ökwödö Corintionö ju̧kwadötjö Dios iteda ömöledö bakibaduwobö jwöinawö̧tjöma, ja'yubenöda bidöma waisadö jö̧ba̧lö tjomukwato jö̧tja̧linobe böjȩ jojodöma, ¿jö̧tö? Ja̧danö, ökwödötjö ja'yubenöda bidöma juluwadö jö̧ba̧lö tjomukwato jö̧tja̧linobe böjȩ jojodöma, ¿jö̧tö? Ja̧danö, ökwödötjö ja'yubenöda bidöma luwedö jö̧ba̧lö tjomukwato jö̧tja̧linobe böjȩ jojodöma, ¿jö̧tö?

²⁷ Jo̧kwaijayonö, Diosma böjȩ jojodö wajwibadö jö̧ba̧lö ötjabiwö̧nö omudawinobe, waisadö ötjabiwö̧ tabakwö tjö̧jakobetjö̧. Ja̧danö, böjȩ jojodö juluwöködö jö̧ba̧lö ötjabiwö̧nö omudawinobe Diosma, juluwadö ötjabiwö̧ tabakwö tjö̧jakobetjö̧.

²⁸ Jau chömöledö, böjȩ jojodö, Aaa, bidöma sulabedö, döpöjödawö̧, mikwawöködö jö̧ba̧lö jojodö tjomukwatawö̧nö omudawinobe Diosma. Jau chömöledö, jobadönö omudawinobe Diosma. Ja̧danö jojodö, Aaa, bidöma inesö otiwadö, luwedö jö̧ba̧lö tjomukwatawö̧nö mikwawöködö batjibanö ja̧inobe.

²⁹ Jejenöobetjö̧ bakwo̧bi deakobe Dios öba a'otjö ja̧nö, Aaa, ötjöma otiwo̧sa jö̧ba̧lö yöa̧lakwo̧ma.

³⁰ Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

³¹ Jejenöobetjö̧, Dios iwene laebi̧danö jo̧be. Dios iwenema baikwö laebobe: Bakwo̧ otiwo̧nö yöawobö jö̧ba̧lo̧ma, Duluwo̧ jawada yöawobö jo̧be, Duluwo̧ma otiwo̧ jö̧ba̧lö.