Zakkaariyaasa 6 - Wolaytta Bible

Zakkaariyaasi Ajjuutan Oiddu Paraa Gaareta Be7iis

¹ Qassikka taani xoqqu gaada xeellaas; xeelliyo wode oiddu paraa gaareti naa77u deretuppe gidduwaara yiyaageeta be7aas; deretikka qassi nahaase giyo birataa dereta.

² Koiro paraa gaariyaa daama parati goochchoosona; naa77antto paraa gaariyaa karetta parati goochchoosona;

³ heezzantto paraa gaariyaa bootta parati goochchoosona; oiddantto paraa gaariyaa bure parati goochchoosona.

⁴ Taani tanaara haasayiya kiitanchchaa, “Ta godau, hageeti aibee?” yaagada oichchaas.

⁵ Oichchin kiitanchchai, “Hageeti sa7a ubbaa Godaa sinttan eqqidosaappe kiyiya oiddu saluwaa carkkota.

⁶ Karetta parati goochchiyo gaaree huuphessa bagga biitti bees; bootta parati goochchiyo gaaree arggo baggi bees; bure parati goochchiyo gaaree qassi tohossa baggi bees” yaagidi zaariis.

⁷ He parati kiyido wode, biitta ubbaa yuuyidi xomoosanau paachchuroosona. Kiitanchchai eta, “Biite, biidi biitta ubbaa yuuyidi xomoosite” yaagiis. Yaagin eti biitta ubbaa yuuyidi xomoosidosona.

⁸ Hegaappe guyyiyan, kiitanchchai ba qaalaa xoqqu ootti taakko waassidi, “Be7a, huuphessa bagga biitti biida parati bantta biido huuphessa bagga biittan GODAA Ayyaanaa shemppissidosona” yaagiis.

Yaasussi Giigida Kallachchaa

⁹ GODAA qaalai taakko, qassikka hagaadan yaagiiddi yiis;

¹⁰ “Baabiloone omooduwaappe simmida Helddaayi, Xoobbeenne Yadaayi immiyo imotaa ekka; ekkada he gallassikka Xafaaniyaa na7aa Yoosiyaasa soo ba.

¹¹ Etappe ekkido biraappenne worqqaappe kallachchaa medhdha; medhdhada Yoxedeeqa na7aa, qeese ubbatu halaqaa Yaasu huuphiyan wotta.

¹² Wottada ayyo, 'Ubbaappe Wolqqaama GODAI hagaadan yaagees; “Be7a, a sunttai Tashiyaa geetettiyo issi bitanee ba de7iyoosan diccana; diccidi i GODAA Beeta Maqidasiyaa keexxana.

¹³ GODAA Beeta Maqidasiyaa keexxanaagee a; i kawodan bonchchuwaa maayidi, ba kawotaa araatan uttananne haarana. Qassi a araataa miyyiyan issi qeesee eqqana; eta naa77aa giddonkka issippetettai de7ana” yaagees' yaaga.

¹⁴ He kallachchai Helddaaya, Xoobbiyaa, Yadaayanne Xafaaniyaa na7aa Yoosiyaasa hassayissiyaabaa gididi, GODAA Beeta Maqidasiyan de7ana” yaagiis.

¹⁵ He wode haahosan de7iyaageeti GODAA Beeta Maqidasiyaa keexxidi maaddanau yaana. Ubbaappe Wolqqaama GODAIKKA tana inttekko kiittidoogaa intte hegan erana. GODAASSI, intte Xoossaassi, intte polo azazettikko, hegee hanana.