Zakkaariyaasa 5 - Wolaytta Bible

Zakkaariyaasi Ajjuutan Xaaxetti Uttida Maxaafaa Be7iis

¹ Qassikka taani xoqqu gaada xeelliyo wode, issi xaaxetti uttida maxaafai bollaara paalliyaagaa be7aas.

² Kiitanchchai tana, “Ha neeni be7iyoogee aibee?” yaagidi oichchiis. Oichchin taani, “Taani issi xaaxetti uttida paalliya maxaafaa be7ais; ayyo zananai laatamu wara; gomppaikka tammu wara” yaagaas.

³ Yaagin i tana hagaadan yaagiis; “Ha xaatta maxaafaa giddon de7iyaagee biitta ubbaa bollan yiya qanggettaa. He maxaafan issi baggaara, 'Wuuqqiya ubbi biittaappe xayana' yaagiyaagee xaafettiis; qassi hinkko baggaara, 'Wordduwan caaqqiya ubbi xayana' yaagiyaagee xaafettiis.

⁴ Ubbaappe Wolqqaama GODAI hagaadan yaagees; 'Taani he qanggettaa kiittana; kiittobare i biidi, kaisuwaa soonne ta sunttan wordduwan caaqqiyaagaa soo gelana; gelidi yan de7iiddi, he keettaa i keexettido mittaaranne shuchchaara gattidi, mi xaissana' yaagees” yaagiis.

Zakkaariyaasi Ajjuutan Keeshe Giddon Uttida Maccaasiyo Be7iis

⁵ Hegaappe guyyiyan, he tanaara haasayiya kiitanchchai taakko yiidi, “Ane xoqqu gaada, ha yiyaabai aibakko be7a” yaagiis.

⁶ Yaagin taani, “I aibee?” yaagada oichchaas. Oichchin i zaaridi, “Hagee makkiyo keeshiyaa” yaagiis. Qassikka gujjidi, “Hagee asai ha biitta ubban oottido naaquwaa malaataa” yaagiis.

⁷ Irssaasiyaa giyo birataappe oosettida keeshiyaa qum77oi pogettiis; pogiyo wode issi maccaasiyaa keeshe giddon uttidaaro be7aas.

⁸ Kiitanchchai taayyo odiiddi, “Hanna Iitatettiyo geetettausu” yaagiis. Yaagidi o guyye keeshe giddo naaqqi gelissidi, irssaase qum77uwaakka duge naaqqidi, keeshiyaa qum77iis.

⁹ Hegaappe guyyiyan, taani xoqqu gaada xeelliyo wode, eta qefiyan carkkoi de7iyo naa77u maccaasati yiyaageeta be7aas; eta qefee qoolliyaa qefiyaa mala. Eti he keeshiyaa sa7aappenne saluwaappe gidduwau pude denttidosona.

¹⁰ Yaatin, taani tanaara haasayiya kiitanchchaa, “Hageeti keeshiyaa au efiyoonaa?” yaagada oichchaas.

¹¹ Oichchin i, “Eti ayyo eeqa keettaa keexxanau Baabiloone biitti efoosona; keettai keexettido wode, eti he keeshiyaa ayyo giigida sohuwan wottana” yaagiis.