Zakkaariyaasa 4 - Wolaytta Bible

Zakkaariyaasi Ajjuutan Xomppiyaa Wottiyo Ballaa Be7iis

¹ Hegaappe guyyiyan, tanaara haasayida kiitanchchai simmidi yiidi, xiskkida asa beegottiyoogaadan, tana beegottiis.

² I tana, “Neeni be7iyoogee aibee?” yaagiis. Yaagin taani, “Taani worqqa xalaalaappe oosettida xomppiyaa wottiyo ballaa be7ais; a xeeran zaitiyaa xaaroi de7ees; qassi a bollan laappun xomppeti de7oosona; he laappun xomppetussikka laappun laappun shappoti de7oosona.

³ He xomppiyaa wottiyo ballaa matan naa77u wogarati de7oosona; eti zaitiyaa xaaruwaappe ushachcha baggaaranne haddirssa baggaara de7oosona” yaagaas.

⁴ Taani tanaara haasayiya kiitanchchaa qassikka, “Ta godau, hageeti aibee?” yaagada oichchaas.

⁵ Oichchin tanaara haasayiya kiitanchchai zaaridi, “Hageeti aibakko erikkii?” yaagiis. Yaagin taani, “Ta godau, taani erikke” yaagaas.

GODAI Zarubaabeelassi Odido Qaalaa

⁶ Qassikka i, “Zarubaabeelassi GODAI odido qaalai hagaa; 'Ta Ayyaanaanappe attin, wolqqan woikko minotettan gidenna. Taani Ubbaappe Wolqqaama GODAI hagaa odais.

⁷ Laa gita deriyau, neeni aibee? Neeni Zarubaabeela sinttan lichchi giida dembba gidana. Qassi Zarubaabeeli Beeta Maqidasiyaa keexxi polidi, wurssetta shuchchaa pude kessiyo wode asai, “Hashshu! Hashshu polettes!” yaagana' yaagees” yaagiis.

⁸ Qassikka GODAA qaalai Zakkaariyaasakko yiis.

⁹ Yin Zakkaariyaasi hagaadan yaagiis; “Ha Beeta Maqidasiyaa baasuwaa Zarubaabeela kusheti baasidosona; qassi poluwaakka a kusheti keexxidi polana. Hegaappe guyyiyan, Ubbaappe Wolqqaama GODAI tana inttekko kiittidoogaa intte erana.

¹⁰ Ha guutta doomettaa kariya ooninne digin ufaittana; qassi eti Zarubaabeela kushiyan tumbbiyaa be7ana. Hageeti laappun xomppeti biitta ubbaa yuuyidi xeelliya GODAA aifeta” yaagiis.

¹¹ Yaagin taani kiitanchchaa zaarada, “Ha xomppiyaa wottiyo ballaappe ushachcha baggaaranne haddirssa baggaara de7iya ha naa77u wogarati aibee?” yaagada oichchaas.

¹² Taani naa77anttuwaakka, “Ha zaitee etappe goggiyo naa77u worqqaa bombbatu matan de7iya naa77u wogaraa tashetikka aibee?” yaagada oichchaas.

¹³ Ikka zaaridi, “Hageeti aibakko neeni erikkii?” yaagiis. Taanikka, “Ta godau, taani erikke” yaagaas.

¹⁴ Yaagin i zaaridi, “Hageeti sa7a ubbaa Godaassi oottiya, naa77u tiyettida asata” yaagiis.