Uruti Maxaafaa 1 - Wolaytta Bible

Elimeleekinne A So Asainne Moo7aaba Betidosona

¹ Israa7eela biittaa daannati haariyo wode, he biittan koshai denddiis. Denddin issi bitanee ba machcheeranne ba naa77u naatuuranne Yihudaa biittan Beetaliheeme katamaappe denddidi, Moo7aaba biitti betiis.

² He bitaniyaa sunttai Elimeleeka; a maccaasee sunttai Naa7oomo; a naa77u naatu sunttai Mahiloonanne Keliwoonanne. Eti Yihudaa Beetaliheemen de7iya Efiraata yara. Hegeeti Moo7aaba biidi yan de7idosona.

³ De7ishin Naa7oomi azinai Elimeleeki haiqqiis. Haiqqin a ba naa77u naatuura attaasu.

⁴ He naati Moo7aaba biittaa macca naatuppe Orpponne Urutonne geetettiyaageeta machcho ekkidosona. Ekkidi hegan tammu laitta gidiyaagaa uttidi,

⁵ Mahilooninne Keliwooninne naa77aikka haiqqidosona. Naa7ooma ba keettaawaikka ba naa77u naatikka haiqqiichchin barkka attaasu.

Naa7ooma Urutiira Beetaliheeme Simmaasu

⁶ A Moo7aaban de7aidda, GODAI ba asaa Israa7eela maaridi, kattaa etayyo gattidoogaa siyaasu. Siyada Moo7aaba biittaappe simmanau ba naatu maccaasatu naa77aara denddaasu;

⁷ ba naatu maccaasatu naa77aara issippe ba de7iyoosaappe kiyaasu. Kiyin eti guyye Yihudaa biitti efiya ogiyan gelidosona.

⁸ Gelin Naa7ooma ba naatu maccaasata, “Simmite; intte ubbaikka intte aayee soo aayee soo biite. Intte haiqqidaageetussinne taassinne kehidoogaadan, GODAI intteyyo keho.

⁹ Intte huuphiyan huuphiyan geliyo hara azinatu son GODAI woppaa immo” yaagaasu; yaagada eta yeraasu. SHin eti bantta qaalaa xoqqu oottidi yeekkiiddi,

¹⁰ “Nuuni nenaara ne asaakko baana” yaagidosona.

¹¹ SHin Naa7ooma eta, “Hai ta naatoo, simmite. Intte tanaara aissi beetii? Intteyyo azina gidanau attuma naata taani hagaappe guyyiyan yelaneeyye?

¹² Ta naatoo, simmite; taani hara azina gelennaadan ceeggaichchaas. Woni taani yelana giyaakkonne, hachchi qammi ubba azina gelada, attuma naata yeliyaakkonne,

¹³ hegeeti dicci gakkanaashin naaguuteetii? Eta gishshau giiddi, azina gelennan atti agguuteetiiyye? Ta naatoo, hegee hanennabaa gidiyoogaa intte ereeta. GODAI tana tuggayido gishshau, inttena gakkidabai tana keehi michchees” yaagaasu.

¹⁴ Hegan eti bantta qaalaa xoqqu oottidi, haranttuwaakka yeekkidosona. Yaanin Orppa ba bollotiyo yera ekkada, simma aggaasu. SHin Uruta o baqqa oiqqada ixxaasu.

¹⁵ Naa7ooma o, “Be7a, ne keettaawaa ishaa machchiyaa ba asaakkonne ba xoossatukkonne simmaasu. Neenikka iira simmada ba” yaagaasu.

¹⁶ Uruta zaarada, “Taani neeppe shaahettanaadan woikko nena aggada guyye simmanaadan tana waayissoppa. Neeni biyoosaa awanne taani baana; neeni de7iyoosan awaaninne taani de7ana. Ne asai ta asaa gidana; ne Xoossai ta Xoossaa gidana.

¹⁷ Neeni haiqqiyoosan taani haiqqana; hegan moogetta aggana. Haiqoppe attin, harabai tana neeppe shaakkikko, GODAI tana woro” yaagaasu.

¹⁸ Uruta iira baanau ba qofaa qachchidoogaa Naa7ooma erada, co77u gaada agga bayaasu.

¹⁹ Hegaa gishshau, naa77u maccaasati Beetaliheeme gakkanaashin biidosona. Biidi eti Beetaliheeme gakkiyo wode, he katamaa asai ubbai etaban garamettiis. Qassi maccaasati, “Hanna Naa7oomii?” yaagidosona.

²⁰ A zaarada eta, “Tana, 'Naa7oomo' gooppite; 'Camettidaaree' giite. Aissi giikko, Ubbaa Danddayiya Xoossai ta de7uwaa daro camettiis.

²¹ Taani kumettan kiyada baas; shin GODAI tana mela zaariis. GODAI tana tuggayiis; Ubbaa Danddayiya Xoossai tanan palabaa gattiis. Yaatin, tana aissi Naa7oomee giidi xeeseetii?” yaagaasu.

²² Hegaadan hanada, Naa7ooma ba na7aa machchee Moo7aabee Urutiira simmaasu. Eti Beetaliheeme gakkidoi banggaa cahai doomettiyo wodiyaana.