Sofonaasa 2 - Wolaytta Bible

Nagaraa Paaxanaadan Hassayissiya Qaalaa

¹ Inttenoo, yeellai bainna asatoo, ane issippe shiiqiichchite!

² Carkkoi punnidi efiyo suullaadan beennan de7iiddi, yashshiya GODAA hanqqoi intte bolli wodhdhennan de7ishin, GODAA hanqquwaa suuluwaa gallassaikka intte bollan gakkennan de7ishin, GODAAKKO simmiichchite.

³ Inttenoo, biittan de7iya ashkketoonne a azazuwaa oottiya ubbatoo, GODAA koyite; xillotettaa koyite; qassi ashkketettaakka koyite. Yaatikko, ooni erii, GODAA hanqquwaa gallassi intte qosettidi attanaakkonne.

Israa7eela Yuushuwan De7iya Kawotettatu Kunddettaa

⁴ Gaaza katamai onana; Asqqaloona katamaikka baisa gidana; Ashddooda katamaa asai seeta gallassi goodettana; Eqiroona katamaikka xoqolettana.

⁵ Inttenoo, abbaa doonan de7iya Pilisxxeema asatoo, intteyyo aayye7ana! Nenoo, Pilisxxeemati de7iyo Kanaane biittau, GODAA pirddai ne bollan yees. Taani nena xaissana; nenan issi asinne attenna.

⁶ Abbaa doonan de7iya intte biittai mehiyaa heemmiyoosa, henttanchchati de7iyoosanne mehiyaa wudiyaa dirssa gidana.

⁷ Abbaa doonai Yihudaa asaappe attidaageetau laata gidana; hegan eti heemettana. Sa7ai qammiyo wode eti Asqqaloona kataman de7iya keettatun aqana; aissi giikko, GODAI eta Xoossai etabaa qoppana; i eta zaaridi ishalissana.

^8-9 Ubbaappe Wolqqaama GODAI, Israa7eela Xoossai, hagaadan yaagees; “Taani Moo7aaba asaa qilliicciyaanne Amoona asaa cashshaa siyaas. Eti ta asaa qilliiccidosona; eta zawaa bollankka otorettidosona. Hegaa gishshau, ta de7o sunttan caaqqais, Moo7aabi Sadoomadan hanana; Amoona asaikka Gamoora asaadan hanana. Eti merinau maxiniyaa bookkiyo ollanne agunttai maayido bazzo gidana. Ta asaappe attidaageeti eta aquwaa bonqqana; eta biittaakka laattana” yaagees.

¹⁰ Eti Ubbaappe Wolqqaama GODAA asaa bolli qilliiccidonne otorettidi haasayido gishshau, eta bolli ha metoi gakkana.

¹¹ GODAI etan yayettidaagaa gidana; biittan de7iya xoossata ubbaa i xaissana; qassi sa7an de7iya kawotettatun de7iya asai ubbai ba de7iyoosan de7iyoosan ayyo goinnana.

¹² Inttenoo, Toophphiyaa asatoo, inttekka ta bisuwan haiqqana.

¹³ I ba kushiyaa huuphessa baggi zaaridi yeddana; yeddidi Asoore biittaa xaissana. Qassi Nanawe katamaakka mela bazzodan, baisa soho oottana.

¹⁴ Mehiyaa wudeenne biittan de7iya do7ati ubbai a giddon allaxxana; guttoinne quxarssai a kolettida gimbbetu giddon de7ana; eta cenggurssai maskkootiyaaranne penggiyaara siyettana. Keettati keexettido zigai kallottana.

¹⁵ Ha katamai, “Tana! Taappe attin, harai baawa” yaagidi otorettiiddi de7idaagaa; shin i ha77i do7ati geessiyo baisa soho gidiis. A lanqqiyaara aadhdhiya ubbai daroppe garamettidi, bantta kushiyaa qaattiiddi, “Poora!” gaana.