Siiquwaa Sabaa 8 - Wolaytta Bible

¹ “Ne tau allaga gidennan taayee xanttaa xammida ta ishaa gidarkkiishsha! Yaatiyaakko taani nena ogiyan demmada shiishsha ekka yerin, tana ooninne borennashin.

² Taani nena kaalettada, taayee qol77o gelissaagin, hegan tana ne siiquwaabaa tamaarissidabaa gidarkkii; roomaaniyaa gum77ido mal77iyaagaa lo77iya woiniyaa eessaa taani nena hegan ushsharkkinaa.

³ Tana hegan ne haddirssa qeesiyaa borkkotissada, ne ushachcha kushiyan tana qoommidabaa gidarkkii.

⁴ “Inttenoo Yerusalaame geela7otoo, Siiqoi ba wodiyan denddanaashin, qaasetti denttennaadan, ta intteyyo hadara gais” yaagaasu.

Yerusalaame Geela7oti:

⁵ “Ba siiquwaa hashiyan zemppada, bazzoppe yiyaara hanna oonee?” yaagidosona. “Beni ne aayyiyaa nena bannakka yelido, appiliyaa lanqqiyan ne zin77idaashin, nena ta qaaserettada denttaas.

Geela7iyaa:

⁶ Merinaa siiquwan tana ne wozanaa bolli attama; ne qesiyankka maatafaadan, ta xallaa oiqqa. Aissi giikko, siiqoi haiquwaa mala mino; mishoikka duufuwaa mala meqettaa iita; a lacoikka Xoossaa tamaa lacuwaa mala.

⁷ Haattaa daroi siiquwaa tamaa toissanau danddayenna; di7oikka meeccidi efaanau danddayenna. Asi siiquwaa shammanau bau de7iya aqo ubbaa immikkokka, siiqoi miishshan shamettenna gishshau, asai hegaa karees” yaagaasu.

Geela7ee Ishati:

⁸ “Nuuyyo tiran xanttai uttibeenna michchiyaa de7ausu; azini o oichchikko, nuuni iyyo oottanabi aibee?

⁹ A gimbbe dirssa gidiyaakko, nuuni i bolli wochchiyo adussa, bira gimbbiyaa gimbbana; a dirssaa pengge gidiyaakko, zigaa xaulan o doodissana” yaagidosona.

Geela7iyaa:

¹⁰ “Hekko taani dirssa gimbbe; ta xanttaikka gimbbiyaa bolli gimbbettida wochchiyoosaa; hegaa gishshau, taani ta siiquwaara de7iyo wode, i tanan ufaittees.

¹¹ “Solomonassi Ba7aali-Hamoonan woinee tokettido shooqai de7ees; he woiniyaa gidduwaa oottiyaageetussi keraa immiis. Keraa ekkidaageeti teeran go7ettidoogaa gishshaa huuphiyan huuphiyan sha7u biraa ayyo ehoosona.

¹² SHin taayyo ta buzo woinee tokettido shooqai de7ees; Solomonaa, neeni sha7u biraa ekka; ataakilttiyaa oottiyaageeti naa77u xeetu biraa ekkona” yaagaasu.

Wodallai:

¹³ “Nenoo, ataakilttiyaa giddon de7iya ta siiqee, ne cenggurssaa laggeta sissanau koyoosona; ne cenggurssaa tana sissa” yaagiis.

Geela7iyaa:

¹⁴ “Ta siiquwau, taakko eesuwan haaya! Sawo maatai mokkiyo deretu bollaara, guppiya genessaa woikko wushaa marata milata” yaagaasu.