Siiquwaa Sabaa 7 - Wolaytta Bible

Wodallai:

¹ “Kawo na7adan lo77iyaaree! Ne gedeti neeni naxala caammaa wottidaashin be7iyo wode aiba lo77iyoonaa! Ne sheechchee eranchcha wogaacee qoxxidi, loitti alleeqissido inqquwaa milatees.

² Ne gul77ai woiniyaa eessai kumido birilliyaa milatees; ne xeessaa yuushoi ciishshan qashettida gisttiyaa mirqqiyaa milatees.

³ Ne naa77u xanttati mentte yelettida, genessee marata milatoosona.

⁴ Ne ziizzee danggarssaa zaaliyan alleeqettida adussa gimbbiyaa mala. Ne aifee gita Haseboona katamaa penggiyaa matan de7iya zeero haattaa milatees. Ne siiree Damasqqo xeelissidi gimbbido Liibaanoosa gimbbiyaa milatees.

⁵ Ne huuphee Qarmmeloosa Deriyaa milatees; ne lose binnaanai qacinaa xaattaa milatees; kawuwaakka ne huuphiyaa dattai ufaissiis.

⁶ Ta siiqee, ne aiba lo77ai! Ne aiba malanchchee! Ne siiqoi tana aiba ufaissii!

⁷ Ne geesai zambbaa geesaa milatees. Ne xanttai zambbaa aifiyaa wurccuwaa milatees.

⁸ Taani, 'Ha zambbaa gi77ana; gi77ada a marata oiqqana' yaagaas. Ne xanttai woiniyaa teeraa wurccuwaa mala; qassi ne siiriyaara kiyiya peenoi appiliyaa aifiyaadan sawees.

⁹ Ne yeroi menttershshatuppenne achchaappe gidduwaara yalalattiiddi geliya, ubbaappe aadhdhidi mal77iya woine eessaa mala” yaagiis.

Geela7iyaa:

¹⁰ “Taani ta al77o siiquwaaro; ikka tana amottees.

¹¹ Ta siiquwau, haaya; naa77ai katamaappe kiyidi biidi, gaxariyan aqoos; qammaa naa77ai hegan aattana.

¹² Maallado guuran ane woiniyaa turaa giddo boos; biidi woine turai ciyyidaakko, ciyyidi aifiyaa herxxexxidaakkonne, qassi roomaaneekka aifidaakko ane be7oos. Taani ta siiquwaa nena hegan bessana.

¹³ Inkkoyiyaa aifiyaa sawoinne hara ufaissiyaa ataakilttiyaa aifee nu karen bessiis; ta siiquwau! Ha aifetuppe teeridaageetanne ooratta maxidoogeeta neeyyo ashsha wottaas.