Siiquwaa Sabaa 3 - Wolaytta Bible

Geela7iyaa:

¹ “Qamma kumettaa ta hiixan zin77ada, ta siiquwaa demmanau amottaas; minttada koyaas; shin demmanau danddayabeikke.

² Katamaa giddon de7iya aahonne xuntta ogetu ubban yuuyaas; ta siiquwaa demmanau koyaas; minttada koyaas; shin demmanau danddayabeikke.

³ Katamaa yuuyi naagiyaageeti tana demmidosona; taanikka, 'Ta siiquwaa be7idetii?' yaagada eta oichchaas.

⁴ Etappe yaa kanttanne ta siiquwaa demmaagaas. I taappe kessi ekkennaadan, minttada oiqqaas; oiqqada taayee soo ekka efaas; ta yelettido kifiliyaa gelissaas.

⁵ Inttenoo Yerusalaame yelaga maccaasau, siiqoi bau dosidi denddana gakkanaashin, a intte beegottenna mala, taani inttena genessatuuninne bazzo wushatun callais” yaagaasu.

Yerusalaame Geela7oti:

⁶ “Hagee bazzoora yiyaagee, cuwaa tuussaa milatiyaagee, peenoikka zal77anchchaa ixaanaadaaninne karbbiyaadan sawiyoogee i aibee?

⁷ Hegaa be7ite, Solomona paraa gaaree yees; he paraa gaaree Israa7eelappe doorettida wolqqaamati, usuppun tammu tooranchchati ajabidosona.

⁸ Eti ubbaikka bisuwaa ohettaa meezetidaageetanne olankka paacettidaageeta. Qamman gakkana metuwaa eqettanau, eti issoi issoi bisuwaa gixxidi giigidaageeta.

⁹ Kawuwaa Solomoni paraa gaariyaa giddon baayyo uttiyo kawotaa araataa giigissiis. I araataa Liibaanoosa deriyaappe ehiido mittaappe ootissiis.

¹⁰ Araataa tuussati biran sheeshettidosona; gedee worqqan alleeqettiis; uttiyoosai Yerusalaame geela7oti ochchaa teeraa milatiya qacinan, siiquwan daddido afalan kamettiis” yaagidosona.

Geela7iyaa:

¹¹ “Inttenoo, Xiyoone geela7otoo, Kawuwaa Solomona be7anau haayite! I keehi ufaittido, a bullachchaa gallassi a aayyiyaa a huuphiyan wottido kallachchaa goxxi uttiis” yaagaasu.