Roome 14 - Wolaytta Bible

Asa Bolli Pirddennan Aggiyoogaa

¹ Ammanuwan azalliya uraa shiishshi ekkite. SHin i ba huuphen qoppiyooban aara palamettoppite.

² Issi ura ammanoi i ai miininne diggenna; shin ammanuwan azalliya urai gaden mokkidabaa xalaalaa mees.

³ Ubbabaa miya urai ubbabaa meenna uraa karoppo; ubbabaa meenna uraikka ubbabaa miya uraa bolli pirddoppo; aissi giikko, Xoossai a shiishshi ekkiis.

⁴ Hara asa ashkkaraa bolli pirddiyaagee neeni oonee? I kunddin woi denddin ba godaassa; shin Godai a denttanau danddayiyo gishshau, i eqqana.

⁵ Issi urai, “Hiqqa gallassai hara gallassatuppe aadhdhees” yaagidi qoppiyo wode, harai, “Ubba gallassatikka issi mala” giidi qoppees. Asai ubbai huuphiyan huuphiyan hegaadan aissi qoppiyaakko akeeko.

⁶ Issi gallassaa hara gallassatuppe aattidi bonchchiya urai Godaa bonchchuwau bonchchees; quma miya uraikka Godaa bonchchuwau mees; aissi giikko, i he qumaa gishshau, Xoossaa galatees; qumaa meennaageekka Godaa bonchchuwau meennan aggees; qassi Xoossaa galatees.

⁷ Aissi giikko, nuuppe ooninne ba huuphe xalaalau de7enna; qassi ooninne ba huuphe xalaalau haiqqenna;

⁸ nuuni paxa de7ikko, Godau de7oos; qassi haiqqikkokka, Godau haiqqoos. Simmi nuuni paxa de7in woi haiqqin Godaassa.

⁹ Hegaa gishshau, Kiristtoosi paxa de7iyaageetuyyoonne haiqqidaageetuyyo Goda gidanau haiqqidi, haiquwaappe denddiis.

¹⁰ Yaatin, neeni ne ishaa bolli aissi pirddai? Woikko neeni ne ishaa aissi karai? Nuuni ubbaikka Xoossaa pirddaa araataa sinttan eqqana.

¹¹ Aissi giikko, Xoossaa maxaafai, “ ‘Taani Godai ta de7uwan caaqqais; asai ubbai ta sinttan gulbbatana. Qassi taani Xoossaa gidiyoogaa asai ubbai markkattana’ yaagais” yaagees.

¹² Simmi nuuni huuphiyan huuphiyan nubaa Xoossau yootana.

Nagara Oosossi Gaaso Gidoppa

¹³ Hegaa gishshau, nuuni issoi issuwaa bolli pirddiyoogaa hagaappe sinttau ane aggoos. SHin ubbaappe aattidi, intte ishaa xubbiyaabaa woikko nagaran onggiyaabaa oottennaadan qofaa qachchite.

¹⁴ Taani Godaa Yesuus Kiristtoosaara de7iyoogan, ba huuphen tuna gididabi bainnaagaa eraisinne akeekais; shin issi urai issibaa tuna giidi qoppikko, hegee au tuna gidees.

¹⁵ Neeni miyoobaa gishshau, ne ishaa qohikko, simmi neeni siiquwan de7akka; Kiristtoosi a gishshau haiqqido asa ne miyo quman bashshoppa;

¹⁶ simmi neeni lo77obaa giyoobaa asi cayoppo.

¹⁷ Aissi giikko, Xoossaa kawotettai Geeshsha Ayyaanai immiyo xillotetta, sarotettanne ufaissa gidiyoogaappe attin, muussanne ushsha gidenna.

¹⁸ Aissi giikko, Kiristtoosayyo hagaadan oottiya urai ooninne Xoossaa ufaissees; asaikka a galatees.

¹⁹ Yaatikko, ane nuuni sarotetta ehiyaabaanne nuna issuwaa issuwaara minttettiyaabaa ubbaa koyoos.

²⁰ Xoossaa oosuwaa quma gishshau bashshoppa; quma ubbaa min aikko baawa; shin hara ura nagaran yeggiyaabaa miya urau iita.

²¹ Asho meennan woi ushsha uyennan aggiyoogee woikko ne ishaa xubbiyaabaa aibanne oottennan aggiyoogee lo77o.

²² Ha yohuwan neeni ammaniyoobaa neeppenne Xoossaappe gidduwan naaga. Issi urai lo77o giidi ba qoppidobaa oottiyo wode, “Taani mooraas” geennan aggikko, he urai tumu anjjettidaagaa.

²³ SHin i ba miyoobaa sirikko, a meettai ammanuwaana gidenna gishshau, Xoossai a bolli pirddiis; qassi ammanoi bainnan oottidobi aibinne nagara.