Roome 12 - Wolaytta Bible

Xoossai Oottanau Nuuni Waanidi De7anau Koshshii?

¹ Hegaa gishshau, ta ishatoo, intte intte asatettaa Xoossaa ufaissiya de7onne geeshsha yarshsho oottidi, Xoossau shiishshanaadan, taani inttena Xoossaa maarotettan woossais; Xoossau intte goinnanau bessiya tumu ogee hegaa.

² Xoossai intte qofaa muumeera dummayidi, inttena laammoppe attin, ha sa7aa asaa milatoppite; he wode intte Xoossai koyiyoobi, lo77obi, a ufaissiyaabinne qassi kumettabi aibakko erana.

³ Xoossai tau immido aaro kehatettan taani intteyyo yootais; intte qoppanau bessiyaagaappe aattidi, otoruwan qoppoppite; hegaa aggidi, wozannaama asadan qoppite; Xoossai intteyyo huuphiyan huuphiyan immido ammanuwaa keenan intte bolli pirddite;

⁴ nu issi bollaa giddon, daro bollaa qommoti de7oosona; he qommotu ubbaukka dumma dumma oosoi de7ees.

⁵ Hegaadan, nuuni daro asa gidikkokka, Kiristtoosa baggaara issi asa; qassi nuuni issi asatettaa qommotudan, issoi issuwaara oiqetti uttida.

⁶ Xoossai nuuyyo immido aaro kehatettan dumma dumma imoi de7ees; nu imoi Xoossaa qaalaa yootiyoobaa gidikko, nuuyyo de7iya ammanuwaa keenaa oottanau bessees;

⁷ oottiyoobaa gidikko, he oosuwan minnanau bessees; tamaarissiyoobaa gidikko, he tamaarissuwan minnanau bessees.

⁸ Harata minttettiyoobaa gidikko, he aani minnanau bessees; bau de7iyaabaappe haratuyyo immiya ooninne wozanappe immo; maati de7iyo urai mintti oottanau bessees; haratuyyo kehiya urai ufaissan kehanau bessees.

⁹ Intte siiqoi asa bessanau siiqettiyoobaa gidanau bessenna; iitabaa ixxite; lo77obaa minttidi oiqqite;

¹⁰ issoi issuwaara ishanttudan siiqettite; issoi issuwaa bonchchiyoogan ufaittite;

¹¹ minni oottite; azalloppite; intte kumetta wozanaappe Godau oottite.

¹² Xoossai intteyyo immana giidoogan ufaittite; waayiyan genccite; ubba wode Xoossaa woossite;

¹³ geeshshata koshshiyaaban maaddite; imattaa mokkite.

¹⁴ Inttena yedettiyaageeta anjjite; eta anjjanaappe attin, qanggoppite.

¹⁵ Ufaittiyaageetuura ufaittite; yeekkiyaageetuurakka yeekkite;

¹⁶ asa ubbau issi mala qofaa qoppite; oottiyoobaa ubban inttena toochchidi de7iteppe attin, otorettoppite; inttena intte huuphen aadhdhida eranchcha giidi qoppoppite.

¹⁷ Ooninne intteyyo iitabaa oottikko, he urau iitabaa ootti zaaroppite; asa ubbau lo77obaa oottanau qoppite.

¹⁸ Asa ubbaara sarotettan de7anau, intte baggaara, intteyyo danddayettidabaa ubbaa oottite.

¹⁹ Ta ishatoo, intte intte huuphen asau halo kessoppite. Xoossai a hanqquwaassi a aggiigite. Aissi giikko, Xoossaa maxaafai, “Godai, ‘Taani haluwaa kessana; taani kushiyaa zaarana’ yaagees” yaagees.

²⁰ SHin Xoossaa maxaafai, “Ne morkkee namisettikko, miza. Saamettikko, ushsha. Aissi giikko, neeni hegaa oottiyoogan a huuphiyan tamaa bonqquwaa qolana” yaagees.

²¹ Iitabaa lo77oban xoonappe attin, iitabai nena xoonoppo.