Mazamure Maxaafaa 98 - Wolaytta Bible

Mazamuriyaa

¹ GODAAYYO ooratta yettaa yexxite; aissi giikko, i maalaalissiyaabaa oottiis. A ushachcha kusheenne a geeshsha qesee ayyo xoonuwaa immiis.

² GODAI ba xoonuwaa erissiis; i ashshiyoogaa kawotettatau qonccissiis.

³ I Israa7eela so asaa siiqiyoogaanne etau ammanettiyoogaa hassayiis. Sa7aa gaxaa gakkanaassi de7iya asai ubbai nu Xoossaa xoonuwaa be7iis.

⁴ Sa7aa bollan de7iya asau ubbau, GODAAYYO ufaissan yexxite; qaalaa xoqqu oottidi, ufaissa sabaa sabbite.

⁵ Diittaa GODAAYYO diixxite; diittaaninne yettan GODAA sabbite.

⁶ Xurumbbaanne malkkataa punniiddi, ufaissan GODAA nu kawuwaa sinttan hombbocite.

⁷ Abbainne abbaa giddon kumidabai ubbai guummo. Sa7ainne sa7aa bollan de7iya ubbai yexxo.

^8-9 SHaafati issippe bantta kushiyaa baqqona. Qeeri dereti GODAA sinttan issippe ufaissan yexxona. Aissi giikko, i sa7aa bollan daannatanau yees. I ha sa7aa bolli xillotettan asaa bollikka suuretettan daannatana.