Mazamure Maxaafaa 97 - Wolaytta Bible

¹ GODAI kawotiis sa7an de7iya asai ufaitto; haaho haruurotun de7iya asatikka ufaittona.

² SHaarainne sakkana xumai a yuuyi aadhdhiis. Xillotettainne tumatettai a kawotaa araataassi baaso.

³ Tamai appe sinttaara bees; a yuuyi aadhdhida morkketa xuuggees.

⁴ A wolqqanttai sa7aa poo7issees; biittai hegaa be7idi kokkorees.

⁵ GODAA sinttan, sa7aa ubbaa Godaa sinttan wogga dereti eessaa muqaaddadan seeroosona.

⁶ Saloti a xillotettaa awaajjoosona; asai ubbai a bonchchuwaa be7ees.

⁷ Worddo xoossatussi goinniyaageetinne he go77enna eeqatun ceeqettiyaageeti ubbai yeellatoosona. Xoossati ubbai GODAAYYO gulbbatoosona.

⁸ Abeet GODAU, Xiyoone asai ne xillo pirddaa siyidi ufaittees; Yihudaa katamatu asaikka hashshu gees.

⁹ Abeet GODAU, neeni sa7aa ubbaappe xoqqiyaagaa; xoossatu ubbaappe neeni xoqqu giidaagaa.

¹⁰ GODAI iitaa ixxiyaageeta siiqees. I Xoossaa asata naagees; qassi eta iitatu kushiyaappe ashshees.

¹¹ Xillotuyyo poo7oi poo7ees; wozanaa suuretuyyo ufaissai de7ees.

¹² Inttenoo xillotoo, GODAN ufaittite; a geeshsha sunttaa galatite.