Mazamure Maxaafaa 96 - Wolaytta Bible

¹ GODAASSI ooratta yettaa yexxite; sa7an de7iya asau, ubbai GODAASSI yexxite.

² GODAASSI yexxite; a sunttaa sabbite; i ashshiyo mishiraachchuwaa hachchi hachchi yootite.

³ Kawotettaa giddon a bonchchuwaabaa, asaa ubbaa giddon a maalaalissiya oosuwaabaa awaajjite.

⁴ Aissi giikko, GODAI gita; aaro galatai ayyo bessees. Xoossatu ubbaappe aadhdhidi i yayettanau bessees.

⁵ Hara asaa xoossati ubbai eeqata; shin GODAI salota medhdhida Xoossaa.

⁶ Bonchchoinne anggai a yuushuwan de7ees; minotettainne puulai a Beeta Maqidasiyan de7ees.

⁷ Inttenoo, asa zaretoo ubbau, GODAABAA yootite; “Bonchchoinne wolqqai GODAABAA” giidi yootite.

⁸ “Bonchchoi a sunttaassa” giidi GODAABAA yootite. Yarshshuwaa ekkidi, a Beeta Maqidasiyaa gelite.

⁹ A geeshshatettaa puulan GODAAYYO goinnite; biittan de7iya asau ubbau, a sinttan kokkorite.

¹⁰ Kawotettatu giddon, “GODAI kawotiis! Sa7ai minni eqqiis; mulekka qaaxxenna. GODAI asaa bolli suuretettan pirddana” yaagite.

¹¹ Saloti ufaittona; sa7ainne hashshu go; abbainne a giddon kumidabai guummo.

^12-13 SHooqainne shooqan de7iya ubbai ufaitto! Woran de7iya mitta ubbainne ufaissan a sinttan yexxana. Aissi giikko, GODAI yees; i sa7aa bollan pirddanau yees; i ha sa7aa bolli xillotettan, asaa bollikka tumatettan pirddana.