Mazamure Maxaafaa 95 - Wolaytta Bible

¹ Haayite; ane GODAA sabboos. Nuna ashshiya zaallaassi ufaissau yexxoos.

² A sintti galataara shiiqoos. Galata yettaa ufaissan yexxoos.

³ Aissi giikko, GODAI wolqqaama Xoossaa, xoossatu ubbaa bolli wolqqaama kawo.

⁴ Biittaa ciimmati a kushiyan de7oosona; deriyaa kiiketikka abaa.

⁵ Abbaa haattaikka abaa; hegaa i medhdhiis; mela biittaakka a kushee oottiis.

⁶ Haayite; hokkidi ane ayyo goinnoos; nuna medhdhida GODAA sinttan gulbbatoos.

⁷ Aissi giikko, i nu Xoossaa. Nuuni a qooruwan de7iya asata; nuuni i heemmiyo a dorssaa wudeta. GODAI inttena hagaadan giyoogaa hachchi siyite!

⁸ “Kase intte maizza aawati Mariiba giyo sohuwan hanidoogaadan, he gallassi Maasa Bazzuwan ixxidoogaadan, inttekka zore ekkennan ixxoppite.

⁹ Eti ta oosuwaa be7idikka, tana qoridosonanne paaccidosona.

¹⁰ Taani he yeletaa oitamu laittaa shenetaas; 'Eti ubba wode bantta wozanan baliya asa; eti ta ogiyaa eribokkona' yaagaas.

¹¹ Hegaadankka qassi, taani hanqqetta caaqqada, 'Eti taani shemppiyoosaa mulekka gelokkona' yaagaas” yaagees.