Mazamure Maxaafaa 92 - Wolaytta Bible

Mazamuriyaa, Sambbatau yexxiyo yettaa.

¹ GODAA galatiyoogee lo77o. Abeet Ubbaappe Xoqqiya Xoossau, ne sunttaa sabbiyoogee lo77o.

^2-3 Tammu baqettan waaxettida diittaanne maazinqqiyaa diixxiiddi, maallado aggenna siiquwaa, qammi neeni ammanettiyaagaa gidiyoogaa awaajjiyoogee lo77o.

⁴ Aissi giikko, neeni ne wolqqaama oosuwan tana ufaissido gishshau, ne kushiyaa oosuwaa gishshau, taani ufaissau yexxais.

⁵ Abeet GODAU, ne oosoi ai keesa gitee! Ne qofai ai keesa ciimmee!

⁶ Eeyya asi eranau danddayenna; damma asikka akeekanau danddayenna.

⁷ Hegeenne, iitati maataadan diccikkokka, iita oottiya ubbati daayikkokka, eti merinaayyo xayana.

⁸ SHin abeet GODAU, neeni merinaayyo ubbaappe xoqqa.

⁹ Abeet GODAU, ne morkketi xayanaagaanne iita oottiya ubbati piskki gaanaagaa nuuni eroos.

¹⁰ Ta kaciyaa bazzo menttaa kaciyaadan xoqqissadasa; lo77o zaitiyaa tana tiyadasa.

¹¹ Ta morkketi xoonettidoogaa ta aifiyan be7aas; ta iita baarigaaratu waasuwaa ta haittan siyaas.

¹² Xilloti zambbaadan daayana; qassi Liibaanoosa zigaadan diccana.

¹³ Etinne GODAA keettan tokettida mittaa mala; eti nu Xoossaa Beeta Maqidasiyan daayana.

¹⁴ Eti ceeggidikka aifana; eti merinau irxxanne payya.

¹⁵ Hegeenne, GODAI suure gidiyoogaa bessees; i taayyo wogga zaallaa; iitatetti an baawa.