Mazamure Maxaafaa 90 - Wolaytta Bible

Xoossaa asai Muusee woossido woosaa

¹ Godau, neeni yeleta ubban nuuni de7iyo soho gidadasa.

² Dereti merettanaappe kase, woikko neeni sa7aa oottanaappe kase, merinaappe merinaa gakkanaayyookka neeni Xoossaa.

³ Neeni asaa naata, “Asaa naatoo, guyye biittau simmite” yaagada, eta guyye eti merettido biittau zaaraasa.

⁴ SHa7u laittai neeyyo zinoi aadhdhiyoogaa mala; woikko qammaa giddoppe issi saate mala.

⁵ Neeni asaa qoppennan di7uwaadan efaasa. Eti aimo mala; maallado maallado mokkiya maataa mala.

⁶ He maatainne maallado wode diccidi ciyyees; omariyo wode shullidi melees.

⁷ Nuuni ne yiilluwan wurida; ne hanqquwaa suuluwan dagammida.

⁸ Neeni nu iita oosuwaa ne sinttan wottadasa; qassi nu geemmida nagaraa ne sintta poo7uwaakko aattadasa.

⁹ Nu gallassa ubbai ne hanqquwan aadhdhiis; nu laittaa issi ooledan wurssoos.

¹⁰ Nu de7uwaa laittai laappun tamma; woi minnikko, hosppun tamma; hegeekka metonne tugga. Nu laittai eesuwan aadhdhees; nuunikka eesuwan kichchoos.

¹¹ Ne hanqquwaa wolqqaanne ne hanqquwaa suuloi ehiyo yashshaa ooninne erenna.

¹² Hegaa gishshau, nuuni aadhdhida eranchcha gidana mala, nu laittai qantta gidiyoogaa nuna tamaarissa.

¹³ Abeet GODAU, ne hanqqoi aude gakkanaassee? Simma; ne ashkkaratuyyo qaretta!

¹⁴ Nu laittaa ubban nuuni ufaittanaadaaninne yexxanaadan, maallado maallado aggenna ne siiquwan nuna kalssa.

¹⁵ Neeni nuna metoyido gallassatu keesaanne nuuni tuggaa be7ido laittatu keesaa, nuna ufaissa.

¹⁶ Nuuyyo ne ashkkaratuyyo ne oosoi qoncco; ne bonchcho wolqqai nu naatuyyo beetto.

¹⁷ Godaa nu Xoossaa kehatettai nu bollan gido; nu kushiyaa oosuwaa nuussi injjeya. Ee, nu kushiyaa oosuwaa injjeya.