Mazamure Maxaafaa 9 - Wolaytta Bible

Daawita mazamuriyaa

¹ Abeet GODAU, taani nena ta kumetta wozanaappe galatana; neeni oottido garamissiya ne oosuwaa ubbaakka yootana.

² Taani nenan ufaittananne hashshu gaana. Ubbaappe Xoqqiya Xoossau, taani ne sunttaayyo galataa yexxana.

³ Ta morkketi guyye simmiyo wode, ne sinttappe xubetti xayana.

⁴ Neeni taayyo xillo pirddaa pirddadasa; neeni xillotettan pirddaidda, ne kawotaa araatan uttadasa.

⁵ Neeni kawotettata qaxxayadasa; iitatakka xaissadasa. Neeni eta sunttaa meri merinaukka quccarggadasa.

⁶ Morkketi merinaa xayuwaa xayidosona; qassi eta katamata muleera xoqollarggadasa. Eti muleera dogetti attidosona.

⁷ SHin GODAI merinaassi kawotidi de7ees; i ba kawotaa araataa pirddaayyo giigissiis.

⁸ Ha sa7aa xillotettan pirddana; deretakka tumatettan pirddana.

⁹ GODAI un77ettidaageetuyyo baqati attiyoobaa; meto wodiyankka geli attiyo soho.

¹⁰ Ne sunttaa eriyaageeti nenan ammanettoosona; aissi giikko, GODAU, neeni nena koyiyaageeta yegga bayakka.

¹¹ Xiyoone Deriyan kawoti uttida GODAAYYO galataa yexxite. I oottido ubbabaakka asa ubbaayyo yootite.

¹² Aissi giikko, suuttaa gussiyaageetayyo halo kessiya Xoossai naaqettidaageetu waasuwaa shenehoo geenna.

^13-14 Abeet GODAU, Xiyoone asaa karen taani eqqada, ne galataa yootana malanne hegan ne atotettan keehi ufaittana mala, ta morkketi tana yedettiyoogaa be7a. Neeni taayyo qarettada, haiquwaappe tana ashsha.

¹⁵ Kawotettati bantta bookkido ollan banttau kunddidosona. Eti qotti wottido piree eta tohuwaa oiqqiis.

¹⁶ GODAI ba xillo pirddan baayyo erettiis; iita asi ba kushiyan oottido oosuwaa piriyan ohettiis.

¹⁷ Iitati duufuwaa baana; Xoossaa dogiya kawotettati ubbaikka etadan hanana.

¹⁸ Hiyyeesi ubbatoo dogetti attenna; woikko metootanchchi wottido ufaissi merinaayyo xayenna.

¹⁹ Abeet GODAU, neeni dendda! Asi xoonoppo! Ne sinttan kawotettatu bolli neeni pirdda.

²⁰ Abeet GODAU, eta neeni yashissa; eti asa gidiyoogaa neeni eta erissa.