Mazamure Maxaafaa 89 - Wolaytta Bible

Ezirahiyaa Etaana timirttiyaa

¹ Abeet GODAU, aggenna ne siiquwaabaa taani merinau yexxana. “GODAI ammanettiyaagaa” gaada, yeleta ubbaayyo ta doonan awaajjana.

² Taani aggenna ne siiqoi merinaayyo eqqidoogaanne neeni ne tumatettaa saluwaadan minttada essidoogaa yootana.

³ Neeni, “Taani dooridoogaara maachchaa maacettaas. Ta ashkkaraa Daawitayyo hagaadan yaagada caaqqaas;

⁴ 'Taani ne zerettaa merinaayyo kawoyana; ne kawotaa araataa yeleta ubbau minttana' yaagaas” yaagadasa.

⁵ Abeet GODAU, saloti neeni oottido maalaalissiyaabaanne neeni ammanettiyoogaa geeshshatu yaa7an galatoosona.

⁶ Saluwan GODAARA likkettanau danddayiyai oonee? Saluwaa meretettatu giddon qassi GODAA mali oonee?

⁷ Geeshshatu yaa7aa giddon Xoossai yayettidaagaa. Bana dooddidaageetu ubbaappe aadhdhidi, keehi daganttiyaagaa.

⁸ Abeet Ubbaappe Wolqqaama GODAU Xoossau, nenadan wolqqaami oonee? Abeet GODAU, neeni ubbabankka ammanettiyaagaa.

⁹ Neeni sugettiya abbaa wolqqaa azazaasa. Denddiya beetaakka co77u oottaasa.

¹⁰ Neeni Ra7aaba giyo abbaa demiyaa wori yeggidobaadan mentterettadasa; ne morkketa ne wolqqaama qesiyan laaladasa.

¹¹ Saloti neegeeta; sa7aikka nebaa; biittaanne an kumida ubbabaa neeni oottadasa.

¹² Huuphessaanne tohossaa neeni medhdhadasa; Taabooranne Hermmoone giyo gita dereti ufaissan ne sunttaa sabboosona.

¹³ Neeyyo wolqqaama qesee de7ees; ne kushee mino; ne ushachchai baabisees.

¹⁴ Xillotettainne suure pirddai ne kawotaa araataassi baaso. Aggenna siiqoinne tumatettai nena ajaboosona.

¹⁵ Abeet GODAU, nena sabbi eriyaageetinne ne som77uwaa poo7uwan heemettiyaageeti anjjettidaageeta.

¹⁶ Ne sunttan gallassa ubban ufaittoosona; ne xillotettaa gishshau, eti nena xoqqu xoqqu oottoosona.

¹⁷ Eti ceeqettiyo wolqqai nena; ne nashuwan nu kacee xoqqu xoqqu yaagiis.

¹⁸ Nu gonddallee nu GODAASSA; nu kawoi Israa7eela geeshshaassa.

¹⁹ Beni neeni ne ammanettida asatuyyo ajjuutan hagaadan yaagadasa; “Taani olettiyaagaa maaddaas. Taani asaa giddoppe doorettidaagaa xoqqu xoqqu oottaas.

²⁰ Ta ashkkaraa Daawita demmaas; ta geeshsha zaitiyaa tiyada a kawoyaas.

²¹ Ta kushee aara merinau daana; ta qeseekka a minttana.

²² A ai morkkeenne xoonenna; ai iita asinne a huqqunnenna.

²³ Taani a morkketa a sinttan kinchcherettana; a ixxiyaageeta shoca yeggana.

²⁴ Ta tumatettainne ta aggenna siiqoi aara issippe gidana. Ta sunttan a kacee xoqqu xoqqu gaana.

²⁵ Taani a kawotettaa Meediteraane Abbaappe Efiraaxiisa SHaafaa gakkanaassi aassana.

²⁶ Daawiti tana, 'Neeni ta aawaa, ta Xoossaanne tana ashshiya zaallaa' yaagidi xeesana.

²⁷ Taani a bairayana; sa7an de7iya kawotu ubbaappe a gitayana.

²⁸ Taani aggenna ta siiquwaa ayyo merinau naagana. Taani aara maacettido maachchaa minttana.

²⁹ Taani a zerettaa merinaayyo minttada essana; a kawotaa araataakka saluwaadan gam77ettana.

³⁰ “SHin a zerettati ta higgiyaa aggikko, qassi eti ta woggaadan hemettennan ixxikko,

³¹ eti ta awaajjuwaa shaarikko, ta azazuwaa naagana xayikko,

³² taani eta nagaraa gishshau gatiman, eta iitatettaa gishshau, lissuwan shocada qaxxayana.

³³ SHin taani aggenna ta siiquwaa appe ekkikke; woikko taani au ammanettiyoogaa aggikke.

³⁴ Taani etaara maacettido maachchaa birshshikke; ta doonaappe kiyida qaalaa laammikke.

³⁵ “Taani issitonkka merinaayyo ta geeshshatettan caaqqarggaas; Daawitassi worddotikke.

³⁶ Hegeenne, a zerettai merinaassi daana; a kawotaa araataikka ta sinttan awaadan gam77ana.

³⁷ Saluwan ammanettiya markka gidiya aginaadan, he kawotettai merinaayyo minni eqqidi daana” yaagadasa.

³⁸ SHin ha77i neeni tiyada kawoyidoogaa bolli daro hanqqettadasa; a ixxadasanne aggadasa.

³⁹ Neeni ne ashkkaraara maacettido maachchaa kaddadasa; a kallachchaanne baanan olada tunissadasa.

⁴⁰ Neeni a katamaa gimbbiyaa ubbaa laaladasa; i naagettiyo miixaa ubbaa bashshadasa.

⁴¹ Ogiyaara aadhdhiya ubbati a bonqqidosona; i ba shoorotuyyo boriyoobaa gidiis.

⁴² Neeni a morkketuyyo xoonuwaa immada, eta ubbaa ufaissadasa.

⁴³ Neeni a bisuwaa xeeraa qalam77adasa; neeni olan a maaddabaakka.

⁴⁴ Neeni a kawotaa xam77aa a kushiyaappe wotta ekkadasa; qassi a kawotaa araataa biittan oladasa.

⁴⁵ Neeni a yelagatettaa wodiyaa qanttadasa; qassi a yeellaa maizzadasa.

⁴⁶ Abeet GODAU, aude gakkanau gam77anee? Neeni merinau geemmuutee? Ne hanqqoi tamaadan aude gakkanaayyo eexxanee?

⁴⁷ Ta laittai ai keena qanttakko qoppa; asaa ubbaa coo hada medhdhadii!

⁴⁸ Asi haiqqennan coo de7anau waani danddayii? Qassi duufuwan gelennaadan, bana ashshanau waani danddayii?

⁴⁹ Abeet Godau, neeni ne tumatettan Daawitassi caaqqido, aggenna beni ne siiqoi awan de7ii?

⁵⁰ Abeet Godau, ne ashkkarai woqqaa borettidaakkonne neeni hassaya. Taani asaa ubbaa boriyaa waata danddayidaakko qoppa.

⁵¹ Abeet GODAU, morkketi qilliiccidosona; neeni doorada tiyido kawuwaa tangguwan tangguwan qilliiccidosona.

⁵² GODAI meri merinau galatetto! Amin77i. Amin77i.