Mazamure Maxaafaa 88 - Wolaytta Bible

Yettaa, Qoraaha naatu mazamuriyaa, Ezirahiyaa Hemaana timirttiyaa

¹ Abeet GODAU, tana ashshiya Xoossau, taani gallassi neessi waassais; qammikka ne sinttan yeekkais.

² Ta woosai ne sintti gakko; ne haittaa ta waasuwaakko yegga.

³ Aissi giikko, ta de7oi metuwan kumiis; taani haiqqana mataas.

⁴ Taani duufuwan geliya asatuura qoodettaas; wolqqi bainna asa gidaas.

⁵ Taani ahatu giddon aggido asa mala; woridi duufuwan yeggido asatu mala. Taani neeni mule dogido, neeppe duuxxida asatu mala.

⁶ Neeni tana ciimma ollan, hirkki xuma sohuwan yeggadasa.

⁷ Ne hanqqoi tana deexxees; ne hanqquwaa beetai tana muleera muukkiis.

⁸ Neeni ta dabbota taappe haassadasa; etayyo tana sheneyiyaabaa oottadasa. Taani un77ettaas; kessa ekkanaukka danddayikke.

⁹ Abeet GODAU, kayyuwaa gaasuwan ta aifeti galjjidosona. Ubba gallassi taani neekko waassais; ta kushiyaa neekko miccaas.

¹⁰ Neeni haiqqidaageetussi maalaalissiyaabaa oottakka; eti denddidi nena galatokkona.

¹¹ Aggenna ne siiqoi mulekka duufo giddon haasayettenna; neeni ammanettiyoogeekka bashshaa sohuwan odettenna.

¹² Ne maalaalissiya oosoikka xuman erettenna; woikko ne kehatettai dogettida asatu biittan de7enna.

¹³ Abeet GODAU, taani neekko waassais; maalladuwan ta woosai ne sintti gakkees.

¹⁴ Abeet GODAU, tana neeni aissi aggai? Ne som77uwaa taappe aissi genttai?

¹⁵ Yelagatettaasappe doommada, taani tuggataasinne haiqqana mataas. Taani neeyyo dagammada yibbaatana hanais.

¹⁶ Ne suulliya hanqqoi ta bolli uushiis; ne dagamai tana bashshees.

¹⁷ Eti gallassa ubbaa di7uwaadan tana dooddoosona; tana muddoosona.

¹⁸ Neeni ta laggetanne ta siiqota taappe haassadasa; xumaa xalaalai taayyo dabbo.