Mazamure Maxaafaa 86 - Wolaytta Bible

Daawiti woossido woosaa

¹ Abeet GODAU, taani hiyyeesanne metootanchcha asa gidiyo gishshau, ta waasuwaa siyada, taassi alla.

² Taani Xoossaa asa gidiyo gishshau, tana paxa wotta. Nenan ammanettiya tana, ne ashkkaraa ashsha. Neeni ta Xoossaa.

³ Abeet Godau, taani gallassa ubbaa neeyyo waassiyo gishshau, taayyo qaretta.

⁴ Abeet Godau, taani ta shemppuwaappe nena woossiyo gishshau, tana, ne ashkkaraa ufaissa.

⁵ Abeet Godau, neeni kehanne atto giyaagaa; nena xeegiya ubbaayyo aggenna ne siiqoi dariyoogaa.

⁶ Abeet GODAU, ta woosaa siya; taani watiwatiyo watiwatuwaa ezgga.

⁷ Neeni taayyo alliyo gishshau, ta metuwaa gallassan taani neeyyo waassais.

⁸ Abeet Godau, xoossatu giddon ne mali baawa; ne oosuwaa mala oosoikka baawa.

⁹ Abeet Godau, neeni medhdhido kawotettaa asai ubbai yiidi, ne sinttan gulbbatana; eti ne sunttaa bonchchana.

¹⁰ Aissi giikko, neeni gita; neeni maalaalissiyaabaa oottaasa. Ne xalaalai Xoossaa.

¹¹ Abeet GODAU, taani ne tuman hemettana mala, tana ne ogiyaa tamaarissa. Taani ne sunttaayyo yayyana mala, taayyo issi wozanaa imma.

¹² Abeet Godau ta Xoossau, taani nena ta kumetta wozanaappe galatana. Ne sunttaa merinau bonchchana.

¹³ Aissi giikko, aggenna ne siiqoi taayyo daro; neeni tana duufuwan geliyoosaappe ashshadasa.

¹⁴ Abeet Xoossau, otoranchcha asati ta bolli denddidosona; daganttiya asatu citai tana woranau koyees. Eti nena wudokkona.

¹⁵ SHin abeet Godau, neeni qarettiyanne maariya Xoossaa; hanqqettanau gam77iyaagaa; aggenna siiqoinne ammanettiyoobai dariyoogaa.

¹⁶ Taakko simmada taayyo qaretta. Ne ashkkaraayyo wolqqaa imma; ne ashkkaree na7aa tana ashsha.

¹⁷ Abeet GODAU, ne kehatettaa malaataa tana bessa. Neeni tana maaddidoogaanne minttettidoogaa be7iyo wode, tana ixxiyaageeti hegan yeellatana.