Mazamure Maxaafaa 85 - Wolaytta Bible

Qoraaha naatu mazamuriyaa

¹ Abeet GODAU, neeni ne biittaa maaradasa; Yaaqooba asaa omooduwaa zaaradasa.

² Neeni ne asaa naaquwaa atto gaadasa; eta nagaraa ubbaa quccadasa.

³ Neeni ne yiilluwaa ubbaa aggadasa; ne hanqquwaa suuluwaappekka simmadasa.

⁴ Abeet nuna ashshiya Xoossau, nuna guyye zaara. Neeni nuussi lanccidoogaanne agga.

⁵ Neeni nuna merinaayyo hanqqettuutee? Ne hanqquwaa yeleta ubbaa gakkanau gam77issuutee?

⁶ Ne asai nenan ufaittana mala, nuna ooraxissa.

⁷ Abeet GODAU, aggenna ne siiquwaa nuna bessa; neeni nuna maaddada ashsha.

⁸ Taani GODAI Xoossai yootiyoobaa siyais. Nuuni nu eeyya ogiyaa guyye baana xayikko, i nuuyyo, ba asaayyo, “Sarotettaa immana” giidi yootees.

⁹ Tumukka Xoossaassi yayyiyaageeta ashshanau i matan de7ees; hegeenne, a bonchchoi nu biittan de7anaassa.

¹⁰ Aggenna siiqoinne tumatettai issippe gaittana. Xillotettainne sarotettai issippe yerettana.

¹¹ Asaa tumatettai sa7aappe pude kiyana; Xoossaa xillotettai saluwaappe duge xeellana.

¹² Ee, Xoossai kehabaa immana; nu biittaikka lo77o kattaa mokkana.

¹³ Xillotettai GODAAPPE sinttaara heemettana; ayyo ogiyaa giigissana.