Mazamure Maxaafaa 84 - Wolaytta Bible

Qoraaha naati xaafido mazamuriyaa

¹ Abeet Ubbaappe Wolqqaama GODAU, neeni de7iyoosai aiba lo77ii!

² Taani GODAA Beeta Maqidasiyaa laamotais; ta kumetta asatettai de7o Xoossaayyo ufaissan yexxees.

³ Abeet Ubbaappe Wolqqaama GODAU, ta kawuwau, ta Xoossau, neeyyo yarshshiyo sohuwaa matan siine kafiyaa baayyo de7iyoosaa demmaasu. Haraphphiyaakka baayyo phuuphulliyo keettaa yan keexxaasu.

⁴ Ne Beeta Maqidasiyan de7iyaageetinne merinau nena sabbiyaageeti anjjettidaageeta.

⁵ Wolqqaa neeppe demmiyaageeti, bantta wozanan Xiyoone efiya ogiyaa baanau amottiyaageeti anjjettidaageeta.

⁶ Baaka giyo mela zanggaaraara eti kanttiyo wode, he sohoi pultto kiyees. Badhdheesaa iraikka bukkidi, yan deelliyaa zin77issees.

⁷ Eti biyo wode, wolqqaa gujji gujjidi baana. Eti xoossatu Xoossaa Xiyoonen be7ana.

⁸ Abeet Ubbaappe Wolqqaama GODAU Xoossau, ta woosaa neeni siya. Abeet Yaaqooba Xoossau, ezgga.

⁹ Abeet Xoossau, nu gonddalliyaa be7a; neeni doorido kawuwaa ne keha aifiyan xeella.

¹⁰ Taani harasan sha7u gallassaa de7anaappe Xoossaa keettan issi gallassaa de7iyoogee lo77o. Iitatu dunkkaaniyan de7anaagaappe ta Xoossaa keettaa penggiyaa naagiyoogee taayyo lo77o.

¹¹ GODAI Xoossai nuussi gonddallenne nuna naagiyaagaa; i nuussi bonchchuwaanne kehatettaa immees. Suuretettan hemettiyaageeta i lo77obaa ubbaa diggenna.

¹² Abeet Ubbaappe Wolqqaama GODAU, nenan ammanettiyaageeti anjjettidaageeta.