Mazamure Maxaafaa 83 - Wolaytta Bible

Asaafa mazamuriyaa, yettaa

¹ Abeet Xoossau, co77u gooppa; sirphphi gooppa; abeet Xoossau, shenehoo gooppa.

² Be7a! Ne morkketi ne bolli denddoosona; nena ixxiyaageeti ne bolli makkaloosona.

³ Eti ne asaa bollan geeman yaa7oosona; neeni siiqiyo asatu bolli maqettoosona.

⁴ Eti, “Haayite, eta kawotettaa xaissoos; Israa7eela giyo suntti merinau hassayettennaadan oottoos” yaagoosona.

⁵ Eti issi wozana gididi, issippe maqettoosonanne ne bolli maachchaa maacettoosona.

⁶ Maacettiyaageetinne Eedoomanne Isimaa7eela keettaa asata, Moo7aaba zaretanne Aggaari zareta;

⁷ Gebaala asata, Amoona asata, Amaaleeqa asata, Pilisxxeema asatanne Xiiroosa asata.

⁸ Asoore asatikka etaara issippe gaittidosona; eti Looxe zaretussi wolqqaama maado gididosona.

⁹ Neeni Midiyaama asatu bollinne Sisaaranne Yaabina bolli Qiishoona SHaafan oottidoogaadan eta bolli ootta.

¹⁰ Eti Enddooren xayidosona; eta ahai moogettennan biittan musiis.

¹¹ Eta halaqata neeni Oreebanne Za7eeba oottidoogaadan ootta; eta haariyaageeta neeni Zebaahanne Xalmmunaa7a xaissidoogaadan xaissa.

¹² Hegeetinne, “Nuuni Xoossaa biittaa nuuyyo buzottana” yaagidaageeta.

¹³ Abeet ta Xoossau, eta baanadan laala; carkkoi efiyo sulladan ootta.

¹⁴ Xaragai buuraa miidi wurssiyoogaadan, tamaa lacoi deriyaa maayiyoogaadan,

¹⁵ hegaadankka ne uushuwan eta yedetta; ne gotiyan eta dagantta.

¹⁶ Abeet GODAU, asai ne sunttaa erana mala, neeni eta som77uwaa yeellaa maizza.

¹⁷ Eti merinaayyo yeellatonanne hirggona; kauyyidi xayona.

¹⁸ Ne xalaalai GODAA gidiyoogaa, ne Ubbaappe Xoqqiya Xoossai sa7aa ubbaa haariyoogaa eti erona.