Mazamure Maxaafaa 81 - Wolaytta Bible

Asaafi xaafidoogaa

¹ Nuuyyo wolqqa gidiya Xoossaassi intte qaalaa xoqqu oottidi yexxite; Yaaqooba Xoossaa sabbite.

² Yexxanau doommite; karaabiyaa baqqite; diittaaninne maazinqqiyan lo77o yettaa sissite.

³ Aginai xeeriyo wode, goobanaa uttiyo wodenne ayyaana gallassan malkkataa punnite.

⁴ Hagee Israa7eelayyo higge; Yaaqooba Xoossaappe woga.

⁵ Gibxxe biittaa i shocido wode, Yooseefa asaayyo ha wogaa awaajjiis. Taani erenna cenggurssaa hagaadan yaagiyaagaa siyais;

⁶ “Intte hashiyaappe toohuwaa wottaas; intte kushiyaa keshiyaappe shemppissaas.

⁷ Intte metuwaa wode tana xeesideta; xeesin inttena ashshaas; taani dadaa giddon geemmidosaappe intteyyo allaas. Mariiba giyo pulttuwaa matan taani inttena paaccaas.

⁸ Ta asau, taani inttena seeriyoogaa siyite; hai Israa7eelatoo, ezggeerekketii!

⁹ Intte giddon allaga xoossi de7oppo; hara xoossaayyo goinnoppite.

¹⁰ Taani, GODAA intte Xoossaa, inttena Gibxxe biittaappe kessada ehiidaagaa. Ne doonaa keehi hangga; taani nena tuxxada barssana.

¹¹ “SHin ta asati ta qaalaa siyibookkona; Israa7eelati taayyo azazettibookkona.

¹² Hegaa gishshau, taani eti bantta qofaa kaallana mala, eenenna wozanaayyo aattada immaas.

¹³ Ta asai taayyo siyidaakko, Israa7eelati ta ogiyaa kaallidaakko,

¹⁴ taani eta morkkiyaa eesuwan xoonana shin; eta baarigaaraatu bolli ta kushiyaa wottana shin.

¹⁵ GODAA ixxiyaageeti a sinttan hokkana shin, eta qixaateenne merinaassa gidana shin.

¹⁶ Taani inttena lo77o gisttiyaa mizana shin; qassi eessaa shuchchaa kooppuwaappe kalissana shin” yaagees.