Mazamure Maxaafaa 80 - Wolaytta Bible

Asaafa mazamuriyaa, markkatettaa

^1-2 Abeet Israa7eela henttanchchau, Yooseefa asaa wudiyaadan kaalettiyaagoo, neeni nuuyyo siya. Kiruubeta giyo kiitanchchatuppe bollaara de7iya araatan uttidaagoo, Efireema, Biniyaamanne Minaase sinttan qoncca. Ne wolqqaa denttada nuna ashshanau haaya.

³ Abeet Xoossau, nuna zaara; nuuni attanaadan, ne som77uwaa nuussi poo7issa.

⁴ Abeet Ubbaappe Wolqqaama GODAU Xoossau, ne asaa woosaa bolli aude gakkanaayyo hanqqettuutee?

⁵ Neeni eta yeehuwaa qumadan mizadasa; qassi afuttaa haattadan ushshadasa.

⁶ Neeni nuna nu shoorotu ooshshaassi gaaso oottadasa; nu morkketi nu bolli miiccidosona.

⁷ Abeet Ubbaappe Wolqqaama Xoossau, nuna zaara; nuuni attanaadan, ne som77uwaa nuussi poo7issa.

⁸ Neeni Gibxxeppe woiniyaa anuwaa ehaadasa; ehaada dere asata yedettada, eta biittan a tokkadasa.

⁹ Neeni lanqqiyaa qeexadasa; yaatin, xaphuwaa yeddidi, daayidi, biitta ubbaa gakkiis.

¹⁰ Dereti a kuwan, wolqqaama zigati a tashetan kamettidosona.

¹¹ Ba tasheta Meediteraane Abbaa gakkanaayyo, qassi ba xeerata Efiraaxiisa SHaafaa gakkanaayyo yeddiis.

¹² Yaatin, ogiyaara aadhdhiya ubbai a aifiyaa duuttanaadan, a yuushuwan de7iya gimbbiyaa aissi qoladii?

¹³ Bazzo gudunttai a bolli duridi bashshees; qassi gaden woxxi qaaxxiya meretati ubbai a moosona.

¹⁴ Abeet Ubbaappe Wolqqaama Xoossau, neeni nuukko simma. Saluwaara duge xeellada be7a; ha woiniyaa naaga.

¹⁵ I ne ushachcha kushee tokkido xapho; neeni neessi gaada dichchido tashe.

¹⁶ Ne morkketi ne woiniyaa qeexidosona; taman xuuggidosona. Hegaa gishshau, neeni eta ne hanqquwaa suuluwan xaissa.

¹⁷ Ne kushee, ne ushachchan de7iya asaa, neeni neessi gaada dichchido asaa naago.

¹⁸ Yaatikko, nuuni neeppe guyye simmokko. Nuna paxa wotta; ne sunttaa nuuni galatana.

¹⁹ Abeet Ubbaappe Wolqqaama GODAU Xoossau, nuna zaara; nuuni attanaadan, ne som77uwaa nuussi poo7issa.