Mazamure Maxaafaa 79 - Wolaytta Bible

Asaafa mazamuriyaa

¹ Abeet Xoossau, dere asati ne biittaa bolli woraajjidosona. Ne Beeta Maqidasiyaa tunissidosona; Yerusalaame qoqqofidosona.

² Eti ne ashkkaratu ahaa saluwaa kafuwaayyo quma oottidi immidosona. Qassi ne geeshshatu ashuwaa sa7aa do7atuyyo immidosona.

³ Eta suuttaa Yerusalaame giddon haattaadan gussidosona; eta ahaa moogiyaabai xayiis.

⁴ Nu shoorotuyyo nuuni cayiyoobaa gidida; nu heeran de7iyaageetuyyo miicciyoobaanne qiriyoobaa gidida.

⁵ Abeet GODAU, hagee aude gakkanaassi hananee? Neeni merinau hanqqettuuttee? Ne qanaatiya hanqqoi tamadan eexxanee?

⁶ Nena erenna deretu bollinne ne sunttaa xeesenna kawotettatu bolli ne hanqquwaa tiga.

⁷ Aissi giikko, eti Yaaqooba zerettata woridosonanne eti de7iyoosaa bashshidosona.

⁸ Kase nu aawatu iitatettaa nu bolli qoodoppa. Eesuwan ne maarotaa nuuyyo kiitta; aissi giikko, nuuni keehippe metootida.

⁹ Abeet nuna ashshiya Xoossau, ne sunttaa bonchchuwaa gishshau, nuna maadda. Ne sunttaa gishshau, nuna ashsha; nu nagaraa atto yaaga.

¹⁰ Dereti aibissi, “Eta Xoossai awan de7ii?” yaaganee? Ne ashkkaratu suuttaa eti gussidoogaa haluwaa neeni kessiyoogaa nuuni xeellishin, eta gidduwan qonccissa.

¹¹ Qasho asatu oolee ne sintti gakko. Haiquwau pirddettidaageeta ne wolqqaa gitatettaadan ashsha.

¹² Abeet Godau, nu shooro kawotettati nena cayidoogaa haluwaa laappun kushiyaa eta kiyuwan idintta.

¹³ He wode nuuni ne asati, ne wudiyaa dorssati, merinau galataa neeyyo immana; yeletaappe yeletaa gakkanaayyo nena zaari zaaridi galatana.