Mazamure Maxaafaa 78 - Wolaytta Bible

Asaafa timirttiyaa

¹ Ta asau, taani inttena tamaarissiyoogaa siyite; ta doonaappe kiyiya qaalaa ezggite.

^2-3 Taani etayyo haasayiyo wode, leemisuwan haasayais; beniisappe geemmida yohota, nuuni siyidonne erido yohota, qassi nu aawati nuuyyo yootido yohota haasayana.

⁴ He yohota nuuni nu naatuppe qosokko; GODAAYYO bessiya galatata, a wolqqaanne garamissiya a oosuwaa yiya yeletaukka nuuni yootana.

⁵ I Yaaqooba zaretussi azazuwaa, Israa7eela asaassi higgiyaa immiis. Kase nu aawati bantta naata he higgeta tamaarissana mala azaziis.

⁶ Hegeenne, kaalliya yeletai, he biron yelettana naati eranaassanne etikka bantta naatuyyo yootanaassa.

⁷ Yaatin, he naati Xoossan ufaissaa oottanaassa; i oottidobaakka balennan agganaassanne a azazuwaa naaganaassa.

⁸ Eti kase bantta aawatudan wozana muumenne makkalanchcha asa gidennan agganaassanne Xoossan eqqennanne ammanettenna yeleta gidennan agganaassa.

⁹ Efireema asati olaayyo wonddafiyaara zubbiyaara giigidi, olaa gallassi guyye simmidosona.

¹⁰ Eti Xoossaa maachchaa naagibookkona; a higgiyaadan hemettennan ixxidosona.

¹¹ Eti i oottidobaanne eta i bessido malaataa dogidosona.

¹² I eta aawatu sinttan Gibxxe biittan, Xo7aane Dembban malaataa oottiis.

¹³ Abbaa shaakkidi, gidduwaara eta pinttiis; i haattaa shaakkidi, yan han godadan essiis.

¹⁴ I eta gallassi shaaran, qammi tamaa poo7uwan kaalettiis.

¹⁵ I bazzuwan zaallaa phalqqidi, ciimmaappe daro haattaa eta ushshiis.

¹⁶ Zaallaappe haattaa pulttissidi, shaafadan duge gogissiis.

¹⁷ SHin eti a bolli nagaraa oosuwaa gede gujjidosona; Ubbaappe Xoqqiya Xoossaa bolli bazzon makkalidosona.

¹⁸ Bantta amottido qumaa oichchiyoogan Xoossaa eriiddi paaccidosona.

¹⁹ Eti Xoossaa bolli hagaadan yaagidi haasayidosona; “Bazzon Xoossai nuuyyo qumaa aattanau danddayii?

²⁰ Zaallaa shocin, pulttoi kiyidi, shaafai goggiis; shin oittaakka i nuussi immanau danddayii? Woikko ba asaayyo ashuwaakka immanau danddayii?” yaagidosona.

²¹ GODAI hegaa siyido wode, eta bolli daro hanqqettiis. Yaaqooba zaretu bolli tamai eexxiis; Israa7eela bolli a hanqqoi dari daridi biis.

²² Aissi giikko, eti Xoossan ammanibookkona; woi i ashshiyoogan ammanettibookkona.

²³ Gidikkonne, i bolla saluwaa azazidi, saluwaa penggiyaa dooyiis.

²⁴ Eti maanau, etau mannaa bukissiis; saluwaa kattaa etayyo immiis.

²⁵ Kiitanchchatu oittaa asai miis; Xoossai etassi qumaa darissidi immiis.

²⁶ Arshsho carkkoi carkkanaadan oottiis; ba wolqqan tohossa bagga carkkuwaa denttettiis.

²⁷ I asaayyo ashuwaa baanaa keenaa kiittiis; paalliya kafota abbaa doona shafiyaa keenata bukissiis.

²⁸ Eti de7iyoosan, dunkkaaniyaa yuushuwan wodhdhidosona.

²⁹ Eti amottidoogaa etayyo immiis; immin eti miidi, bantta ganjjiyaa kunttidosona.

³⁰ SHin eti bantta amottido ashuwaa kallennan de7ishin, ashoi etau biron doonan de7ishin,

³¹ Xoossaa hanqqoi eta bolli wodhdhiis; wodhdhidi, eta giddoppe payya asatanne Israa7eelappe muruta asata woriis.

³² Hagee ubbai haninkka, eti nagaraa oottiyoogaa aggibookkona. Ba malaata ubbaa oottinkka, ammanibookkona.

³³ Hegaa gishshau, i eta gallassata carkkuwaadan, eta laittatakka akeekennan xaissiis.

³⁴ Xoossai etappe woriyo wode, attidaageeti nagaraa paaxidi, Xoossaa mintti koyidosona.

³⁵ Eti Xoossai etau wogga zaallaa gididoogaanne Ubbaappe Xoqqiya Xoossai eta wozidaagaa gididoogaa hassayidosona.

³⁶ SHin eti bantta inxxarssan ayyo worddotidi, bantta doonan cimmidosona.

³⁷ Eta wozanai Xoossan eqqenna; i etaara maacettido maachchaayyo ammanettokkona.

³⁸ SHin i eta maariyaagee; eta iitatettaa atto giis. Eta xaissibeenna; daroto ba hanqquwaa teqqiis; ba hanqquwaa teegaa ubbaara eta bolli yeddibeenna.

³⁹ Aissi giikko, eti asho xalaala gidiyoogaanne yaa carkkidosaappe haa simmenna carkko mala gidiyoogaa hassayiis.

⁴⁰ Eti bazzon a bolli woqqutoo makkalidonaa! Mela bazzon woqqutoo lanccissidonaa!

⁴¹ Eti zaari zaaridi, Xoossaa paaccidosona; Israa7eela Geeshshaa hanqqetissidosona.

^42-43 Eti a wolqqaabaa dogidosona; i eta morkketuppe wozido gallassaa, i Gibxxe biittan malaataa, Xo7aane Dembban maalaalissiyaabaa oottido wodiyaa hassayibookkona.

⁴⁴ Eta shaafaa haattaa suuttau laammiis; hegaa gishshau, Gibxxe asati he shaafaappe uyanau danddayibookkona.

⁴⁵ Eta waayissiya udunxxetanne eta biittaa bashshiya shodhdheta kiittiis.

⁴⁶ Etau mokkida kattaa ukkubuwaassi, eti oottidi daafuridobaa booliyaassi immiis.

⁴⁷ Eta woiniyaa turaa shachchan, eta balase giyo mittaakka kinchchuwan xaissiis.

⁴⁸ Eta miizzata shachchan woriis; eta dorssaa wudiyaa xuuqqiya dadan mereessi wurssiis.

⁴⁹ Eta bolli ba suulliya hanqquwaa, yiilluwaa, lancciyaanne ixuwaa, bashshiya kiitanchchatu citan yeddiis.

⁵⁰ Ba hanqquwaa aatti yeddiis. Eta bashshaassi aattidi immiisippe attin, haiquwaappe ashshibeenna.

⁵¹ Gibxxen yelettida baira naata ubbaa woriis.

⁵² SHin i ba asaa dorssadan kessiis; wudiyaadan bazzon heemmiis.

⁵³ I eta saruwan kaalettiis; hegaa gishshau, eti yayyibookkona; shin eta morkketa abbai muukkiis.

⁵⁴ Yaatidi i eta ba geeshsha biittaa, ba ushachcha kushiyan xoonido deree dariyo biittaa ehiis.

⁵⁵ I eta sinttaappe kawotettata laaggidi, eta biittaa shaakkidi, Israa7eela zaretuyyo gishshiis. Gishidi ba asaa eta keettan wottiis.

⁵⁶ Gidikkonne, Ubbaappe Xoqqiya Xoossaa bolli makkalidi, a paaccidosona. A azazuwaakka naagibookkona.

⁵⁷ Eti bantta aawatudan makkalanchchatanne kaddanchchata gididosona. Geella tooraadan wora wodhdhidosona.

⁵⁸ Eti bantta goinniyo xoqqa sohotun a yiilloyidosona; bantta eeqatun a qanaatissidosona.

⁵⁹ Yaatin, Xoossai hagaa siyidi hanqqettiis; Israa7eela muleera kariis.

⁶⁰ Seelon i de7ido sohuwaa, asaa giddon i de7ido ba dunkkaaniyaa aggiis.

⁶¹ Xoossaa wolqqaayyoonne bonchchuwaayyo malaata gidida Taabootaa morkketu kushiyan aattidi omoodissiis.

⁶² I ba asaayyo hanqqettiis; i eta bisuwaayyo aattidi immiis.

⁶³ Eta wodallati ubbai olan haiqqidosona; yaatin, eta geela7oti azina gelennan attidosona.

⁶⁴ Eta qeeseti bisuwan wuridosona. Gidikkone, eta maccaasati bantta azinatussi yeekkennaadan digettidosona.

⁶⁵ Hegaappe guyyiyan, Godai xiskkuwaappe woi woine eessaa mattuwaappe beegottiya asadan beegottiis.

⁶⁶ I ba morkketa guyye zaaridi shociis; eta merinau yeellayiis.

⁶⁷ Yooseefa zerettaa kariis; Efireema zariyaa dooribeenna.

⁶⁸ SHin i Yihudaa zariyaanne siiqiyo Xiyoone deriyaa dooriis.

⁶⁹ Hegan i ba Beeta Maqidasiyaa saluwaadan xoqqan keexxiis; sa7aadan merinau essiis.

⁷⁰ Ba ashkkaraa Daawita dooridi, dorssaa wudiyaa heemmiyoosaappe ekkiis.

⁷¹ Dorssaa heemmishin, ba asaa Yaaqooba, ba buzuwaa Israa7eela henttanau ekkidi ehiis.

⁷² Yaatin, Daawiti eta suure wozanaappe heemmiis; qassi ba hiilla kushiyan kaalettiis.