Mazamure Maxaafaa 77 - Wolaytta Bible

Asaafi xaafido mazamuriyaa

¹ Taani Xoossaassi magannais; taayyo siyo gaada taani Xoossaa woossais.

² Taani ta metuwaa gallassi Godaa koyais. Qamman taani shemppennan ta kusheta akko miccais; gidikkonne, taani minettanau danddayikke.

³ Taani Xoossaabaa qoppiyo wode, oolais; taani abaa yereriyo wode, ta shemppoi daafurees.

⁴ Neeni qamma ubbaa tana xiskkuwaa diggada aissaasa. Taani keehi hirggiyo gishshau, haasayanau danddayikke.

⁵ Taani aadhdhida gallassata qoppais; kase laittatakka hassayais.

⁶ Taani qofaa sheekkaidda aqais; ta wozanai yererees. Taani ta huuphiyaa hagaadan yaagada oichchais;

⁷ “Xoossai nuna merinau aggi bayanee? Zaarettidi i nuna keha bessennee?

⁸ A siiqoi attidee? I giidobai hagaappe sinttanau sohuwan de7ennee?

⁹ Xoossai maariyoogaa dogidee? Ba qaretaakka hanqquwan laammidee?” yaagada oichchais.

¹⁰ Qassikka taani, “Tana qohidaagee, Ubbaappe Xoqqiya Xoossaa ushachcha kushee kaseppe hitidoogaa” yaagais.

¹¹ GODAU, ne oosota taani qoppana. Ee; neeni beni wode oottido maalaalissiyaabata ubbaa taani hassayana.

¹² Ne oottidobaa ubbaa taani zaara zaarada qoppana; ne wolqqaama oosota ubbaa taani yererana.

¹³ Abeet Xoossau, ne ogee geeshsha; ai xoossinne nu Xoossaa mala gita gidenna.

¹⁴ Neeni maalaalissiyaabaa oottiya Xoossaa. Asaa giddon ne wolqqaa qonccissiyaagaa.

¹⁵ Ne asaa, Yaaqoobanne Yooseefa zerettata ne qesiyan ashshadasa.

¹⁶ Abeet Xoossau, haattati nena be7idosona; haattati nena be7idi yayyidosona. Abbaa ciimmatikka kokkoridosona.

¹⁷ SHaarati iraa duge zaaridi tigidosona; dadai saluwan guummiis. Ne wolqqanttai yan han wolqqammiis.

¹⁸ Ne dadaa gunttai gotiyaa giddon kooshimmiis; ne wolqqanttaa phoolettai sa7aa poo7issiis. Biittaikka gajigajidi kokkoriis.

¹⁹ Neeni abbaa giddoora hemettaasa; ciimma abbaa giddoora kanttaasa; gidikkonne, ne gedee yedhdhido sohoi beettenna.

²⁰ Muusenne Aaroona kushiyan neeni ne asaa dorssa wudiyaadan kaalettadasa.