Mazamure Maxaafaa 74 - Wolaytta Bible

Asaafa timirttiyaa

¹ Abeet Xoossau, neeni nuna merinau aissi aggadii? Ne hanqqoi ne qooruwan de7iya dorssatu bolli aibissi suullidee?

² Neeni beni doorido asaa, neeni neeyyo buzo oottada wozido zareta hassaya. Neeni de7ido Xiyoone Deriyaa qoppa.

³ Ane ne Beeta Maqidasee laalettido sohuwaa yaada xeella. Morkketi an de7iyaabaa ubbaa bashshidosona.

⁴ Ne morkketi ne Beeta Maqidasiyaa giddon, “Nuuni xoonida” yaagidi gereeridosona. Xoonuwaa malaataa yaagidi, bantta banddiraa essidosona.

⁵ Eti mittaa qanxxanau bantta kalttaa xoqqu oottidi eqqida asatudan hanidosona.

⁶ Eti masettida sanqqaa ubbaa bantta kalttaaninne naariqan qeri yeggidosona.

⁷ Beeta Maqidasiyaa taman xuuggidi xaissidosona; neessi goinniyo sohuwaa tunissidosona.

⁸ Bantta wozanan, “Eta nuuni muleera kinchcherettana” yaagidi qoppidosona. Israa7eela biittan asi Xoossaassi goinniyo soho ubbaa taman xuuggidosona.

⁹ He wode malaatai nuussi imettennan ixxiis; hananabaa yootiyaabai issoinne baawa. Hagaadan hanidi, woisa wodiyaa de7anaakko, eriya asi nu giddon issoinne baawa.

¹⁰ Abeet Xoossau, ne morkketi woisa wodiyaa ne bolli qilliiccanee? Eti ne sunttaa merinaayyo cayanee?

¹¹ Ne kushiyaa shiishsha ekkada aissi gam77ai? Ne ushachcha kushiyaa ne qumaashshaa giddoppe kessa.

¹² Gidikkonne, abeet Xoossau, neeni benippekka nu kawuwaa; neeni nuna daroton ashshadasa.

¹³ Ne gita wolqqan neeni abbaa shaakkadasa; a giddon de7iya miimminttiyaa huuphiyaa neeni mentterettadasa.

¹⁴ Lewaataana giyo miimminttiyaa huuphiyaa menttada, a ashuwaa bazzon de7iya meretatussi quma oottada immidaagee nena.

¹⁵ Neeni pulttota dooya yeddadasa; ubbaton goggiya shaafata qassi melissadasa.

¹⁶ Gallassai nebaa; qammaikka nebaa; qassi awaanne aginaa eta sohuwan wottidaagee nena.

¹⁷ Biittaayyo zawaa wottidaagee balgguwaanne boniyaa oottidaagee nena.

¹⁸ SHin abeet GODAU, ne morkketi nena waati qilliiccidaakko, qassi eeyya asati ne sunttaa waati cayidaakko hassaya.

¹⁹ Nenan ammanettiyaageeta iita morkketussi aattada immoppa. Metootanchchata merinaayyo dogoppa.

²⁰ Nu biittan de7iya xuma sohoi ubbai makkalanchchatun kumido gishshau, neeni nuuyyo maacettido maachchaa qoppa.

²¹ Naaqettidaageeta yeellayoppa; hiyyeesatinne metootanchchati ne sunttaa galatona.

²² Abeet Xoossau, dendda; ne yohuwaa mootetta. Ammanenna asati gallassa ubban ne bolli qilliiccidoogaa hassaya.

²³ Ne morkketi ne bolli waassiyo waasuwaanne nena ixxiyaageeti paci bainnan wocamiyo wocamaa dogoppa.