Mazamure Maxaafaa 73 - Wolaytta Bible

Asaafi xaafidoogaa

¹ Xoossai Israa7eelayyo tumuppe lo77o; wozanaa geeshshatuyyo i keha.

² SHin tana gidikko, ta gedee xubettanau guuttaa attiis; ta tohoi hallixxanau matiis.

³ Aissi giikko, iita asatuyyo sarotettai de7iyoogaa be7ada, he otoranchchata taani qanaataas.

⁴ Etayyo tuggi baawa. Eta bollai payyanne mino.

⁵ Eti hara asai tuggatiyoogaadan tuggatokkona; eti hara asaagaadan metuwan shocettibookkona.

⁶ Hegaa gishshau, eti otoruwaa alleeqodan qooriyan aattoosona; makkalaa afaladan maayoosona.

⁷ Eta wozanai iitabaa pulttees. Eta qofai pala halchchoi kumidoogaa.

⁸ Eti baceessoosonanne iitabaa haasayoosona; eti bantta otoruwan harata un77ettanau naassoosona.

⁹ Eti saluwan de7iya Xoossaa bantta doonan cayoosona. Sa7an de7iya asaa bollikka bantta inxxarssan otoruwaa haasayoosona.

¹⁰ Hari atto, Xoossaa asaikka etakko simmana; eti yootiyoobaakka eesuwan ammanana.

¹¹ Eti, “Xoossai nubaa ainne erenna; Ubbaappe Xoqqiya Xoossai ainne be7enna” yaagoosona.

¹² Simmi iitati hagaa mala; eti ubbatonkka injjetin de7oosona; eti gujji gujji duretoosona.

¹³ Yaatikko, taani ta wozanaa geeshsha oottidoogeenne taani ta xillotettaa bessanau ta kushiyaa meecettidoogee tumuppe mela.

¹⁴ Gallassa kumettan taani metuwan shocettaas; wonttin wonttin qaxxayettaas.

¹⁵ Taani iitatudan, “Xoossai erenna” yaagidaakko, taani ne asaayyo ammanettennaagaa gidana shin.

¹⁶ Taani ha ubba yohuwaa eranau qoppiyo wode, taayyo erettenna deexobaa gidiis.

¹⁷ SHin taani Xoossaa geeshsha sohuwaa gelido wode, iitatu wurssetta qaadaa akeekaas.

¹⁸ Eta neeni tumuppe hallixxiya sohuwan utissaasa; neeni eta onggaasanne bashshaasa.

¹⁹ Eti akeekennan xayidosona; dagaman issoi attennan mule wuridosona.

²⁰ Issi asi beegottiyo wode, i aimuwan be7idobai dogettiyoogaadan, abeet Godau, neeni denddiyo wode, etabaa ubbaa dogana.

²¹ Taani yiillotido wodenne ta wozanan mishettido wode,

²² ainne akeekennan dammaas; taani ne sinttan miizza mala gidaas.

²³ SHin taani ubbatookka nenaara de7ais; ta ushachcha kushiyaa neeni oiqqadasa.

²⁴ Ne zoriyan tana kaalettaasa; hegaappe guyyiyan neeni tana bonchchuwaayyo efaana.

²⁵ Taayyo saluwan neeppe attin, harai ooni de7ii? Taani neeppe attin, sa7an harabaa aibanne amottikke.

²⁶ Ta wolqqainne ta wozanai daafuranau danddayees; shin Xoossai ta wozanaa minttiyaagaanne merinaayyo tana gakkida saamaa.

²⁷ Neeppe haakkiyaageeti xayana; nena kaddiyaageeta ubbaa neeni wurssana.

²⁸ SHin taassa gidikko, taani Xoossaa matan de7iyoogee taayyo lo77o. Taani Ubbaa Haariya GODAA taayyo baqata attiyo soho oottaas. Hegaa gishshau, a oosuwaa ubbaa taani yootana.