Mazamure Maxaafaa 72 - Wolaytta Bible

Solomoni xaafidoogaa

¹ Abeet Xoossau, kawoi ne suuretettan pirddanaadan, neeni a tamaarissa; nu kawuwaayyo ne xillotettaa imma.

² Yaatikko, i ne asau xillotettan pirddo; naaqettidaageetayyookka suure daannato.

³ Dereti sarotettaa aifiyaa, keratikka xillotettaa aifiyaa ne asaayyo aifona.

⁴ He kawoi asaa giddon naaqettidaageetu gishshaa mootetto; hiyyeesata i ashsho; huqqunniyaageeta i mentteretto.

⁵ Abeet Xoossau, awainne aginai de7iyo wode ubban, yeletaappe yeletaa gakkanaashin, ne asai neeyyo goinno.

⁶ Kawoi shooqan bukkiya iraanne gadiyaa kalissiya iraa mala gido.

⁷ I de7iyo laitta ubban xillotettai daayo; aginai xayana gakkanaassi sarotettai daro.

⁸ Abbaappe abbaa gakkanaassi, qassi Efiraaxiisa SHaafaappe sa7aa gaxaa gakkanaassi i haaro.

⁹ Bazzo asati ayyo hokkona; a morkketi buhiyaa laaccona.

¹⁰ Tarsseesanne haruurotu kawoti ayyo giiraa giirona. Arabanne Saaba kawoti ayyo imuwaa ehoona.

¹¹ Kawotu ubbai ayyo gulbbatona; kawotettati ubbai ayyo kiitettona.

¹² A xeesiya hiyyeesata, naaqettidaageetanne maaddiyaabi bainnaageeta i ashshees.

¹³ Hiyyeesatussinne manqqotussi i qarettees; hiyyeesatu shemppuwaa ashshees.

¹⁴ Eta naaquwaappenne makkalaappe i wozees. Eta suuttai a sinttan al77o.

¹⁵ Kawoi shemppo gam77o; Araba biittaa worqqai ayyo imetto. Paccennan ayyo woosai woosetto; gallassa ubban i anjjetto.

¹⁶ Biittan daro kattai mokko; dereti kattan kamettona. Biittai Liibaanoosa deree mokkiyoogaadan kattaa mokko; maatai dembbaa kumiyoogaadan asai katamaa kumo.

¹⁷ Kawuwaa sunttai merinau de7o; awai de7ido keesa ubban xeegettiiddi, gam77o. Asai ubbai a baggaara anjjettana; kawotettati ubbai a, “Ufaitta” yaagidi anjjana.

¹⁸ Maalaalissiyaabaa barkka oottiya GODAASSI, Israa7eela Xoossaassi galatai gido.

¹⁹ A bonchcho sunttai merinaayyo galatetto; a bonchchoi sa7aa ubbaa kumo.

²⁰ Isseya na7aa Daawita woosai hagan polettiis.