Mazamure Maxaafaa 71 - Wolaytta Bible

¹ Abeet GODAU, taani neekko baqatais; audenne tana yeellayoppa.

² Ne xillotettan tana wotta ekka; ne haittaa taakko yeggada, tana ashsha.

³ Neeni taani geemmiyo wogga zaallanne tana ashshiya mino qato gida. Ee, neeni ta wogga zaallaanne ta qato.

⁴ Abeet ta Xoossau, iitatu kushiyaappenne, pala qareti bainna asatu wolqqaappe tana ashsha.

⁵ Aissi giikko, abeet Ubbaa Haariya GODAU, neeni taani ufaissan naagiyoogaanne ta yelagatettaa wodiyaappe doommada, taani ammanettiyoogaa gidadasa.

⁶ Taani yelettiyo wodiyaappe doommada nenan zemppaas; ta aayee uluwaappe wodhdhoosappe doommada neeni tana naagadasa. Ubbatonkka ta galatai neessa.

⁷ Neeni taayyo baqata attiyo wolqqaama soho gidido gishshau, ta de7oi daro asaayyo leemiso gidiis.

⁸ Gallassa ubban ta doonai ne galataaninne ne bonchchuwan kumiis.

⁹ Taani cimido wodiyan tana oloppa; ta wolqqai ixxido wodiyan tana aggoppa.

¹⁰ Aissi giikko, ta morkketi ta bolli haasayoosona, Tana woranau koyiyaageeti issippe shiiqidi maqettoosona.

¹¹ Eti, “Xoossai a aggiis; yedettidi a oiqqoos. Aissi giikko, a ashshanai ooninne baawa” yaagoosona.

¹² Abeet Xoossau, taappe neeni haakkoppa. Abeet ta Xoossau, tana maaddanau ellella.

¹³ Tana mootiyaageeti yeellatidi xayona. Tana qohanau koyiyaageeti yeellaanne kaushshaa maayona.

¹⁴ SHin tana gidikko, taani ubbaton nena ufaissan naagana. Taani gujja gujjada nena galatana.

¹⁵ Woisaakko likkiyaa erana xayikkokka, ta doonai gallassa ubban ne xillotettaabaanne ashshiya ne oosuwaabaa yootana.

¹⁶ Taani Ubbaa Haariya GODAA wolqqan yaana; yaada ne xalaalai xillo gidiyaagaa awaajjana.

¹⁷ Abeet Xoossau, neeni ta yelagatettaappe doommada tana tamaarissadasa. Ha77i gakkanaassi taani ne garamissiya oosuwaabaa yootais.

¹⁸ Abeet Xoossau, ne wolqqaanne ne minotettaa yiya yeleta ubbaassi yootana gakkanaassi, taani cimada puulummikkokka tana aggoppa.

¹⁹ Abeet Xoossau, ne xillotettai bolla saluwaa gakkiis. Abeet gitabaa oottida Xoossau, ne mali ooninne baawa.

²⁰ Neeni ta bolli daro metuwaa ehaadasa; gidikkonne, neeni ta de7uwaa zaarada ooraxissana; neeni tana duufuwan gelennaadan naagana.

²¹ Neeni ta bonchchuwaa kaseegaappe darissana; neeni tana zaarettadakka minttettana.

²² Abeet ta Xoossau, ne tumatettaa gishshau, taani nena diittan galatana. Abeet Israa7eela geeshshau, taani maazinqqiyan nena sabbana.

²³ Taani diixxaidda, ufaissau ta qaalaa xoqqu oottada yexxana; neeni tana ashshido gishshau, taani nena sabbana.

²⁴ Ta inxxarssai ne xillo oosuwaabaa ubba gallassi yootana; aissi giikko, tana qohanau koyiyaageeti yeellatidosonanne kauyyidosona.