Mazamure Maxaafaa 70 - Wolaytta Bible

Daawita mazamuriyaa, hassayissiyaabaa

¹ Abeet Xoossau, tana ashshanau eeno ga; abeet GODAU, tana maaddanau eesota.

² Tana woranau koyiyaageeti yeellatonanne kauyyona. Taani qohettanaagaa amottiyaageeti, kauyyidi guyye simmona.

³ Ta bolli, “Au hashshu! Hashshu!” giidaageeti xoonettido gishshau yeellatona.

⁴ SHin nena koyiya ubbati nenan ufaittonanne hashshu goona. Qassi ne atotettaa dosiyaageeti ubbati, “Xoossai gitato!” yaagona.

⁵ Taani hiyyeesanne metootanchcha; abeet Xoossau, eesuwan taakko haaya. Tana maaddiyainne ashshiyai nena; abeet GODAU, gam77oppa.