Mazamure Maxaafaa 7 - Wolaytta Bible

Biniyaama zariyaa Kuuzabaa Daawita yexxido mazamuriyaa

¹ Abeet GODAU, ta Xoossau, taani neekko baqatada qosettais. Tana yedettiya ubbatuppe neeni tana ashsha ekka.

² Neeni tana ashshennabaa gidikko, eti tana gaammuwaadan zaazidi, ooninne ashshennan dafidi carqqayana.

^3-4 Abeet GODAU ta Xoossau, taani asa naaqqidabaa gidikko, hegeenne ta laggiyaassi lo77uwaa gishshaa iitaa zaaridabaa gidikkonne, woikko gaasoi bainnan ta morkkiyaa bonqqidabaa gidikko, hagaa mala yohotuppe issuwaanne taani oottidobaa gidikko,

⁵ ta morkkee tana yedettidi oiqqo. Oiqqidi tana sa7an kinchcheretto; yaatidi, tana biittan oli bayo.

⁶ Abeet GODAU, ne hanqquwan denddada, ta morkketu eexxiya hanqquwaa xaissa. Ta Xoossau, beegotta; tumaa pirdda.

⁷ Deretu yaa7ai ne yuushuwan shiiqo; neeni etappe bollaara gidada haara.

⁸ GODAI dere asatu bolli pirddees. Abeet GODAU, taayyo ta xillotettaadaaninne ta suuretettaadan pirdda.

⁹ Qofaanne wozanaa qorada eriya xillo Xoossau, iitatu geniyaa neeni xaissa. SHin xilluwaa sarotan mintta wotta.

¹⁰ Wozanaa xilluwaa ashshiya Xoossai taayyo gonddalle.

¹¹ Xoossai xillo pirddiyaagaa; i hachchi hachchi hanqqettiya Xoossaa.

¹² Asi ba nagaraa paaxidi simmennan ixxikko, Xoossai ba bisuwaa leefees; i ba wonddafiyaa tolidi giigissees.

¹³ I ba woriya ola miishshata giigissees; tamaa lacuwaadan pol77attiya ba zubbiyaa giigissees.

¹⁴ Iitatettaa shahaaridi, geniyaa abbe ixetidaagee, wordduwaa yelees.

¹⁵ Hara asatuyyo olla bookkida asi ba bookkido ollan bau kunddees.

¹⁶ I ehiyo genee a huuphiyau simmees. A makkalainne a huuphiyau simmees.

¹⁷ GODAA xillotettaa gishshataayyo taani GODAA galatana; qassi Ubbaappe Xoqqiya GODAA sunttaayyo taani galataa yexxana.