Mazamure Maxaafaa 69 - Wolaytta Bible

Daawiti xaafidoogaa

¹ Abeet Xoossau, tana ashsha; aissi giikko, haattai taayyo qooriyaa gakkiis.

² Tohoi eqqiyoosi bainna liqimisiyan muukettais; ciimma haattaa giddo gelaas; haattaa zulee ta bolli zin77ana hanees.

³ Maadossi waassaidda daafurais; ta qorjjantteekka meliis. Ta Xoossai allees gaada xeellishin, ta aifee galjjiis.

⁴ Tana coo ixxiyaageeti ta huuphiyaa binnaanaappe daro. Wordduwan tana morkkiyaageetinne xaissanau koyiyaageeti daridosona. Taani mabeenna miishshaa tana qanxxissoosona.

⁵ Abeet Xoossau, ta mooruwaa eeyyatettaa neeni eraasa; taani oottido nagarai neeppe qosettenna.

⁶ Abeet Ubbaappe Wolqqaama GODAU, nena ufaissan naagiyaageeti ta gaasuwan yeellatoppona. Abeet Israa7eela Xoossau, neekko shiiqiyaageeti ta gaasuwan kauyyoppona.

⁷ Taani cashshaa danddayidoogeenne ta som77oi yeellaa maayidoogee ne gishshaassa.

⁸ Taani ta ishanttussi imatta, qassi ta aayee naatussi allaga gidaas.

⁹ Taani ne keettau mishettiyo mishoi tana tamadan xuuggees; nena cayiyaageetu cashshai ta bolli wodhdhiis.

¹⁰ Taani xoomada, ta huuphiyaa kaushshidoogee, taayyo cashsha gidiis.

¹¹ Taani kayyo maayuwaa maayido wode, etau leemisidi odiyoobaa gidaas.

¹² Ogiyan yuuyiyaageeti tana qilliiccoosona; mattottiyaageeti tabaa yetta kessoosona.

¹³ SHin abeet GODAU, tana gidikko, taani nena woossais. Abeet Xoossau, ne dosiyo wodiyan, aggenna ne siiquwaa daruwan, neeni maaddana giidoogaadan taayyo zaaruwaa imma.

¹⁴ Liqimisiyan muukettennaadan tana ashsha. Tana ixxiyaageetuppe, ciimma haattatuppe neeni kessa ekka.

¹⁵ Haattaa zuliyaa ta bolli zin77issoppa; woikko liqimisiyan tana mitissoppa; woikko duufuwaa doonaa ta bolli gorddissoppa.

¹⁶ Abeet GODAU, aggenna ne siiquwaa kehatettaadan taayyo zaaruwaa imma. Ne qaretaa daruwaadan taakko simma.

¹⁷ Taappe ne ashkkaraappe ne som77uwaa genttoppa; taani waayettiyo gishshau, taayyo eesuwan zaaruwaa imma.

¹⁸ Neeni taakko shiiqa; tana woza; ta morkketuppe tana birshsha yedda.

¹⁹ Taani cashshaa, yeellaanne kaushshaa ekkidoogaa neeni eraasa. Aissi giikko, ta morkketa ubbaa neeni be7aasa.

²⁰ Cashshai ta wozanaa paxennaadan menttiis; taayyo qarettiyaabaa koyaas. SHin issoinne baawa; tana minttettiya asa xeellaas; shin demmabeikke.

²¹ Taani namisettido wode, taayyo cammiya qumaa aattidosona. Taani saamettido wode, taayyo caala woine eessaa immidosona.

²² Eti miyo masoofee etau pire gido. Eti yarshshuwaa yarshshiiddi miyo gibirai etau gite gido.

²³ Xeellennaadan eta aifee goozetto; eta gaadiyaa ubbaton kokkorssa.

²⁴ Ne hanqquwaa eta bolli tiga; ne suulo hanqqoi eta yedettidi oiqqo.

²⁵ Eta keettai mela de7o; eta dunkkaaniyan ooninne de7oppo.

²⁶ Aissi giikko, eti neeni qaxxayidoogeeta yedettoosona; qassi neeni dechchidoogeetu tuggaabaa denttidi haasayoosona.

²⁷ Neeni eta nagaraa bolli eta nagaraa gujjada mazggafa; ne atotettaappe eta aibinne gakkoppo.

²⁸ Eti de7o maxaafaappe qucettona; xillo asaara mazggafettoppona.

²⁹ Taani waayettaiddanne tuggataidda de7ais. Abeet Xoossau, tana ashshada, saro sohuwan wotta.

³⁰ Taani Xoossaa sunttaa yettan galatana; galataa imuwan a gitayana.

³¹ Hegeenne, booraa yarshshiyoogaappe woikko kacaama korimaa yarshshiyoogaappe aadhdhidi, GODAA ufaissana.

³² Naaqettidaageeti tana GODAI ashshidoogaa be7idi ufaittona. Inttenoo Xoossaakko shiiqiyaageetoo, intte wozanai minetto.

³³ Aissi giikko, GODAI hiyyeesatuyyo siyees; qasho keettan de7iya ba asaakka karenna.

³⁴ Saloinne sa7ai, qassi abbainne a giddon woxxi qaaxxiya ubbati GODAA galatona.

³⁵ Aissi giikko, Xoossai Xiyoone ashshana; Yihudaa katamaa zaaridi keexxana. Keexxin a asai yan de7ananne he biittai etassa gidana.

³⁶ A ashkkaratu naati he biittaa laattana; a sunttaa siiqiyaageeti yan de7ana.