Mazamure Maxaafaa 67 - Wolaytta Bible

Mazamuriyaa, sabaa

¹ Xoossai nuuyyo qarettonne nuna anjjo; ba som77uwaa nu bollan poo7isso.

² Ne ogeti ha sa7aa bollan, ne ashshiya wolqqaikka kawotettatu ubbaa gidduwan erettona.

³ Abeet Xoossau, asai nena galato; asai ubbai nena galato.

⁴ Kawotettati ubbai, “Hashshu!” giidi, ufaissau yexxona. Aissi giikko, neeni asaa xillotettan pirddaasa; qassi sa7an de7iya kawotettata kaalettaasa.

⁵ Abeet Xoossau, asai nena galato; asai ubbai nena galato.

⁶ Biittai kattaa mokkiis; Xoossai, nu Xoossai nuna anjjiis.

⁷ Xoossai nuna anjjiis. Sa7aa gaxaa gakkanaassi de7iya asai ubbai ayyo yayyo.