Mazamure Maxaafaa 66 - Wolaytta Bible

Sabaa, mazamuriyaa

¹ Sa7an de7iya asa ubbau, intte qaalaa xoqqissidi, ufaissan Xoossaa galatite.

² “Xoossaa sunttai bonchchetto!” giidi yexxite; bonchcho galataa ayyo immite.

³ Xoossaayyo hagaadan yaagite; “Ne oosoti aiba garamissiyaabee! Ne wolqqai darido gishshau, ne morkketi yashshau ne sinttan gulbbatoosona.

⁴ Sa7an de7iya ubbati neeyyo goinnoosona; nena sabboosona; ne sunttaayyo galataa yexxoosona” yaagite.

⁵ Haayite; Xoossai oottidobaa be7ite; i asaa giddon garamissiya oosuwaa oottiis.

⁶ I abbaa haattaa melissiis; qassi beni nu aawati shaafaara bantta tohuwan hemettidi pinnidosona. Hegan i oottidoban nuuni ufaittida.

⁷ I ba wolqqan merinaayyo haarees. Kawotettata ba aifiyan xeellees; hegaa gishshau, makkaliyaageeti a bolli denddoppona.

⁸ Asatoo, nu Xoossaa galatite; intte a galatiyo galatai siyetto.

⁹ I nuna paxa wottiis; nuuni kunddennaadaaninne naagiis.

¹⁰ Abeet Xoossau, neeni nuna qoradasa; biraa geeshshanau seerissiyoogaadan nuna paaccadasa.

¹¹ Neeni nuna piriyan gelissadasa. Nu zokkuwankka deexobaa toossadasa.

¹² Morkketi nu huuphiyaara togganaadan oottadasa. Nuuni haatta giddooranne tama giddoora kanttida; shin ha77i nuna ishaliyoosaa ehaadasa.

¹³ Taani xuuggiyo yarshshuwaara ne keettaa gelada, ta shiiquwaa neeyyo gattana.

¹⁴ Taani metootido wode ta doonan shiiqettido shiiquwaa, ta inxxarssaappe kiyidaagaa, taani gattana.

¹⁵ Taani neeyyo xuuggidi yarshshiyo dorssa orggeta shiishshana. Korima booratanne deeshsha orggeta neeyyo yarshshana; he yarshshotu cuwai saluwaa gakkana.

¹⁶ Inttenoo, Xoossaassi yayyiyaageetoo, ubbati haa yiidi, siyite. Xoossai taassi oottidobaa taani inttessi yootana.

¹⁷ Ta qaalaa xoqqu oottada taani Xoossaa woossaas; ta inxxarssan ayyo galataa shiishshaas.

¹⁸ Taani ta wozanan nagaraa genttidaakko, Godai taayyo siyenna.

¹⁹ SHin Xoossai tumuppe taayyo siyiis; ta woosaanne ezggiis.

²⁰ Xoossai ta woosaa ixxibeenna gishshau, qassi aggenna ba siiquwaa taayyo diggibeenna gishshau, galatetto.