Mazamure Maxaafaa 65 - Wolaytta Bible

Daawita mazamuriyaa, sabaa

¹ Abeet Xoossau, Xiyoonen neeyyo galatai bessees; nuuni neeyyo shiiqettidobaakka gattana.

² Abeet woosaa siyiyaagoo, asai ubbai neekko yaana.

³ Nu nagarai nuna muukkido wode, neeni nu mooruwaa atto gaadasa.

⁴ Neeni dooridonne ne shilootan uttanau mataa shiishshiyo asi anjjettidaagaa. Nuuni ne son, ne geeshsha Beeta Maqidasiyan de7iya lo77oban kumida.

⁵ Abeet nuna ashshiya Xoossau, garamissiya ne xillo oosuwan neeni nuuyyo allaasa. Sa7aa gaxaappe gaxaa gakkanaassi, haaho abbatuppekka hefinttan de7iya asa ubbau ammanettiyaagee nena.

⁶ Neeni nena wolqqaa gixissada; gita dereta ne minotettan essadasa.

⁷ Neeni abbaa wocamaanne beetaa gunttaa sirphphi oottaasa; qassi deree denddiyo denttaa irxxissaasa.

⁸ Hegaadan neeni oottido malaataa gishshau, sa7aa gaxaa gakkanaassi de7iya asai ubbai neeyyo, “Hoola!” gees. Mokkiyoosaappe wulliyoosaa gakkanaassi de7iya asa ubbaa ufaissadasa.

⁹ Neeni biittaa naagada haattaa ushshaasa; yaatada daro dureyaasa. Asaayyo kattai mokkana mala, Xoossaa shaafai haattai kumidoogaa; hegaadan oottada neeni giigissadasa.

¹⁰ PHakkiliyaa worana malanne gagaraa shugissana mala, neeni yafaran haattaa kunttaasa; kunttada kattai mokkana mala anjjaasa.

¹¹ Laittaa kalo laitta oottaasa; neeni aadhdhiyoosai ubbai kumi goggees.

¹² Neeni bazzuwaa mehiyan kunttaasa; keratakka ufaissaa gixissaasa.

¹³ Neeni hentta gadiyaa wudiyaa maizzaasa; dilbba biittaakka kattaa kunttaasa. Eti ufaissau hombbocoosonanne yexxoosona.