Mazamure Maxaafaa 64 - Wolaytta Bible

Daawita mazamuriyaa

¹ Abeet Xoossau, taani maganniyo maganaa neeni siya. Taani ta morkketussi yayyaas; tana ashsha.

² Palatu maqquwaappenne iitaa oottiyaageetu yaa7aappe tana gentta.

³ Eti bantta inxxarssaa bisodan leefidosona; qassi marzze qaalata wonddafiyaa zubbiyaadan dukkanau giigissidosona.

⁴ Eti qosettidi, bantta wonddafiyaa xillo asa bolli dafoosona; akeeki bainnan dukkoosona; eti yayyokkona.

⁵ Eti bantta iita maqquwaassi issoi issuwaa minttettoosona; bantta piriyaa qottiyoosaa zorettoosona. Eti, “A ooni be7anee?” yaagoosona.

⁶ Eti iitabaa maqettiiddi, “Nuuni lo77o maqqo maqettida” yaagoosona. Hegeenne, asassi wozanainne kahai ciimma gidiyoogaa bessees.

⁷ SHin Xoossai eta ba wonddafiyan dukkana; eti akeekennan masunxxana.

⁸ Eta maqquwaa gishshau, i eta xaissana; eta be7iya ubbai huuphiyaa qaattana.

⁹ He wode asai ubbai Xoossaassi yayyana; a oosuwaabaa yootananne zaari zaaridi qoppana.

¹⁰ Xilloti GODAN ufaittonanne akko baqatidi attona; wozanaa suureti ubbai galatona.