Mazamure Maxaafaa 63 - Wolaytta Bible

Yihudaa Bazzuwan de7iyo wode Daawita mazamuriyaa

¹ Abeet Xoossau, neeni ta Xoossaa; ta wozanai nena laamotees; ta ashoikka nena amottees. Mela, qa77enne haatti bainna biittaadan ta kumetta asatettai nena saamettees.

² Taani nena geeshsha sohuwan be7arkkinaa; ne wolqqaakka ne bonchchuwaakka tana bessa.

³ Aggenna ne siiqoi de7uwaappe lo77iyo gishshau, ta inxxarssai nena bonchchana.

⁴ Ta de7uwaa laittan taani nena galatana; ta kushiyaa miccada, taani nena woossana.

⁵ Asi oissa qumaa kalliyoogaadan, taani nena kallana. Taani ta inxxarssan ufaissaa yettan nena galatana.

⁶ Taani ta hiixan nena hassayais; qamma ubban nebaa qoppais;

⁷ aissi giikko, neeni tana maaddidaagaa. Taani ne qefiyaa kuwan uttada, ufaissau yexxais.

⁸ Taani ne mati shiiqa uttais; ne ushachcha kushee tana oiqqidi naagees.

⁹ SHin tana worana koyiyaageeti biitta garssa ciimma sohuwan moogettana.

¹⁰ Eti bisuwau aadhdhidi immettana; eti godare kaho gidana.

¹¹ SHin kawoi Xoossan ufaittana. Xoossaa sunttan caaqqiya ubbai a galatana; shin wordduwaa haasayiyaageetu doonai gorddettana.